Осконо ке — нылкышнолы

Ангелина Снигирева
By Ангелина Снигирева Июль 19, 2019 09:43

Кылем арын сӥзьыл Москваысь удмуртъёслэн «Герд» огазеяськонзылэн кивалтӥсез воштӥськиз. Та уж оскемын Маргарита Родионовна Сельченковалы, педагогикая наукаосъя кандидатлы, Пичи Пурга ёросысь Кечол гуртысь потэм нылкышнолы. Та дырысен уж ӧръяськиз: арнялы быдэ сямен шоркарын удмурт кылын удмурт ужрадъёс ортчыло. Маргарита Сельченковалэн кивалтэмез улсын огазеяськонлэн нимыз ӵемгес чузъяськыны кутскиз.

М. Сельченкова

— Маргарита Родионовна, педагогикая наукаосъя кандидат юнме шорысь уг вордӥськы. Кызьы но марлы тӥ Удмурт кун университетысь филфакез бырйиды?

— Пичи Пурга ёросысь Кечол шор ёзо школаын дышетскыкум, туж яратылӥ кылъёсъя урокъёсты: ӟуч, удмурт, иностранной. Кылъёсты яратэменым, аслым сюрес бырйи. 5-тӥ классын дышетскыкум ик, потэ вал дышетӥсь луэме, асме та ужлы дасяны кутски, шуыны луоз. «Вожатый» журналэзи мылысь-кыдысь лыдӟылӥ; пӧртэм ужрадъёслы сценарийёс, мукет вырезкаосты аслам пичияк «шыкысам» люкай. Пичи Пургалась «Маяк» ёрос газетлэн, «Дась лу!» но «Советской Удмуртия» элькун газетъёслэн юнкорзы вал.
4-тӥ классысен ик пионерской ужъёсмы сярысь заметкаос гинэ ӧвӧл — пӧртэм очеркъёс гожъялляй, газетын интервьюосы, суредъёсы, кроссвордъёсы печатласькизы — пӧртэм жанръёсын ужаны выри. 7-тӥ классын «Маяк» газетлэн редакциез монэ, Рита Фёдорова юнкорез, «Юный корреспондент» журналлы арбыт подпискаен данъяз. Гижысь-пиньысь лыдӟылӥ-дышетылӥ котькуд номерзэ.
Со дыре ик пионерской отрядлэн председателез вал. Ортчытъяллям звеньевой но пионерской сборъёс, утренникъёс, КВН-ёс, бичаськом вал макулатура но металлолом, поттылӥм бордгазет.
Шумпотыса кружокъёсы ветлылӥ. Физикаен дышетӥсьмы нуэ вал спортивной ориентированиез. Трос нуналъем походъёсы ветлылӥм, дышетским палатка пуктыны, тылскем вылын сиён пӧзьтыны… Гужем но тол спортивной ориентированиея ӵошатсконъёсы пыриськылӥм, элькун ӵошатсконъёсын районлэсь данзэ утьыны но шуд усьылӥз. 8-тӥ классэз йылпумъякум, сыӵе ӵошатсконъёс Чупчи шур дурын ортчизы, Дэбес ёросысь Байгурезьын. Со дырысен мон Байгурезьлы воксё синмаськемын.
УдГУ-ысь филфаклэсь удмурт кылъя отделенизэ бырйи, малы ке шуоно, школаез йылпумъякум, удмурт кылын гожъяськисько ни вал. Курсмы эшъяськись но визьмо вал. Семинаръёс но лекциос вискын, тодӥсько на, весь удмурт кырӟанъёс кырӟаллям вал. Ӟуч отделениысь студентъёс милемлы воксё паймылӥзы. Куарусен толэзе, колхозлы картошка бичаны юрттон вискын, гуртын улӥсьёслы концертъёс но возьматылӥм.
Мынам тросэз однокурнискъёсы пӧлысь быдэс фин-угор дунеелы тодмо луизы: калык писатель Вячеслав Ар-Серги, филология наукаосъя кандидат Виктор Шибанов; филология наукаосъя доктор Людмила Карпова, педагогика наукаосъя кандидат Светлана Арекеева, история наукаосъя кандидат Татьяна Минниахметова, «Удмурт Кенеш» огазеяськонлэн Дэри ёросысь ёзэтэзлэн кивалтӥсез Лидия Биянова.

Анай-атаеныз

— Ку бен педагогика вормиз филологиез?

— Огаз занятие лыктӥз Нина Павловна Ажимова — Кияса ёросысь Атабай шор ёзо школаысь директор. Милесьтым, 5-тӥ курсын дышетскисьёслэсь, со юаз, вань-а милям мылкыдмы школаяз ужаны. Мон малы ке но соку ик киме ӝутӥ: мон мыно! Али но паймисько, кызьы сыӵе дӥсьтӥ. Соку ведь малпаськыны но дыр ӧй вал, «анай-атаен кенешо» но ӧй шуы, нош соос лэзёзы меда? Малы ке но оски, соос мынэсьтым быръем сюресэлы дурбасьтозы шуыса.
Али валасько, мон школаын ужаны дась ни вал шуыса. Атабайысь школаын 3 ар ужаме — тужгес но шудо аръёсы. Мыным соку ӟуч кылъя но литературая урокъёс нуыны но классэн кивалтыны оскизы. Аслам школаын дышетскон аръёсы походъёсын, спортивной ориентированиея кружокын басьтэм тодон-валанъёсы туж интыяз луизы. Нылпиосын трос нуналъем походъёсы ветлӥськом вал. Али мон нылпиосты озьы ӧй ни нуысал. Кыӵе бадӟым кыл кутон ук со! Толалтэ капчигес вал: ми школьной интернатъёсын кӧламы. Нош гужем уйёсмес палаткаосын шур дурын, нюлэскын ортчытъям. Котькуд пиналэз мар ке понна кыл кутыны косӥсько вал: кин сьӧрамы кутэм тӥрлык понна (лопатаос но кострюльёс медаз ыше), кин эмъюм понна, кин сиён… Котькуд ӵукна но, ӝыт но линейка ортчытъям. Нуналлы йылпумъян лэсьтылӥм, мукет нуналлы планъёс пуктылим.
Малы аспирантураез бырйи? Шонерзэ вераса, монэ бырйизы. Диплом ужме мон удмурт кылэз дышетонъя методикая гожъяй вал. Наукая кивалтӥсе Геннадий Ушаков, ужакум ини, огпол монэ адӟиз но шуэ: Маргарита, аспирантурае дасяськоно. Сыӵе малпан йырам но ӧз лыктылы — школа сюлмыя вал. Мон кема малпаськи, анаен-атайлэсь кылзыса гинэ, аспирантурае мыни. Ай отын дышетскыкум но, быдэс арзэ школаысь пионер но комсомол организациосын кивалтӥ. Соослы гожтэтъёс гожъяй, сценарийёс.
Озьы Удмурт АССР-ысь Просвещениея министерстволэн ӵектэмезъя 1983-тӥ арын мон РСФСР-ысь Просвещениея министерстволэн Национальной школаосъя научно-исследовательской институтлэн аспирантураяз пыри. Москваысь институт быдэс Россиысь национальной школаос понна ученойёсты дасяз. Аспирантъёс — со национальной учебникъёслэн, национальной программаослэн но методической пособиослэн вуоно авторъёссы. Наукая кивалтӥсе вал Глафира Николаевна Никольская — педагогика наукаосъя доктор, профессор. Озьы улонэлэн выль вакытэз кутскиз.
Глафира Николаевна темаелэсь кулэлыксэ валэктӥз: пиналъёс удмуртэн, ӟучен гожъясько, нош вераськыны шугъясько, та ужез школаын нуыны кутсконо ини. Озьы ми «Удмурт кыллэсь морфологизэ дышетонын 6-тӥ-7-тӥ классъёсын дышетскисьёслэсь связной устной кылзэс азинтон» тема бордын ужаны кутскимы.
Тодӥсько на удмурт школаостӥ бадӟым магнитофонэн ветлэмме. Нылпиослэсь вераськемзэс гожъялляй, верамзэс эскери, макем шонер соос быгато маланзэс вераны. Собере ини методикаме кылдытон бордын ужаны кутски. Со методикаме эскери Дэри, Пичи Пурга но Кияса ёросъёсысь школаосын. Отӥяз сое мукет школаосын но пыӵатыны кутскизы.
Та дыре Национальной школаосъя НИИ-ысь ужасьёсын юн кусып возисько. Аспирантураын басьтэм тодон-валанэ, быгатонлыке али но ассэ шӧдытэ: мар ке весь гожъяме, радъяме потэ.
Туж тау карисько Глафира Николаевналы. Со котьку юрттылӥз мыным наукаен вырыны но, калыкен ужаны но. Ми али ке но юн кусып возиськомы. Со мон понна идеал луэ. Нырысь ик, со наукаын вылӥе ӝутскиз: педагогика наукосъя доктор, профессор, Россиысь но Удмуртиысь наука удысысь дано ужась. Озьы ик со усто кузё кышно: паймымон ческыт пыжиське, быгатэ керттӥськыны, вуриськыны. «Со сыӵе капчи ук!» — шуэ. Соин вераськыны но туж каньыл: эш кадь вераськеменыз котькинэ ачиз пала берыктоз. Чебер кырӟа, гитараен шудэ, ас понназ дышетскиз баянэн шудыны. 90 аресказ чебер кышномурт!

— Нош тӥляд улонады кыӵе инты басьтэ творчество?

— Яратӥсько суредаськыны, фотографиен вырыны. Со воксё мукет дунне. Нош огшоры улонэ берытскиськод но мукет сямен ужаны но малпаськыны кутскиськод.

Москваын Удмурт кыллэн нуналаз

— Кин тӥ та улонын: дышетӥсь, наукая ужась, организатор, кун служащий?

— Ӵем дыръя та юанэз аслым сёткасько. Но мон нырысь ик дышетӥсь шуыса валасько. Удмурт огазеяськонамы вуо трос выль адямиос. Чакласько соосты: асьсэды кызьы ке умоен возьмато ке, котьку ушъясько. Мынам ужан стиле — нодъян, юрттон. Кӧня ке жалясько, дышетон ужлэсь палэнски, научной ужысь кошки шуыса. Со мынам самой шонер сюресэ вал ук. Но 1990-тӥ аръёс быдэс кунмы но, котькудӥз нимаз басьтэм адями понна но туж секытэсь вал. Наука данын ӧй вал, кивалтӥсьёс со пала ӧз ик учкылэ, социальной сфера но палэнэ кылиз. Озьы 1996-тӥ арын пӧрмиз — Удмуртилэн Москваын ялан ужась представительствояз ужаны кутски. Мыным туж кельше вал, элькунэлэн «люкетаз» ужасько шуыса, котьку тодӥсько, мар ортче Удмуртиын, ёросъёсын, гуртъёсын.
Постпредство кылдэмез дырысен кун кивалтэтлэн быдэсъясь органэз луэ, улос кивалтэтлэн федеральной властен кусыпъёсыз понна кыл кутэ. Адямиосын кусып тупатон, ужрадъёс ортчытъян вылам вал. Мон ужай Россиысь но Удмуртиысь культурая, тазалыкез утёнъя, дышетсконъя, егитъёсын но нациосын ужан политикая министерствоосын кусып возён бордын. Озьы 2014-тӥ арозь.
Постпредствоын тодматски фин-угор посольствоослэн, ялан ужась представительствоослэн, дышетскон но лулчеберет учреждениослэн, национально-культурной огазеяськонъёслэн но землячествоослэн уженызы, паймымон адямиосын.

— Кивалтон удысын творческой адями ужаны быгатоз кадь-а?

— Творческой адямиос — аналитикъёс. Соос одӥг адямиез гинэ уг, быдэс обществолэсь «тазалыксэ» шӧдо. Соос вазенгес адӟо вуоно воштӥськонъёсты, пӧртэм учыръёсты. Сыӵе кивалтӥсь вӧзын луыны кулэ юрттӥсь — предприниматель кадь малпаськыны быгатӥсь.

Москваысь удмуртъёслэн Герберазвы

— 2018 арысен тӥ «Герд» огазеяськонлэн кивалтӥсез луиськоды. Со дан но, секыт ныпъет но. Маиз тросгес?

— Котьку тодам возисько Великобританилэн премьер-миистрезлэсь Маргарет Тэтчерлэсь кылъёссэ: «Маке сярысь верамын медло кадь потэ ке, сое пиосмуртлы оскелэ. Лэсьтэмын медло ке — кышномуртэз со сярысь курелэ». Зэм но, озьыгес луэ. Тужгес но со шодӥське общественной ужын.
«Герд» сярысь ке, татчы мон кылдэмез дырысен вуи. 1991-тӥ арын удмурт интеллигенция Глафира Никольскаялы оскиз Москваын удмурт огазеяськон кылдытыны но соин кивалтыны. Монэ но Глафира Николаевна «Герд» огазеяськонэ кыскиз. Туж сюлмыя вал: вӧзам удмуртъёс-землякъёсы, котьку удмурт кылэз кылӥсько. Вордскем палъёсам бертӥсько ке, гуртоосы паймо: Рита, тон сокема Москваын улӥськод ни, нош удмурт сямен сыӵе чебер вераськиськод.
Туннэ нуналэ «Герд» огазеяськонлэн кивалтэтэз — юн команда. Быръемын выль правление. Отчы пыризы шумприч, визьмо, йӧно, Удмуртилэн пӧртэм ёросъёсысьтыз потэм нылкышноос. Со умой. Удмурт кышномурт ужась гинэ ӧвӧл, со дипломат. Калык дипломатиез уже кутыса, ми карысь улӥсьёсты паймытӥськом. Удмурт ужрадъёс ортчытъяськом. Удмуртиысь фольклор коллективъёсты отчы ӧтчаськом. Быдӟымнуналэ курегпуз питыръяса шудон ужрадэз но Москваысь гурезь бамалъёсы выжтӥмы ни. Удмурт кыллэн нуналаз бадӟым ужрад ортчытъяськом. Туэ Бадӟым удмурт диктант дэмен гожтӥмы. Тросгес но тросгес егитъёсты бордамы кыскиськомы.
Вуоноез сярысь ке. Нырысь ик, «Герд» огазеяськон грантъёс басьтонъя конкурсъёсы мыло-кыдо мед пыриськоз кадь потэ. Солы юрттоз командаен ужан — удмурт веме. Мукет ласянь — ужам ужедлэсь емышъёссэ возьматыны быгатон; удмуртъёслы со секытэнгес сётӥське.
Озьы ик ортчытъяно но пыриськоно культураез мегаполисын азинтыны чаклам пӧртэм ужрадъёсы: али ужаськомы «Удмуртъёслэн календарной обрядъёссы но праздникъёссы», «Удмурт шаер сярысь лекциос», «Землякъёс — землякъёслы» проектъёс бордын.
Монэ туж сюлэмшугъяськытэ, кунмы анай кылъёслы ӧжыт саклык висъя шуыса. Школьной программаысь вордскем кылъя урокъёсты куштон, дышетисьёслэсь лыдзэс кулэстон… Та юанъёсты ӝутэме потэ. Кылсярысь, анай кылъя курсъёс, удмурт кылъя семинаръёс усьтыны.

— Уж яке семья нырысетӥ интыын?

— Семья мон понна котьмалэсь бадӟым. Куддыр серемпыр верасько: кыӵе ке экстремальной учыре телефонэ жингыртӥз ке, мон куто, со мынам Елизавета но Сюзанна нылъёсы яке Россилэн Президентэз луизы ке гинэ. Кузпалы соку серекъя: мон со списокын ӧвӧл шат?
Кузпалэлы валамез понна тау кареме потэ. Со капчиен уг сётӥськы. Со ӟуч, Москваын вордскемын. Палэнысен учке ай: кузпалыз — лыктэм адями, эшшо ке аслаз удмурт но фин-угор ужъёсыныз выре…
Нылпиосы улонэлэн инъетэз луо. Кыктоослы али 19 арес ини, монэн ӵошатыса, тросгес тодо, тросгес быгато (али мон компьютер сярысь верасько). Та дыре Экономикая вылӥ школаын дышетско: огез филфакын, мукетыз кунгожсьӧр кылъёсъя факультетын, берпуметӥ классъёсын дышетскисьёсты олимпиадаослы дасянъя курсъёс нуэ. Школаысь бертэ но мыным ужез сярысь вера. Сак кылзӥсько сое, шумпотӥсько, нылъёсы мынам пытьыетӥм мыно шуыса.
Соос мынам юрттӥсьёсы, визь-кенеш сётӥсьёсы. Кылсярысь, ужея мон трос егит адямиосын пумиськылӥсько, куд-ог верамъёссы но ужъёссы мон понна валантэмесь луо. Соку ик нылъёсылэсь юасько, малы со озьы лэсьтӥз шуыса. Соос ваньзэ валэкто: со адями озьы кариз, малы ке шуоно, сое-сое вераны турттэ вал.

Семьяез

— Кыӵе, тӥ малпамъя, луыны кулэ кышномуртлэн улонэз пӧртэм арлыдаз?

— Туала кышномурт троссэ быгатыны кулэ: умой кузпал, умой хозяйка, усто анай луыны кулэ. Уж дурын но ваньзэ вуыны кулэ, дырен ӵош вамышъяны…
Дырлэсь кыльыны уг яра. Али дуннеен информация кивалтэ. Макем чалякгес валалод информацилэсь ӧрзэ, сокем аслыд ик капчигес луоз. Тодӥсько на, нылъёсы, 5-тӥ классын дышетскыкузы, чатын пуко вал. Вераны кулэ, соос туж шонер гожъясько, кылэз шӧдо, валало. Но соку паймыса юай: Сюзанна, малы тон сомында янгыш келляськод? Шуэ: «Мама, котькуд запятойлы дырме быдтӥ ке, мон темаын уг луы ни». Зэм но, «темаын луыны» кулэ. Компьютерной технологиос — туж кулэ маке. Соос дугдылытэк выльдӥсько, но соос сьӧры вутскыны тыршоно.
Соин ик «гожтэтме басьтӥд-а?» юанэлы адями «электронкае уг усьтӥськы» шуэ ке, туж паймисько. Озьыен, адями та дырын уг — мукетаз — улэ.
Со дыре ик астэ но чакланы вуыны кулэ…

— Дыр ортчемъя, азяды пуктэм ужпумъёсты кулэсмо-а, йыло-а?

— Кулэсмо. Но кылемез паськытгес но мургес луэ. Мышкын — басьтэм тодон-валан, быгатон, кусыпъёс, умой привычкаос. Ужпумъёс — семьялэн тазалыкез сярысь сюлмаськон, астэ азинтон…
Юнгес шӧдыны кутски ӵыжы-выжыосыным кусыпъёсме. Кылсярысь, Москваын удмурт ужрадлы дасяськыкум, ас поннам соосын вераськисько. Удмурт дэрем дӥсясько — анаеным вераськисько. Чыртывесь дӥсясько — пересь анаеным кенешисько. Пельугы бырттӥсько — улонысь вазь кошкем сузэрме тодам вайисько. Мон оскисько: соос котьку мон палан, мыным кужым сёто. Алигес малпай: кыӵе умой, шорам нимын-тулын вазисько шуыса. Адямиос котьку атаелэсь нимзэ верало — Родион. Атае котьку монэн, бӧрсям сылэ, сыӵе бадӟым но кужмо. Со монэ уте. Со мынам удмурт семьяе. Со мынам выжыосы.

Лариса Марданова

Ангелина Снигирева
By Ангелина Снигирева Июль 19, 2019 09:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<