Ужаны но, шутэскыны но вуо

Ангелина Снигирева
By Ангелина Снигирева Июль 11, 2019 14:43

Пичи Пурга ёросын 30-лэсь трос фермеръёс лыдъясько. Соослэн огазеяськонэнызы кивалтэ Ыбдэс (Абдэс-Урдэс) гуртысь Николай Плотников. Ачиз но со фермер луыса 22-тӥ арзэ тырше. Бадӟым семьяенызы картошка будэто, пудо вордо. Фермер хозяйстволэсь кузёзэ Николай Плотниковез туэ пусйизы Россиысь дано фермер нимын.

Ыбдэсысь Плотников фермеръёслэн семьязы
Фото: М. Егоров

Песятаезлэн сюрестӥз

Николай Васильевич огшоры семьяын будэмын, нэнэ-тятяез гурт удысын тыршемын, семьяязы 2 нылпиоссы вал. Школаын дышетскыкуз, Коля эшъёсызлэсь сокем ӧз висъяськылы кадь, лыдӟиськыны яратэменыз ке шат. Школа библиотекаысь вань книгаосты лыдӟыса потэм. Школазэ йылпумъякуз, малпам вылэм, ӝогак гинэ армие ветлоз но анаезлы юрттӥськыны кутскоз шуыса. Угось атайзы улонысь вазь кошкемын. Армиын дыръяз кунгожмес утемын, срочной службаез бере армие кыльыны куриллям. Но пияш гуртаз адскыны бертэм но гуртысьтызы ик Валентина нимо нылашлы синмаськем. Нокыӵе но военной служба солы кулэ луымтэ ни.
Валентина но Николай кузпалъяськизы но 5 пинал вордӥзы: 4 ныл но 1 пи. Ужан удыссэ Николай Васильевич колхозын мытӥз, отӥяз бригадирын но ужаз.

— Выльдӥськон вакытэ уждунэн югдур секыт вал, нош бадӟым семьяез маин ке сюдоно, — шуэ Николай Васильевич. — Тодон-валанмы, кужыммы но мылкыдмы вал бере, висъяськоно кариськимы. Ужмес 2 гектар музъем вылын мытӥмы, картошка будэтӥмы. Уд но оске, ваньзэ сое киын мерттӥськомы но октӥськомы вал, бускельёслэсь валзэс пунэмен басьтылӥмы ик. Нылпиосмылы валэктыны быгатӥмы, ужаса гинэ кӧттыр луомы. Соос ик милям нырысетӥ юрттӥсьёсмы луизы. Шунды ӝужаку, ужаны вамыштӥськомы вал, шунды пуксьыку, ужысь бертылӥмы. Пумен ужаса тракторъёс, со борды думиськись агрегатъёс, груз нуллон машина басьтӥмы. Ужмес мытӥмы Инмарлы но азьланезлы оскыса.
Бичам емышсэс Николай Васильевич ачиз ик Ижевске нуллэм, ӵемысь — мотоциклэн. Озьы соос городысь тросаз нылпи садъёсы, школаосы, столовойёсы, кафеосы картошка вуттылӥллям. Отӥяз музъемзэс паськытатӥзы.

— Ужаны быгатон песятаелэсь паласькемын, дыр, гуртоос шуо: солэсь ужзэ азинтӥськод, — вера Николай Плотников. — 26 аресказ песятаймес кулаке поттӥллям, ассэ каторгае келяллям, нош ваньбурзэ колхозэ басьтӥллям. Песянаймы 2 пиналэн кылемын. Песятаймы, 4 ар пукыса, гуртэ бертэм, колхозэ ужаны пырымтэ ни. Соослэн семьяязы 6 агай-вынъёс вылӥллям, ас понназы ужаллям.

Улэмъя улэм потэ

Николай Плотниковлэн вылӥ дышетскемез ӧвӧл ке но, тодон-валанъёссэ будэтэ, журнал-газетъёс лыдӟыса, кулэ дыръяз нимысьтыз книгаос но почта пыр заказать каре, Интернетын бугыръяське. Ужезлэсь азинскемзэ шӧдыса, ёросысь фермер хозяйствоен кивалтыны оскизы. Ог-огзылэн ужан амалъёсынымы тодматско, визь-кенеш басьто, угось ӵошен кариськыса, пӧртэм ужпумъёсты сэрттыны-пертчыны капчигес.
Гыроно-мерттоно музъемзы 14 гектар пала люкаськем бере 400 тонна бакча емышъёслы чаклам хранилище пуктӥзы. Но… 3 арзэ, пе, токма ыштӥмы. Гурт удысын эшшо ӟечгес азинскон, собыдӟа гу возён понна музъемъёсты, пе, паськытатоно вал, нош Плотниковъёслэн сыӵе луонлыксы вылымтэ.
Аръёс ортчыса, гуртысь ужбергатӥсьёслэн югдурзы умой пала тупатскиз. Музъемзы 200 гектар пала люкаськем бере выль ферма пуктон борды басьтӥськизы. Ужбергатӥсь тодэ, гурт удысын ужаса, коньдон поттыны луэ шуыса. Со понна ужаны мылкыд но йырвизь гинэ кулэ.

— Музъеммы но ӧй вал, пыд пуктыны вырисьёс но шедьылӥзы. Со вакытэ колхозъёсыз азинтыны тыршизы, али со фермеръёс пала дурбасьтыны кутскизы, — шуэ Николай Васильевич.
2017-тӥ арын Ыбдэсэн Уча гуртъёс куспын Плотниковъёс бадӟым гид пуктыны кутскизы. Нош туэ выль гидазы пудо пыртӥзы ни. Ӟеч выжыысь 52 ветыл басьтӥзы, со пӧлысь 27-ез кунянамын ни.

— Пудо йырез йылтыны туж секыт, — шуэ Николай Васильевич. — Гурт удысын ужаны ваньмыз уз чидалэ. Озьы ке но колхозъёслы капчигес, шуысал, соослэн музъемъёссы паськытэсь, фермаоссы вань, техниказы тырмыт, нош милям номырмы но ӧй вал: музъеммы пичи, ферма пуктоно, техника, пудо асьмелы басьтоно. Ачим кадь фермеръёсты пумитасько ке, одно ик кизэс юн кырмисько. Но фермеръёс пӧлын но котькыӵеез вань, кин ке колхоз бервылъёсысь гидъёсыз киултэ но ужасько шуэ.
Гид пуктонзы 18 миллион манет пала усиз, со пӧлысь 5 миллионэз федерал бюджетысь грант чотын басьтӥзы. Азьланезлы малпанъёссы бадӟымесь. Бусы шорын сылӥсь ферма дорозь сюрес лэсьтоно, пудоез йылтоно. Соку гинэ тросгес йӧл кыскыны но луоз. Нош та вакытэ соос трос йӧл сётӥсь выжы скалъёс басьтыны уг дырто на. Ӟеч выжы пудоез вордон понна сиён дасянэз радъяно, ӟеч база кылдытоно. Плотниковъёслэн со малпанъёсазы гинэ ай. Ӧвӧл на соослэн асьсэлэн комбайнзы но, артысь колхозысь сое огдырлы курыло.
Бусыоссы 350 гектар пала: 200 гектарез вылын йыды киземын, 50 гектар вылын картошка будэто, кылемез — турын возьёс. 1 гектарысь шорлыдын 30 центнер пала тысь басьто, картошказы гектарысьтыз 250-280 центнер пала люкаське.

— Музъеммы 350 гектар шуиськомы ке, со пӧлысь 14 гектарез гинэ асьмелэн лыдъяське, нош мукетыз — арендае басьтэмын, гуртоослэн пайёссы, — шуэ Николай Васильевич. — Соос милям 55 кузя люкасько. Музъемзэс милемлы висъямзы понна арлы быдэ 800 килограммлэсь тросгес йыды сётӥськомы, мылкыд каро ке, тысьсэс изӥськомы. Турынэн я уксёен басьтӥсьёс но вань.
Мӧйымыса мылкыд пуксе, шуо, нош Николай Плотниковлэн арлыдыз будэмъя эшшо но золгес ужамез потэ.

— Бадӟым проектэ дасямын, фермамы котыре производственной комплекс пуктоно вал, йӧллэсь но сӥльлэсь продукция лэсьтон, комбикорм поттон. Ферма пуктонэн коньдон ласянь шуг-секытъёс кылдэмын ке но, табыш поттонлы оскисько. Выль производство усьтыса, гурт калыкелы но уж луысал. Та гуртын вордскемын, нылпиосы но внукъёсы татын будо бере, гуртэлэн азьпал улонэз но сюлмаськытэ. Гуртэз азинтон вылысь огкылысь ужаны тыршиськомы.

Ваньмыз асьсэлэн

Али гинэ вал кадь со: Плотниковъёслэн бӧрсьысь бӧрсе 5 пиналзы вордскиз, нош табере ваньзылэн вылӥ образованизы но семьяоссы вань: Анназы ёрос администрациын ужа, Клавдиязы — юрист — бордазы управляющийлэсь ужзэ быдэсъя, Надеждазы Юськи санаторийын дышетэ, Михаил – Гурт хозяйствоя академиын агроинженерной факультетын дышетске но бордазы ужа, Анастасиязы — зоотехник — та нуналъёсы горд диплом басьтӥз. Та семьяын эмеспиоссы но, кензы но гурт удысын ужало, пӧлазы вань на агрономзы, трактористсы, экономистсы, пудо эмъясьсы, нош вань ужзэс лыдъя-чота Валентина Евдокимовна, уно аръёс ӵоже со колхозын но школаын бухгалтер луыса ужамын. Кузпалъёслэн табере 6 внукъёссы — юрттӥськисьёссы — будо.
Валентина Евдокимовна кузпалэз сярысь шуныт кылъёс вера:

— Нылпи ваён юртэ 5 пол ветлӥ, 5 полаз ик нуналаз 2-3 пол роддоме дорам вуылӥз, ёрос центрлэсь 18 иськемын улӥськомы ке но. Нош пимы вордскем бере туж шумпотӥз. Соку вань уксёенымы, бускельёслэсь но пунэмаськем на, Ижысь, оло, вань роза сяськаосты, басьтыса роддоме ваем. Соосты палатаямы ведраосы пуктылӥзы. Роддомысь вань нылкышноослы люкылӥмы.
Плотников кузпалъёс пӧртэм городъёсын но шаеръёсын тодматскыны ярато. Азьвыл арлы быдэ сямен кунгож сьӧры поталлязы, но али ферма пукто, сое быдэстӥзы ке, нош ик сюрес вылэ ӝутскыны малпало.

Валентина Емельянова

Ангелина Снигирева
By Ангелина Снигирева Июль 11, 2019 14:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<