Одӥг нунал бурдъя быдэс арлы

Ангелина Снигирева
By Ангелина Снигирева Июль 10, 2019 10:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Инвожолэн берпуметӥ нуналъёсаз улон пӧзиз Татарстанысь Мамадыш ёросысь Пойкагуртын. Отын огезлэсь пӧртэм мукетыз трос тунсыко ужрадъёс ортчизы.

Чеберина А. Пислегова но Батыр М. Зиновьев

27-тӥ инвожое, кылсярысь, радъяськиз удмурт егитъёс понна «БиГерд» форум. Туэ со 3-тӥзэ ортчиз. Форум сӥземын вал удмурт егитъёс пӧлысь тужгес устооссэ шараянлы, быгатонлыкъёссэс волятонлы.
«БиГердэ» вуэм егитъёс 4 нунал ӵоже 3 ӧръёсъя тодон-валан люказы. Творчестволы сӥзем удысэ пыриськисьёс удмурт кырӟан-эктонъёсты дышетӥзы, асьсэос но кылбур-кырӟан кылдытыны тыршизы. Нош «Этноблогинг» ӧре пыриськисьёс тодматскизы ивор вӧлмытон амалъёсын. «Азьветлӥсьёс» отрядысь егитъёс дышетскизы калык понна ужрадъёс орчытъяны, проектъёс кылдытъяны. Форуме вуэм егитъёслы удалтӥз мукет бадӟым ужрадэ но пыриськыны: ӵап та гуртын ик 29-тӥ инвожое ортчиз Гыронбыдтон.
Озьы Пойкагуртэ люкаськизы Татарстанысь, озьы ик Россилэн мукет улосъёсысьтыз сюрслэсь ятыр удмуртъёс, мукет выжыысь калыкъёс. Куазь туж шулдыр тупаз та нуналэ. Ушъятэк кельтыны уг луы Татарстанысь удмуртъёсты — Гыронбыдтонэз радъясьёсты: праздниклы чаклам интыез туж чебер кариллям-радъяллям. Пойкагуртысь, со котырысь гуртъёсын улӥсьёс, эсьмаса, сое 3 толэзь ӵоже куасьмем вайёслэсь но жуг-жаглэсь сузяллям. Шур дурын ик вал 2 сцена дасямын, кыдёкын ик öвöл кибашлыослэн ужъёсынызы лавкаос интыямын, ошмес син вадьсы липет-корка ӝутэмын — отысь юзмыт вуэн котькудӥз сюзэ веськатыны быгатӥз. Палэнынгес тылскемын вал, отын ӝук пӧзьтӥзы, сое ашкала сямъя вӧсязы.

Фото: «Мамадыш ONLINE»

— Дышимы ни: Гыронбыдтон арысь аре выль интыын ортче. Но котькытын со огвыллем, одӥг сценарийя радъяськылӥз, шуыны луоз, — вера Татарстанысь удмуртъёслэн автономизылэн кивалтӥсезлэн юрттӥсез Марина Иванова. — Нош туэ милям та праздниклэсь концепцизэ быдэсак воштэммы потӥз. Туж иназ луиз Гыронбыдтонэз выль ёрослы — Мамадыш палъёслы — оскеммы. Угось та ёросын удмуртъёслэн огазеяськонзы 2016-тӥ арын гинэ кылдэмын ай, отчы пырисьёс выль мылкыдын басьтӥськизы та ужрад борды. Соин но, лэся, юмшанэз тунсыко, яркыт но туала шӧмо карыны быгатӥзы.
Зэм но, праздник туэ быдэсак мукет шӧмын ортчиз. Радъясьёс верамъя, туэ тужгес но бадӟым саклык висъяськиз егитъёслы. Юнме малпамын ӧй вал «БиГерд» форумез но Гыронбыдтон вакытэ ортчытыны — празднике тросгес егитъёс пыриськыны мед быгатозы. Со сяна, Гыронбыдтонэз ортчытон дыр но воштэмын вал: шулдыръяськон усьтӥськиз лымшор бере 3 часын. Озьы палэнысь куноослы, уйин ик сюрес вылэ потоно ӧз луы.
Гыронбыдтонэ люкаськемъёс чидатэк витизы Удмурт шаерысь куноосты — кырӟанъя но эктонъя «Айкай» театрысь, «Шулдыр ӝыт» ансамбльысь артистъёсты. Соос праздниклы кутскон сётӥзы, кырӟаса-эктыса калыклы капчи мылкыд кузьмазы. «БиГерд» форуме пыриськем егитъёс но бере ӧз кыле: зэмос артистъёс выллем ик кырӟазы-веразы. Калыклы ӟеч мылкыд сӥзизы Татарстанысь правительстволэн тӧроезлэн воштӥсез Лейла Фазлеева, та республикаысь удмуртъёслэн автономиенызы кивалтӥсь Андрей Герасимов но Мамадыш ёрослэн йырыз Анатолий Иванов. Нош «Удмурт Кенеш» огазеяськонлэн нимыныз ӟечкылаз та огазеяськонлэн одӥгез мыло-кыдо ёзчиез, «Айкай» театрлэн кивалтӥсез Пётр Данилов:

— Вашкала дырысен гырон-кизёнэз йылпумъянлы шумпотыса но Инмарлы тау карыса, солэсь кужым-берекет но ӟеч емыш курыса, асьмеос ӝук пӧзьтӥськом, вӧсяськиськом. Калыкын юнме уг шуо: Гыронбыдтон шулдыр ортче ке, ю-нянь удалтэ. Соин ик, асьмеос, удмуртъёс, та нуналэз туж шулдыр пумитаны тыршиськомы. Быдэс арлы шуныт но капчи мылкыдо мед луоз!
Шулдыр крезьгур чузъяськем улсын пӧртэм тунсыко шудонъёс, вожвылъяськонъёс ортчизы. Нимысьтыз инты висъямын вал удмурт шудонъёслы, пӧртэм киужъя мастер-классъёслы. Мыло-кыдоос асьсэ киосынызы пӧртэм арбериос кылдытыны дышетскизы.
Тужгес но тунсыко ортчизы «Чеберина» но «Батыр» вожвылъяськонъёс. Отчы пыриськисьёс азе чурыт курон пуктэмын вал — егит нылъёс но пиос бызьымтэ-кышнояськымтэ луыны кулэ. Уго вожвылъяськонлэн тужгес дуно кузьымъёсыз кускерттон но айшон луизы, вормисе потэмъёс соосты дӥсялозы асьсэлэн сюаназы.
Егитъёс асьсэ сярысь мадизы, кырӟаны-вераны быгатэмзэс возьматӥзы. Озьы конкурслэн финалаз потӥзы 6 нылъёс но 5 пиос. Таос пӧлын эшшо ӟырдыт вожвылъяськон радъяськиз. Нылъёс, удмурт дэремъёсын пӧрмытскыса, эктӥзы-ширъязы: огезлэсь пӧртэм мукетыз чебересь, веськресэсь, етӥзэсь. Эшшо возьматӥзы пельнянь кутыны быгатэмзэс, удмурт сям-йылолъёсты тодэмзэс. Пияшъёс но бере ӧз кыле. Пиосмурт ужез быдэстыны быгатэмзэс возьматӥзы, кортӵог шуккыса, озьы ик кужымзэс мертазы, егит нылъёсты ки вылазы нуллыса, бызьылыса. Эшшо ке пукыӵен но ыбылӥськизы, пу но вандӥзы.

Куно пумитан
Фото: Н. Михайлова

Тужгес но усто, етӥз луэмзэ возьматӥз Агрыз ёросысь Алина Пислегова. Со пусъемын «Чеберина-2019» нимен. Нош «Батыр» нимез утӥз Кукмор ёросысь Максим Зиновьев.
Гыронбыдтон йылпумъяськиз бадӟым салютэн но шулдыр дискотекаен. Гыронбыдтонын огкылэ вуэмын вал: вуоно арын та праздникез ортчытоно Агрыз ёросын.

Наталья Михайлова

Ангелина Снигирева
By Ангелина Снигирева Июль 10, 2019 10:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<