Проект гожтод — гурттэ азинтод!

Ангелина Снигирева
By Ангелина Снигирева 16 июля, 2019 12:47

Берло дыре калык улонзэ ӟечомытон понна ачиз сюлмаськыны ӧдъяз: гуртъёсын нылпи площадкаос, спорт объектъёс пуктылӥсько, сюресъёс выльдӥсько. Калыклэн пайдаё малпанъёсыз трос, соосты улонэ пыӵатыны эшшо но тросгес луонлык кылдӥз.

Ува каргуртысь адямиос «Северный» микрорайонэ нылпи площадка пуктон сярысь кенешо
Фото: Л. Смолина

141 кичӧлтон, 84 вормись

Туэ элькунамы пыӵаны кутскиз инициативной бюджетирование «Милям кичӧлтонмы» («Наша инициатива») кун программа. Соя огшоры калык, проект гожтыса, малпанзэ зэматон понна бюджетысь коньдон басьтыны быгатэ. Отчы пыриськыны яра пичи гуртлы, поселенилы, ёрослы яке быдэс городлы но.
Проектъёс туэ 21-тӥ июнёзь кутӥськизы. Кыӵе кичӧлтонъёс калыклэн, кӧня куриськонъёс вуэмын, кӧняез улонэ пыӵалоз, тодматӥзы Удмуртиысь Правительстволэн Тӧроезлэн воштӥсез Анатолий Строков, коньдон ужпумъёсъя министр Станислав Евдокимов, Россиысь Коньдон ужпумъёсъя министерство бордын ужась Инициативной бюджетирования научно-исследовательской центрлэн кивалтӥсез Владимир Вагин, «Милям кичӧлтонмы» проектлэн наукая кенешчиез (консультантэз) Дмитрий Котов.

— Асьсэ проектъёссэс дасязы но келязы шаерысьтымы ваньмыз 25 ёросъёс но 5 городъёс. Оглом ог 233 малпан вордӥськиз, соос пӧлысь проектозь 141-эз вуиз. Соос пӧлысь 84-ез, нимысьтыз конкурс пыр ортчыса, вормисе потӥз, — шуиз А. Строков.
Озьыен, туэ та 84 проектъёс улонэ пыӵалозы: кытын ке выль нылпи площадка кылдоз, кытын ке сюрес тупатӥськоз. Оглом калыклэсь малпанъёссэс быдэстонлы 85 миллион манет пала кулэ, со пӧлысь 48 миллионзэ сётоз элькун бюджет.
Кылемзэ висъялозы муниципал кылдытэтъёс, лэсьтӥськон-выльдӥськон ужез вырӟыты уксёен юрттозы ужбергатӥсьёс, огшоры калык.
Проектъёсты улонэ пыӵатон понна кыл кутэ Коньдон ужпумъёсъя министерство. Министр С. Евдокимов «Милям кичӧлтонмы» программалэсь пайдазэ пусйиз:

— Туала улон кивалтон ёзъёсты косэ калыклы матын луыны. Та ужпумез быдэстыны юрттэ инициативной бюджетированиея программа. Улонэ пыӵатӥсько адямиослы кулэ луись проектъёс, эшшо ке ачиз калык соосты ӵектэ, ачиз ик соосты лэсьтон борды басьтӥське, быдэстӥськемзэс эскере. Адями палэнысен учкись ӧвӧл ни, со ачиз пыриське. Аслэсьтыз ужам ужзэ дунъяны, утьыны кутске. «Государство мыным лэсьтыса сётоз» интые, «ойдолэ ӵошен та ужпумез быдэстом», шуыны кутске. Со сяна, калыкмы валаны кутске, кызьы ужа кун бюджет, кытчы но малы отысь коньдон люкылӥське. Адямиослэсь шаплы луэмзэс, сомында ӟеч проектъёссэс адӟыса, вуоно арын та программалы тросгес коньдон висъяны курыса, вазисько.

Сюрес, нылпи площадка, клуб

Шумпотымон, ӵектонъёс пӧлысь ог 60 процентэз вуэмын гуртоослэсь, кылемез — городъёслэсь. Озьыен, гуртоос котырзэс чебергес, улыны ярамонгес карон понна дэмен сюлмаськыны ӧдъязы. С. Евдокимов верамъя, проектъёслэн шоро-куспо дунзы ог 850 сюрс манет тыр. Калык куре сюресъёссэс тупатыны, таӵе кичӧлтонъёс 18 интыосысь вуизы, 12 вазиськон — нылпи площадкаос пуктон сярысь, спортэн вырон но шутэтскон интыос тупатыны курыса, 10 кичӧлтон вуэмын. Эшшо адямиослэн культурая юртъёссэс, шайвыл котыръёссэс тупатэмзы потэ. Тужгес трос кичӧлтон — 10 — вуиз Сарапул ёросысь, соос пӧлысь 9-эз вормиз. Уваослэн 9 малпанзы вордӥськиз, 7-зэ улонэ пыӵатыны луонлык кылдоз. Тужгес дуноез проект Воткаысь — 6,7 миллион манет тыр. Отын улӥсьёс куро мугорез кыдатонъя комплекс усьтыны, талы 1 миллион вуоз элькун бюджетысь, кылемзэ висъяны дась муниципал кылдытэт. Ува ёросысь калык Ува-Тукля гуртэ хоккеен шудонъя площадка усьтыны куре. Объектэз пуктыны уксё висъяны, чыры-пыры ужъёсты дунтэк лэсьтыны гуртоос дась. Кез ёросысь Кузьма гуртын лулчеберетъя юртсы выльдэмез вите. Шутэтскон корказы 1990-тӥ арын пуктэмын, со дырысен тупатъямтэ, пе. Со сяна, гуртоослэн фильмъёс, видеороликъёс учкемзы потэ, нош тӥрлыксы ӧвӧл. Но табере кузьмаос югыт, чебер клубе кино учкыны, кырӟаны ветлозы. Нош Глазовысь штанигуртъёслэн ву кошкон гумыоссы выльмозы. Проектъёсъя ужъёс туэ ик кутскыны но йылпумъяськыны кулэ, валэктӥзы кивалтӥсьёс.

— Вормись луымтэ ёросъёслы ӝожомоно ӧвӧл, оскиськом, вуоно арын ӵапак соос, янгышъёссэс валаса, эшшо но тросгес, кужмогес проектъёс дасялозы. Нош ми соослы юрттом, — ватсаз А. Строков.
Озьы, туэ июль пумын ни проектъёсъя центр интыосысь калыкен, муниципал кылдытэтъёсын дышетон ужрадъёс радъяны кутскоз. Августэ калыклэн тужгес сюлмаськытӥсь ужпумъёсызъя пумиськонъёс ортчылозы. Озьы вуоно арын калыклэсь эшшо но тросгес ӟеч малпанъёссэ зэматыны луоз, оско кивалтӥсьёс. В. Вагин ӵектӥз на бюджетированиен пиналъёсты но тодматыны, школаысен соос мед, пе, тодыса, валаса мед будозы, кызьы калыклэсь ваньбурез утёно но дунъяно.
Озьыен, кыӵе ке ӟеч малпанды вордӥськиз ке, со сярысь ивортоно гурт поселенилэн администрацияз. Программае кызьы пыриськыны, куриськон гожтыны, мар со инициативной бюджетирование, пыр-почгес тодыны луоз ib.mfur.ru сайтысь.

Ангелина Снигирёва

Ангелина Снигирева
By Ангелина Снигирева 16 июля, 2019 12:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<