Пересьмонэз вормоз зумба

Ангелина Снигирева
By Ангелина Снигирева 26 июля, 2019 12:30

25-тӥ пӧсьтолэзе Россиысь 13 карын арлыдоос огдыре зумба эктӥзы. Эктонъя марафонэ 3 сюрслэсь ятыр адями пыриськиз, соос пӧлысь 200-лэсь тросэз — Ижысь мӧйыос.

Ижысь Киров нимо паркысь фан-зонае люкаськизы калыклы социальной юрттэт сётонъя комплексной центръёсысь но «Птица счастья», «Карамболина», «Девчата» коллективъёсысь арлыдоос, Россиысь Пенсионеръёслэн союззылэн ёзчиосыз, «азвесь» волонтёръёс. Марафонэ пыриськон вылысь арлыдоос 18-тӥ июльысен зумба эктыны дышетскизы. Соосын ужаз мӧйыослы чаклам «Зумба Голд» программая инструктор Наталья Горшунова. Со пуйсиз арлыдоослэсь етӥз луэмзэс: тросэз спортэн эшъясько, ог-огзылэсь адӟем каро. Кылсярысь, Людмила Краснопёроваез Индустриальной ёросысь комплексной центрысь эшъёсыз эктыны чортӥллям. Кышномурт ваньмон дыръяз скандинав амалэн ветлэ, мугорзэ кыдатэ, соин задор зумбаез эктыны но шумпотыса мынэм.

Нырысьсэ зумбаез эктонъя флешмоб ортчиз 2018-тӥ арын Москваысь «Сокольники» паркын «Московское долголетие» ужрад улсын. Соку шоркарын 1 сюрс 77 адями эктӥз. Туэ телемост амалэн Москва борды итӥськизы Ижевск, Архангельск, Тамбов, Майкоп, Владимир, Ульяновск, Курск но Воронеж. Меӵак эфирын отысь арлыдоос ог-огзылы салам веразы, шулдыр мылкыдзэс кузьмазы. Ижкаръёслы куазен удалтӥз — задор эктонэз пӧсь куазен эктӥзы, нош воронежъёслы, кылсярысь, зор улын позыръяськоно луиз. Со сяна, зумба эктӥзы на Волгоградын, Мурманскын, Сахалинын но Благовещенскын.

Эктӥсьёсты бурдъязы Удмуртиысь культурая министр Владимир Соловьёв, калыкез улон-вылонын утён политикая но ужъя министрлэн воштӥсез Марина Белоусова но Иж город администрацилэн йырызлэн воштӥсез Дмитрий Чистяков. Соос Ижысь пенсионеръёсты ужрадъёсы, волонтёрской уже мыло-кыдо пыриськемзы понна ушъязы.

— Удмуртиын али Тазалыклэн арез ортче, соин таӵе ужрадъёс ӵемгес ортчылыны кулэ, — вераз В. Соловьёв. — Ӵектӥзы ини фан-зонаын арнялы быдэ зумба эктонъя ӝытъёс ортчытъяны. Туж умой, калык ачиз ӟеч ужрадъёс дэмла ке.

3 сюрслэсь ятыр кузя эктыса, арлыдоос дуннеысь рекорд пуктӥзы. «Университет 55+» проектлэн координаторез Ирина Алмазова шумпотэ, Ижын сомында мӧйыос ӵошен эктыны люкаськизы шуыса. Со оске: вуоно арын Ижысь прудлэн ярдураз 1 сюрс котыр адямиез бичаны луоз.

Зумба эктон мугорез кыдатэ, пересьмонэз вормыны юрттэ, ӟеч мылкыд кузьма. Эктонъя бадӟым марафонэ пыриськыса, ог-огзылэсь адӟем карыса, тросгес арлыдоос таза но сэзь улонэн эшъясько, нош со «Демография» нацпроектэз улонэ пыӵатонлэн огез вамышез луэ.

Анастасия Шумилова

Фото: udmurt.ru

Ангелина Снигирева
By Ангелина Снигирева 26 июля, 2019 12:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<