Нылпи хор, кечъёс, сяськаос…

Ангелина Снигирева
By Ангелина Снигирева 1 июля, 2019 10:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Марий Эл дораз ӧтчаз Приволжск федерал округе но фин-угор дуннее пырись улосъёсысь журналистъёсты. Оглом 30 пала газетчиос но электрон СМИ-осын ужасьёс люкаськылӥзы. 4 нунал ӵоже соос пор музъем вылысь пӧртэм предприятиосы вуылӥзы, калык шулдыръяськонъёсты адӟизы.

Брюгге набережной — Йошкар-Олаысь одӥгез чебер инты

Лулчеберетлэн пушъетэз

Куноослы Йошкар-Ола усьтӥськиз туж чебер концертэн — Эрик Сапаев нимо операя но балетъя театрлэн сцена вылаз потӥз нылпиослэн симфонической хорзы. Ог 400 нылъёслэн но пиослэн жильырась куараоссы зал тыр люкаськем учкисьёсты абдратӥзы — сокем чебер кылӥське! Огез бӧрсьы мукетыз чузъясько калык, нылпи, ож, классика кырӟанъёс — «Весёлый ветер», «Музыка звучит», «Детство — это я и ты», «О чём мечтают дети на планете». Пӧлаз пор гуръёс — «Тиде Марий Эл», «Марий Элем». Котькуд кырӟан бере кичабонъёс дугдыны уг валало. Хор кырӟан вискын сцена вылэ дырын-дырын потэ нылпиослэн симфонической оркестрзы — таяз 90 нылъёс но пиос.

Марий Элын улӥсьёс шуизы: нылпи хорлэн, оркестрлэн вордскемзы — республикаысь культуралэн выль шокчонэз, выль пушъетэз. Соиз но, таиз но ог ар талэсь азьло гинэ кылдытэмын.

— Матысь дыре учкисьёс азе потыны кулэ эшшо одӥг нылпи коллектив — калык инструментъёсъя симфонической оркестр, — концерт йылпумъяськем бере, журналистъёсын пумиськыкуз, вераз культурая, печатья но национальной политикая министр Константин Иванов. — Оглом та нылпи коллективъёсын 1 сюрс 500 нылъёс но пиос луозы. Соосты быдэс республикаысьтымы искусствоосъя школаосысь люкаськом.

Марий Элын культура берло дыре туж ӝутӥськыны кутскиз шуыса, вера соиз но: театре ветлӥсьёслэн лыдзыя со Россиын 4-тӥ интыын. Марий Элэз азьпалто Санкт-Петербург, Москва но Симферополь гинэ. Константин Иванов верамъя, кылсярысь, Эрик Сапаев нимо операя но балетъя театрысь залын буш интыос ноку уг луо — толалтэзэ билет шедьтыны шугъяськоно. Театр ӧсъёссэ уг ворсалля гужем но — та вакытэ но учкисьёслы уг ёрмы.

— Вуоно арын Марий Эл 100 ар тырмонзэ пусъёз, — азинтӥз веранзэ министр. — Таин валче туэ ик туж трос ужрадъёс ортчо ни — пӧртэм фестивальёс, концертъёс. Юбилеез пусъён азьын культура удыслы гинэ 700 миллион манет висъяны чакламын. Вылаз ик, тупаз Театрлэн арез, туэ пыӵатӥськыны кутскиз «Культура» национальной проект. Та чотын быдэсак выльдэмын Йошкар-Олаысь крезьгуръя училищелэн концерт залэз, С. Чавайн нимо национальной библиотека. Та вакытэ тыро-пыдо тупатъян ужъёс мыно
М. Шкетан нимо национальной театрын но культурая мукет учреждениосын.

Одӥг интыын — 3 сюрс 200 Маняос

Культураен ӵош Марий Элын юн азинске гурт удыс но, уката но — пудо, тылобурдо вордон. Берло дыре отын усьтӥськизы вал гид, ӟазегпи, ӵӧжпи будэтон фермаос. Отчы вайыло туристъёсты но.

Журналистъёслы уката кельшизы Сернур каргуртысь кечъёс! Йошкар-Олаысен та ёрос центрозь ог 90 иськем.

Сернуысь заводын 300 тонна сыр лэсьто

«Лукоз» агрохолдинг Марий Элын туннэ одӥгез бадӟымез, азинскисез луэ. Ӵыжак-выль фермаосын 3 сюрс 200 кечъёс бӧксо. 1 сюрс 200-эз — кысконо. Бордазы уло на ыжъёс — таосыз 600 йыр, пӧлысьтызы 400-эз йӧл сёто.

Возьматӥзы, кызьы кыско кечъёсты. Тамаша! Пӧлазы вань тушоосыз но туштэмъёсыз, сюроосыз но сюртэмъёсыз. Нош нимъёссы ваньзылэн — Маня! Кеч кыскисьёс ӧтё: Маня, толза, толза! (Маня, пыре, пыре!) Маняос кылзӥсько, кыскон интые пырыны черодэ султо. Озьыен, пор кылэз умой валало.

— Котькуд кечмылэн аслаз номерез, — валэктэ зоотехник Любовь Скобелева. — Номерзыя ик соосты тодмаськом. Шорлыдын суткаяз ог 3 килограмм йӧл сёто. Но пӧлазы вань 5-6 литрен шумпоттӥсьёсыз но.

Любовь Скобелева кема аръёс ӵоже скалъёсын ужам. Кечъёс доры ог 5 ар талэсь азьло выжем. Шуэ: кечъёсын, пе, ужаны трослы тунсыкогес.

— Уката но бусые потыны соосын умой, — шуэ специалист. — Тон бусы кузя мынӥськод — кечъёс сьӧрад, тэль дуре кожиськод — кечъёс сьӧрад. Скалъёс ведь сьӧре уг ветло, аслыд соос сьӧры бызьылоно луэ.

Кеч, ыж йӧлзэс «Лукозын» кытчы карыны уг ёрмо. Артэ — Сернурысь сырзавод. Соослэн кылдытӥсьсы но — одӥг мурт. Нырысь ферма пуктӥз, собере — сырзавод, бӧрысьгес кеч ферма усьтӥз на Татарстанын но.

— Та вакытлы сырзаводамы 240 мурт ужа, — вераз директорлэн производствоя воштӥсез Сергей Черных. — Поттӥськом кефир, нылпиослы сиёнъёс — варог, йогуртъёс но трос мукетсэ. Оглом суткаяз 120 тонна йӧлэз переработать кариськом.

Сыр кеч йӧллэсь лэсьто

Нуналаз ог 10 тоннаез йӧл, пе, сыр лэсьтыны кошке. Та ческыт сиёнэз соос 20 пумо лэсьто ни. Сое шедьтыны луэ Россиысь тросысьтыз улосъёсысь. Нош тодӥськоды-а, кӧня дыр кулэ сырлы кисьман понна? Ог 20 нуналысен 1 арозь. Со потэ сырлэн сортэз бордысь. Озьы Сернурысь сырзаводлэн нимысьтыз висъям складаз 8-14 градусын кисьма ог 300 тонна сыр.

Тӧдьысяськаослэн кунзы

Сернур туристъёсты гочатэ на А. Конаков нимо музей-комплексэныз. Отын кӧня ке пумо ёзъёсыз: одӥгез сӥземын поръёслэн улон-вылонзылы, мукетыз — пор музъемлэн инкуазезлы, куинетӥез — Сернур ёросысь ожгарчиослы…

Пӧлазы вань тодмо кылбурчилы Николай Заболоцкийлы (1903-1958) сӥземез но. Сернурын ӟуч поэтлэн пичи дырыз ортчиз.

В государстве ромашек,

у края,

Где ручей,

задыхаясь, поёт,

Пролежал бы всю ночь

до утра я,

Запрокинув лицо

в небосвод.

Тазьы бӧрысьгес гожтоз Николай Заболоцкий гольык пыд бызьылон вакытысьтыз интыос сярысь. Экскурсовод Татьяна Гусева верамъя, вуоно кылбурчи ӵапак та юртын дышетскем но — музейлэсь азьло отын школа вылэм.
Музее кылемын со вакытысь ик ӝажыос, ӝӧкъёс. Отын утисько Н. Заболоцкийлэн одӥгез печатлан машинкаез, книгаосыз, сигаретницаез.

— Татын ортчыло кылбурчилы сӥзем урокъёс, — вераз Татьяна Гусева. — Пиналъёс чернилаен гожъяськыса эскеро, революцилэсь азьло алфавитэн тодматско.

Нялтас вераса, республикаын дышетон удыслэсь азинскемзэ журналистъёс адӟыны-шӧдыны быгатӥзы, Марий Элысь Морка ёросысь Коркатовской лицее кожылыкузы. Со быдэс республикалы одӥг гинэ гурт лицей лыдъяське. Отын тодон-валан люкало 400 нылъёс но пиос, палэнысь лыктӥсьёслы интернат возё. Вань выпускникъёс лицей бере дышетсконзэс вылӥ дышетскон заведениосын азинто. Нимысьтыз саклык висъяське пиналъёслы патриотизм мылкыд пыӵатонлы. Ужа ёросысь Быдӟым тыложе пыриськемъёслы сӥзем музей. ОБЖ-я дышетӥсенызы Валерий Подбойкинэн ӵош пиналъёс бырем ожгарчиослэсь лысьӧмъёссэс утчанэн но выро. Экспедициос дыръя шедьтэм-люкам арбериосынызы табере музейысь вань ӝажыос тырмытэмын ни.

Татын дышетскиз Н. Заболоцкий кылбурчи

— Паймоно кадь, мон атаелэсь ожысь гожтэтсэ, 70 ар ортчыса, басьтӥ, — шуиз Валерий Подбойкин. — Фронтысь гожтэтъёс кулэ адресъёсъя кошкыса вуттӥллямтэ, сюриллям тушмон кие. Польшаысь ожгарчи соосты кайпалтэм, кема дыр ӵоже ватыса возем. Кулон азяз гинэ верам соос сярысь. Озьы со гожтэтъёс, сомында дыр ортчыса, почтальонъёс кие вуиллям…

Патриотизмез та школаын герӟало пор кылэз дышетонэн но. Музей быдэсак пор кылын радъямын. Пор кылъя урокъёс 11-тӥ классозь ик нуисько. Мукет предметъёсъя ЕГЭ, ОГЭ гожтыны со, пе, чик уг люкеты!

Город тыр эктӥзы, кырӟазы

Культурая, печатья но национальной политикая министрлэн воштӥсез Михаил Матвеев верамъя, Марий Элын улӥсьёс пӧлысь 41 процент палаез, ог 290 сюрс адями — поръёс. Данакез соос уло гуртъёсын. Эшшо ог 110 сюрсэз — мукет улосъёсын. Кылсярысь, Башкириын соос 18 сюрс, Свердловск улосын — 30 сюрс, Удмуртиын — 8 сюрс… Мари кылын пото газет-журналъёс, пор кылын уй но нунал вераське-возьматэ телерадиокомпания.

Поръёсты огазеяло калык шулдыръяськонъёс но. Одӥг нуналэ журналистъёс потазы Морка ёросысь Шоруньжа черкогуртэ «Суан пайрем» фестивале. (Со сярысь пыр-поч гожтӥм 20-тӥ инвожое потэм номерамы). Нош ӵуказе нуналаз республикалэн шоркараз Йошкар-Олаын возьмаз ни «Пеледыш пайрем». Пор кылысь берыктыса, «горд сяськалэн праздникез» шуэм луэ. Нырысьсэ со пусъемын вылэм 1920-тӥ арын — ас чеберзэ, кужымзэ ӧз ышты татчыозь.

Паськыт шулдыръяськонъёслы кутскон сётэ Йошкар-Олаысь валтӥсь ураметӥ — Ленин проспектэтӥ — ортчись кузь яркыт колонна. Ульча кузя мыно Марий Элысь вань ёросъёсысь делегациос. Соосын артэ — мукет улосъёсысь поръёс но. Кылсярысь, колоннаын тӧлъя лопыръяськиз Удмуртилэн куншетэз. Соин йӧно ортчизы Пичи Пурга ёросысь Иж-Бобья гуртысь поръёс. Шуизы: Удмуртиын улӥсь поръёслэсь Семык шулдыръяськонзэс радъянэ мыло-кыдо пыриським, со понна тау карыса, милемыз ыстӥзы татчы.

Поръёс урамъёс ыпотӥзы калык дӥськутэн

Колоннаын ортчисьёс кин мар каро: одӥгъёсыз тапырто-экто, мукетъёсыз пор гуръёсты мыто. Пужыё-пужыё дӥсьёссы синэз мальдыто. Ульчалэн мыд-мыд палаз сыло учкисьёс — пиналъёс анай-атайёсынызы, песятай-песянайёс… Быдэс Йошкар-Ола шока-данъяське кадь ас выжыосыныз, пор музъемлэн шоркарез луэменыз.

Колонна, ог 2 иськемез ортчыса, дугдӥз городлэн шораз, М. Шкетан нимо национальной театр азе. Татын люкаськем калыкез ӟечкылаз улослэн Тӧроез Александр Евстифеев.

— Мари музъем вылысь гурт удыс трос лэсьтэ элькунмылэсь экономиказэ ӝутон понна, гуртоослы вань маин данъяськыны, — пусйиз со. — Сиён-юон поттонъя республикамы Приволжск федерал округын 1-тӥ интыын, Россиын — 5-тӥын. Ваньмыз со потэ шаерамы улӥсьёслэн ужаны быгатэмзы, вордскем шаермес яратэмзы бордысь.

Быдэс нунал ӵоже Йошкар-Ола тыр чузъяськизы пор эктонъёс, кырӟанъёс, шудонъёс. Ужазы пӧртэм мастер-классъёс, радъяськизы вожвылъяськонъёс. Элькунысь котькуд ёрос усьтӥз аслэсьтыз азбарзэ — пырись-потӥсьёслы дэмлазы калык сиён-юонъёсты.

Ватсалом: Марий Элын гурт удысэн ӵош азинтӥське промышленность но. Отын вазен дырысен ужало ни бадӟымесь предприятиос. Кылсярысь, «Геникс» пичи гинэ цех кылдэм 1992-тӥ арын. Быдэс странаямы секыт вакытъёс шоры учкытэк, со пумен пушъем. Туннэ нуналлы та предприятилэн трос бадӟым цехъёсыз ни. 120 пумо мисьтаськон, дезинфицировать карись пӧртэм суретъёс потто. Нуналаз — 60 тонна. Суретъёссылы посуда но асьсэос ик лэсьто — толэзяз ог 700 сюрс. Вуз поттоназы куто ни туала куронъёслы тупась выль тӥрлыкез. 270 муртлы уж инты сёто. Вераны кулэ на: предприятилэн аслаз бадӟым лабораториез вань, вылӥ тодон-валанъёсын специалистъёс вуззылэсь ӟечлыксэ пыр-поч эскеро, со сяна, выль суретъёс кылдытон бордын ужало.

Ӵапак таӵе предприятиос Марий Эллэн бюджетаз налогъёс чотын уно коньдон пырто. Соос ик юртто калык понна бадӟымесь ужрадъёс ортчытъяны, спонсор кариськыса.

Малпанъёс быдэсмо!

Йошкар-Ола — пичи гинэ, туж шыпыт город. Семьяен поръяны, шутэтскыны интыос тачак. Транспорт ӵем уг ветлы — кулэлыкез но ӧвӧл, шӧдӥське. Асьсэос Йошкар-Олаын улӥсьёс шуо: ми город кузя пыдын гинэ ветлӥськом. Сюресъёс паськытэсь, коркаос писпуос пӧлы выемын, котыр чылк-чылк. Фотоаппаратэн ветлэммес синйылтыса, одӥг нылкышно вазиськиз: учкелэ ай, пе, та песянай шоры — оло, газетады гожтоды. Песянай флористын ужамын. 70 аресаз ас мылкыд каремезъя газонъёсты утялтэ, куакъёсты ӵышкыса возе… Малпан кылдэ: таӵе мыло-кыдо муртъёс татын одӥг гинэ ӧвӧл, угось быдэс городысь ик газонъёс утялтэмын.

Йӧшкар-Олаысь суредаськонъя национальной галерея

Йошкар-Олалэн одӥгез чебер интыез — Малая Кокша шур кузя интыяськем Брюгге набережнойзы. Кунгож сьӧры вуиськод кадь! Отысь юртъёс лэсьтэмын фламандской стилен — пичи башняос, шпильёс, котрес выло укноос… Ваньмыз та туж зол вӧлмемын вал Шор дауръёсы Европаын. Набережнойын улӥсьёс веразы: со юртъёсын квартираос висъямын бюджет удысын ужасьёслы.

Одӥгезлэн юртлэн балконаз «12 апостолъёс» час вань. Котькуд часлы быдэ отысь Иисус Христослэн фигураез потэ, со сьӧры — апостолъёс.

Огкылын вераса, та пичи гинэ городын мае учкыны вань. Мылкыд басьтэм сяна, оло, лушкем малпан но быдэсмоз. Угось отын вань «Йошкин кот» скульптуразы. Коӵышлэн пеляз лушкем малпандэ сипыртӥд ке, со, пе, одно быдэсмоз…

Элина Кумачёва

Туспуктэмъёсыз авторлэн

Ангелина Снигирева
By Ангелина Снигирева 1 июля, 2019 10:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<