Сюлэмыз куриське зарезе

Ангелина Снигирева
By Ангелина Снигирева 28 июля, 2019 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Дэри ёросысь Италмас каргуртын будэм удмурт пиосмурт Александр Каракулов улонзэ ортчытэ… зарезь пыдэсын. Россилэсь кунгожзэ ву пушкын — подлодкаын — уте. Алигес со бертылӥз вордскем палъёсаз, мадиз, кызьы мынэ Мурманск улосысь Заозёрск городын службаез.

Льӧль малпан

Баренцев зарезь
Фото: А. Каракулов

— Зарезь монэ котьку бордаз кыскылӥз, — веранзэ мытӥз 2-тӥ статьяысь старшина. — Армия бере кытын но ӧй ужа! Огез удыс но сюлмыя ӧй вал. Соин 2 ар талэсь азьло улонме куаӵак воштоно кариськи — контракт гожтыса, Баренцев зарезь дуре кошки. Сьӧрам кузпалме, 2 пичи нылъёсме кутӥ. Квартира соку ик сётӥзы. Нылпи садэ путёвкаос но шаплы висъязы, кышноелы уж ӵектӥзы. Озьы пичи дыр малпанэ быдэсмиз — зарезьын ужаны кутски.
Тросэз тодмоосы паймыса юало, уд-а кышкаськы нуналысь нуналэ ву пушкын ужаны, улон но кулон вискын ветлыны? Лодкаын та сярысь уд малпаськиськы. Йырын одӥгез берга — дыраз быдэстоно командирлэсь косонъёссэ. Угось тынад уженыд, аслад гинэ ӧвӧл, быдэс командалэн улонэз герӟаськемын. Зэмзэ ке, лодкаын сярысь, асьме сюресъёс вылын трослы кышкытгес. Собере, ми ялан ву пушкын ум ужаське. Нырысь одӥг команда 50 я 90 нуналлы ву пыдсы лэзиське, бӧрысь ми соосты воштӥськомы. Тани берлоез командировкае 3 толэзь кыстӥськиз.

Кувалда

— Нырысьсэ ву пушкы пырисьёс пумысен верано ке, татын кемалась сям вань: службаед ӟеч мед радъяськоз, семьяяд быглескын мед бертод но зарезь тонэ мурт медаз кары шуыса, одно ик быдэс стакан зарезь вуэз юоно. Собере вӧлдэтэ ошем кувалдаез… чупано. Со лодка выремъя солань-талань шона. Капчи ик вылымтэ бордаз ымдуръёсты йӧттыны. Кузьыт вуэз но мырдэм юи, быдэс кӧтпуш бугыръяськыны кутскиз…
Нырысь-валысь паймымон вал: море пушкын йыр уг поромы, ӧскем уг поты — уд но малпа, лодка кытчы ке шаплы дыртэ шуыса. Ву вылэ лӧптыку гинэ, тулкымъёсты шӧдыны, лэйканы кутсконо. Лодкае ог 120 кузя тэриськомы. Но ваньмы огазьын ум улӥське. 10 отсекъёсы люкиськиськом. Мон, кылсярысь, ужалляй торпедаен люкетаз. Отын куронъёс юнэсь. Эшъёс доры отсекысь отсеке поталляны яра, кивалтӥсь лэзьыку гинэ. Интернет но, телефон но ярдуре кылемын. Семьяен нокыӵе герӟет ӧвӧл. Матысь адямиед улонысь кошкиз-а, нылпиед вордӥськиз-а — та сярысь тодод, ярдуре потыса гинэ. Но дуннеын мар ортче, ми валатэк ум кылиське. Ӵукналы быдэ кивалтӥсьёсмы иворъёсты верало.

Заозёрск город
Фото: А. Каракулов

Кубиста

— Ог 150-190 метр мурдалаын ялан возиськылӥмы. Та лыдпус, оло, бадӟымгес луысал. Эскерисьёс шуизы: лодкадылэн огвадесаз, пе, тэшкам интыез вань, соин бадӟым давлениез уз чида. Вулэн кужымезлы паймоно. Лодка — кубиста выллем: зӧк кортлэсь корпус пушкын корпус. Но сое но ву быгатэ вылэм пыргытыны, сузмытыны.
Уй-нуналлы огпол лодкамы вылӥе тубалля вал — 10 метр пала мурдалаын связь луэ ини. Озьы командирмы музъеме ивор келя, кыӵе вуостӥ уяськомы но уяны малпаськомы. Соку ик кивалтӥсьмылы верало, мар вылез Россиын но кунгож сьӧрын.
Мур интыосын связь ляб ке, со понна куара туж умой шуккиське, омырын сярысь. Вуын куара 1 секунд куспын 1 сюрс 500 метрозь вуэ. Куара шуккиськемъя ик ӟеч валаськомы, кыӵе подлодкаос котырамы, нош кыӵе корабльёс выламы. Тани Норвегиысь корабль сьӧры эскериськыса кема уямы вал, соос ӧз ик шӧдэ милемыз. Перископ пыр тунсыко соосты учкылыны.

Горд вина

— Кокмы — пӧраськисьмы — сюдэ туж ческыт. Котькуд нунал кӧтэз тып-тып тырыса, мултэс килограммъёс ӝог люкасько. Соин но нянь сиемысь дугдылӥ. Малпасько, люкысь потыны уд быгаты ни ай та — лодкаын солэн быдӟалаез 67 сантиметр. Зэмзэ ке, мугор бадӟым я пичи — маке шат. Ялан лодкаын улыса, сюбег коридоръёстӥз, синэз кыньыса но, капчиен пыраськод-потаськод.
Котькуд нунал сётъяло одӥг бокал горд вина. Сое одно ик юыны косо эмъясьёс — вир, пе, умой мед ветлоз. Угось, музъем вылын сямен, пыдын трос уд ветлӥськы. Нялтас вераса, адямиез йӧнатыны мар кулэ, лодкаын ваньмыз вань. Врачъёс пинез но эмъялозы, операция но лэсьтозы. Тамак пурккетӥсьёслы, вылды, секытгес — кыскыны уг яра. Шутэтскон часъёсы луэ бассейнын пыласькыны, тренажёр залын мугорез кӧня ке посыны. Но косымтэ дыръя бызьылыны уг яра: лодкаысь омырын углерод трос, со сюлэмлы ужаны люкетэ. Собере мускытэз но 30 процент сяна ӧвӧл.

Тыл

— Лодкаысь котькудӥз воргорон — пӧраськись-а тон яке офицер-а — вить чиньыдэ сямен тодыны кулэ, мар кароно, тыл гомӟыку. Отын котырак — йыр вылын но, пыд улын но — вылысьтыз-вылаз езъёс. Котькыӵе интыяз замыкание луыны быгатоз. Но ярам, тае туала приборъёсмы туж сак чаклало. Ӵын потыны кутске гинэ — сигнализация соку ик шудыны ӧдъя. Тылпуэз кысыны сётӥське оглом 10 минут. Отсекысь ӧсъёс пытсасько, отчы омыр вуэмысь дугдэ. Сыӵе учыръёсы милемлы дасямын нимысьтыз шокан маскаос. Ваньмыз та ӵем дыръя юрттэ тылпуэз кысыны, субмаринаез утьыны.
Пусъёно, та утиськон амалъёс сярысь кивалтӥсьёсмы милемлы кыл вылын гинэ уг валэкто. 3 толэзьлы огпол поталляськомы дышетонъя но тренировкаосъя центре. Отын «выйиськомы» но, «ӝуаськомы» но, «тӥяськиськомы» но. Милемлы пуктэмын 2 ужпум — лодкаез утёно, улэп кылёно. Тодмоосы юало, малы, пе, ӝуакуз яке вуэн тырмыкуз, уг луы, акваланг дӥсяса, лодкаысь потыны. Отын со чакламын ӧвӧл. Зэм, вань котырес пичи лодка нергемы. Отчы выдӥськомы ке, ваньмы тэриськомы, ву вылэ потӥськомы.

Музъем

— Командировкалэн тужгес ческытэз, валамон ни, семьяяд бертон. Со нуналэз витиськод чидатэк. Лодкаысь потэме бере кузпалы монэ ӧй тодма, шуэ. Воксё паймиз: 10 арлы, пе, пересьмиськем, губырскиськем, пурысьтаськем. Ма, 3 толэзь шундыез эн адӟы, 4 сэрегын пук ай! Али тани бамъёсы кӧня ке льӧлектӥзы ини — командировка бере милемыз Крымысь санаторийын эмъязы, кужым пыӵатӥзы. Вордскем палъёсме, ӵыжы-выжыосме адӟыса, мылкыд эшшо но ӝутӥськиз. Анаелэсь будэтэм емышзэ кӧт тырымонам сиё на — воксё егитомо, кыдало.

— Заозёрск — пичи город, мӧзмылэс. Отын уло-выло ожгаричослэн семьяоссы. Одӥгъёсыз кошко, мукетъёсыз вуо. Выль коркаос уг ӝутӥсько, ларгамъёсыз уг тупатъясько — укнооссэ кечат-вамат шуккыло но весяклы пытсало. Тол но, гужем но вылысьтыд курткадэ уд куяськы — кезьыт. Кышноелы, мар шуод ини, огназлы секыт йӧтэ. Со монэ яратэ, вала, возьма. Нош мон пумысен лулӟылэ гинэ: таӵе улонэз, пе, чидалоз зарезез яратӥсь мурт гинэ…

Ангелина Снигирева
By Ангелина Снигирева 28 июля, 2019 10:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<