Пересьмон ческыт кошкиз

Ангелина Снигирева
By Ангелина Снигирева Июль 11, 2019 15:08

Кыӵе гурт тужгес кӧттыро? Шаркан ёросысь Быгы! Кылем шутэтскон нуналъёсы татын куатетӥзэ ни ортчиз калык сиёнъёс пӧранъя «Быг-быг» фестиваль.

Быгые быдэс дуннеысь куноос вуизы
Фото: «Шарканский РДК»

2 нунал ӵоже татчы 5 сюрс пала адями вуылӥз, ческыт сиськем сяна, пӧртэм ужрадъёсы пыриськиз, угось ужрадэз ортчытӥсьёс трос пӧртэм площадкаос дасяллям: киужен вырон, кырӟан-веран, шудон… Но сьӧрлось лыктэм куноослы, валамон, тужгес яраз пӧраськыны дышетскон. Городысь вуэмъёс, кылсярысь, нырысьсэ адӟизы, кызьы нӧкы вӧй шуккиське. Паймыса веръяло — тӥни, пе, солэн кыӵе зэмос шӧмыз! Магазинын таӵеез ӧвӧл. Мукетыз, перепеч (шарканъёс сямен: пересьмон) пыжонэз лякыт кожаса, табапуд борды ӝабырске но… сиёнзэ сутэ. Со понна дасьсэ чиньызэс нюлыса сиё.
Калык уг бырылы Москваысь пӧраськись дорысь. Юрий Габров фестивале кыкетӥзэ вуиз ни. Со ӝуась эгыр пӧлын бӧдёноосты пыже. Тылобурдоез, шори тӥяса, нырысь горд сюе няня, озьы, пе, со уг сутскы. Калык кузь черодын сылэ, аспӧртэм сиён понна 100 быг-быгзэ (фестивальлэн «валютаез», одӥгез 20 манет сылэ) уг жаля.

Пӧразы пӧртэм калыклэсь сиёнъёссэ
Фото: Ксения Широбокова

— Студент дыръямы экспедициосын тазьы ми но сӥль пыжылӥм, — тодаз вае Кезысь …Лекомцева. — Пиосмы ӵӧжъёсты кутыса, тылскемын тазьы пыжыса, нылъёсты утялтылӥзы. Зэмос пӧйшурасьёс шуыса, туж данъяськылӥм соосын.
Артэ сылэ Карелиысь Воробьёвъёслэн семьязы. Соос машинаен Быгые 3 нунал ӵоже лыктӥллям. Калыклы ляб кудӟытӥсь юон ӵекто, глёг нимаське. Шӧмызъя глинтвейнлы укша. Соослы туж кельше Быгыын. Паймо, Удмуртиын табыдӟа фестивальёс гуртъёсын но ортчо шуыса, Карелиын, пе, вань ужрадъёс шоркаразы — Петрозаводскын — гинэ луыло. Доразы бертыса, кивалтӥсьёслы та сярысь мадьыны малпало.
Нош Зимбабвеысь нылъёс пӧрамзылэсь зол жадизы …туспуктылонлэсь. Пеймыт куо нылмуртъёс уго паймымон пото. ИжГТУ-ын дышетскись африкан нылъёс рисэн шыд пӧзьтӥзы. Зэм, тусызъя со асьме шыдлы чик уг тупа — туж нап, бакча сиёнэн рагулы укша, но асьмеос рагу пӧлы кеньыр ум ватсаське.
Бадӟым пурты тыр узбек плов дасязы бигеръёс. Та кӧттыро сиён син куспын быриз. Кызьы сое ческыт пӧрано? Пӧзьыкуз сураны уг яра, шуо пӧрасьёс. Вӧез ӧвӧл жаляно.
Куноосты арлы быдэ паймытъя Ижын улӥсь шаркан эмеспи Виталий Шахтин. Солэсь сюй вылын пась корт ведра улын сӥль-чорыг ӵынатэмзэ учкыны котьку трос калык люкаське, куд-огез, пе, табере доразы но озьы йӧндыро.

Плов пӧрамез учкыны трос калык люкаськиз
Фото: Н. Рысьева

Фестивальын пӧраське ноку пӧраськылымтэез но. Кылсярысь, «Пичи шеф» конкурсэ пыриськизы ёросысь покчиос, 7-10 аресъем пиналъёс. Валамон ини, бордазы вал зэмос шеф-поваръёссы — анайёссы. Усточиос час ӵоже ческыт сиёнъёс пӧрмытӥзы: емышъёслэсь тортъёс, печення, мильым…
Собыдӟа ужрадэз ортчытонэ быдэс гурт пыриське. Быгыос вазь ӵукнаысен бер ӝытозь куно пумитало, ваньмызлы гуртсэс возьмато, котькыӵе юанлы валэктон сёто. Соин малпай вал, ужрад кыӵе ке бадӟым грант чотын ортчытӥське шуыса, но кызьы валэктӥз татысь Удмурт культурая центрлэн кивалтӥсез Жанна Ермолаева, ваньмыз лэсьтӥське …мылкыд вылын! Кӧня ке юрттэ ёрос, кӧня ке — спонсоръёс, гурт калык, нош удмурт сиён-юонлэн, удмурт гуртлэн данэз быдэс дуннее вӧлме.

Ольга Зорина

Ангелина Снигирева
By Ангелина Снигирева Июль 11, 2019 15:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<