Сопал дуннеын кадь, пе

Ангелина Снигирева
By Ангелина Снигирева 26 июля, 2019 10:19

Кызьы В. Короленко улӥз Глазов палан

Туэ 140 ар тырме ӟуч писательлэн, публицистлэн В. Короленколэн (1853-1921) Глазов уездын ссылкаын улэмез дырысен.

Удмуртъёс та адямиез мур гажало 1894-тӥ-1896-тӥ аръёсы ортчем Мултан уж дырысен, куке со выжымес утиз адями вӧсясь каронлэсь.
Жаляса верано, В. Короленколэн шаерамы улэм-вылэмез сярысь документъёс Удмуртысь архивъёсысь шедьтэмын ӧвӧл. Но 1999-тӥ арын Киров архивысь басьтэмын вал Владимир но Илларион Короленкоосты Вятской губерние ссылкае ыстон сярысь документъёслэн ксерокопиоссы. Озьы ӝот-ӝот тодмо луиз: В. Короленко Глазов уездын улэм 1879-тӥ арын 3-тӥ июньысен 1880-тӥ арын 26-тӥ январёзь.
1879-тӥ арын 10-тӥ мае Санкт-Петербурглэн кивалтӥсез генерал-майор А. Зуров гожтэм вятской губернаторлы Н. Тройницкийлы: агай-вынъёс янгыше уськытэмын революционеръёсын кусып воземзы, калыкез властьлы пумит ӝуткась книгаосты печатламзы но вӧлмытэмзы понна. Короленкоос ӝегатэмын вал 1879-тӥ арын мартэ но Санкт-Петербургысь Глазове нырысь-валысь келямын.
Уездысь исправник Лука Петров Вяткаысь губернаторлы ялан рапортъёс ысъя вылэм, кызьы уло егит дворянъёс Короленкоос (Владимирлы 26 арес вал, Илларионлы — 25 арес).
1879-тӥ арын 4-тӥ июне исправник гожтэм: Короленкоос уждун уг басьто, кызьы ке но улоно шуыса, казнаысь коньдон висъяны куро. 4 нунал ортчыса, исправник нош ик урттылӥське: квартира утчакузы, Короленкоос юалляськизы, кытын уло мукет политической ссыльнойёс, но соосын ӵогш одӥг корка улыны интыяськизы.
Вакчи дыр ӵоже Корленкоос тросэныз глазовъёсын тодматскизы. Гожъяськыны кутскись Владимир Галактионовичлы туж тунсыко вал, кызьы улэ провинциысь калык. Глазовъёс асьсэос но столицаын улон сярысь юаллясько, жалобаос но куронъёс гожтыны куро вылэм. Городын улӥсьёс сое яратӥллям, июле ик ини В. Короленко поручитель луэ сюанын — запасысь рядовой 29 аресъем Иван Устинов 16 аресъем солдат нылэз Анна Косолаповаез кышно басьтэ.
Маин ке но улоно шуыса, Владимир Галактионович пыдкук вурыны-кышъяны дышетске но мастерскойын ужа. Нош Илларион Галактионович слесарь луэ.
Политической ссыльнойёслэсь гожтэтъёссэс, соослы лэзем гожтэтъёсты полицейскойёс одӥгтэм лыдӟо вылэм. Уездысь исправник — ӧчкарыны яратӥсь мурт — Короленкоослы вуэм гожтэтъёсты, посылкаосты но книгаосты учкытэк юри кема возьылэм. Тае чидатэк, огпол В. Короленко губернаторлы ӝожтӥськон гожтэм, Глазовысь полицейскойёс сьӧраз ортчо шуыса. Нош исправник рапорт гожтэм, валэктыса, малы кема возиз посылкаосты, бордаз шуэм: «…я не могу умалчивать о том, что крайне было бы желательно устранить его из города на жительсто в уезд, не ввиду личных моих интересов, как оскорблённого лица, но в отвращение влияния его самостоятельных и дерзких наклонностей на других политических ссыльных, имеющих молодые лета…»
Кин пала кариськиз губернатор? Н. Тройницкий исправникез визьнодаз: ссылкае келям дворянинлэн квартираяз шӧдтэк шорысь обыск ортчытоно но В. Короленкоез Берёзовской починкае келяно.
25-тӥ октябре исправник Владимир Галактинович дӥньын утчаськем, но лушкем бумагаосты, книгаосты шедьтымтэ. Озьы ке но В. Короленкоез со нуналэ ик Бисеровской волостьысь (али Бисерово — Киров улосысь гурт) Берёзовской починкае келям, отын соку 4 корка вылэм, Бисеровоозь 32 иськем…
В. Короленко но стражникъёс 4 нунал ӵоже отчы мыныны выризы. Вуыса писатель сузэръёсызлы гожтэт гожтэм. Глазовысь кошкеме потэ ини, пе, вал — дышиськиз, мӧзмыт потыны кутскиз. Но починкае! Милям Глазовамы та интыос сярысь мар но кышкытсэ уг мадё! Кезьыт, котырак тём-тём тэль, коньдонэн номыр уд басьты, калык лек, ссыльнойёс отын чиптэм-чаптэм ышо (ужас!). Глазовъёс монэ сопал дуннее кадь келязы, бӧрдӥсьёс но вал. Монэ ке куанер улон уг кышкаты — ӟег нянь ӧвӧл ке, сезьы пызен пыжемзэ сиё, зор-кот, кезьыт ке — тазалыке юн, уг сётӥськы. Но вот кызьы огнын, эшъёстэк-тодмоостэк улонэз чидалод!
Глазовын но Берёзовской починкаын улэмез сярысь В. Короленко гожтӥз очеркъёс но веросъёс: «Ненастоящий город», «Чудная», «Глушь», «Собор с зароком» но тодэ ваёнъёсын «История моего современника» книгаезлэсь оглюкетсэ.
Берёзовской починкаын 3 толэзь улэмез бере В. Корленкоез келязы Сибире, ссылкаысь пегӟыны турттэ вал шуыса. Зэмзэ ке, Владимир Галактионович бускель гуртэ тодмоез дӥне куное гинэ потэм вылэм. Сибире мынон сюрес вылысен шараяськиз, писатель пегӟыны уг малпа вал шуыса. Таин валче сое Томскысен Перме берыктӥзы, собере 3 арлы Якутие ыстӥзы. 1885-тӥ арын лэзизы Нижний Новгородэ каръяськыны. Ӵапак та вакытэ со Мултан ужын удмуртъёслэсь чылкыт нимзэс утьыны юрттӥз. Кулӥз Полтаваын.
Илларион Короленко Глазовын 5 ар улӥз. Ссылкаез йылпумъяськыса, солы но Нижний Новгородэ кариськыны лэзизы. Берпуметӥ аръёссэ Кавказын улӥз. Кулӥз 1915-тӥ арын.

Удмуртиысь Шор архивын ужась Ирина Зайцева

Ангелина Снигирева
By Ангелина Снигирева 26 июля, 2019 10:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<