Ми укыр оскисесь

Ангелина Снигирева
By Ангелина Снигирева Июль 8, 2019 15:18

Макем азинско технологиос, сокем амалогес луо пӧяськыса улӥсьёс. Соос калыкез алдало, картаосысь уксё лушкало. Жаляса верано, та учыръёслэн лыдзы нуналмысь будэ.

Лыдпусъёс кӧшкемато: туэ 6 толэзь куспын элькунамы лушкаськон учыръёс ваньзэ-ӧвӧлзэ 1 сюрс 600 учыр пусъемын. Со пӧлысь 753-ез герӟаськемын калыклэн картаосысь уксё лушканэн. Тужгес но трос учыр шараямын Ижын — 380-лэсь ятыр. Кылем арен ӵошатыса, та лыдпус 40 процентлы йылэмын. Кин ке кӧня ке сюрс манетсэ гинэ ыштэм, мукетыз 100-200 сюрс манетлэсь ятырлы куанерме.
Электрон амалъёсты кутыса картаысь лушкаськон понна кыл кутон чакламын Уголовной кодекслэн 158 номеро статьяысьтыз 3-тӥ люкетысьтыз «г» пунктъя. Но ваньбурез яке уксё пуйыез лушкасез шедьтыны кызьы ке пӧрмытод ай — адӟисьёс но, оло, шедёзы, чиньы пытьыосыз но кылёзы. Нош электрон амалэн талам коньдонэз но, лушкаськисез но шедьтыны туж секыт. Кылем арын, кылсярысь, картаез бушатон учыръёс пӧлысь шараямын вал 26 процентэз гинэ. Лушкаськисьёс шедьтэмын но кыл кутонэ кыскемын вал ке но, ваньмаз сямен ик учыръёсы талам уксёез берыктыны ӧз пӧрмы ни.

— Кылем арын ӝегатэмын вал Батуев нимтулэн лушкаськись, — вера элькунысьтымы Югдурез утёнъя министерствоысь уголовной розыскъя управленилэн кивалтӥсезлэн воштӥсез Николай Никонов. — 80-лэсь ятыр картаосты бушатэм. Ачиз со чылкак мукет улосын улэ ке но, ки улаз шедемъёс пӧлысь уноез — элькунысьтымы. Солэсь юаськом: нош малы лушкаськыны Удмуртиез бырйид? Мукет улосъёсын, пе, 10 муртлы жингыртод — оскоз 2-ез гинэ, нош Удмуртиын — 10 пӧлысь 8-эз. Зэм но, калыкмы асьмелэн оскись. Кызьы гинэ ум валэктӥське — лушкаськисьёслэн куриказы шедисьёс уг кулэсмо. СМИ-ос пыр но ивор сётӥськомы, общественной транспортын но ялон сётъяськомы, коньдон грамоталы сӥзем дышетонъёс но радъяськомы — пайдаез уг шӧдӥськы.
Мошенникъёсын нюръяськон вылысь элькунысьтымы Национальной банк, озьы ик Югдурез утёнъя министерство толэзьлы быдэ сямен радъяло котрес ӝӧкъёс. Отчы ӧтчало банкъёсысь муртъёсты, калык огазеяськонъёсы пырисьёсты. Огазе кариськыса, соос кенешо, кызьы мошенникъёсын нюръяськоно.
Николай Никонов пусъемъя, лушкаськон учыръёсты сэрттыны-пертчыны секыт соин но: уноез банкъёс Югдурез утёнъя министерствоен электрон амалэн кусып уг возё. Таӵе огкыл кутэмын Сбербанклэн Удмурт ёзэныз гинэ.

— Озьы Сбербанклэн картаысьтыз лушкаськон учыр шараяське ке, ми соку ик Интернет пыр банкын ужасьёсын герӟаськиськом, адямилэн картаезъя но уксёезлэсь кытчы кошкемезъя документъёс куриськом. Озьы, чик ӝегатскытэк, лушкаськонэз сэрттон-пертчон борды басьтӥськиськом. Валамон, та учырын мошенникъёслэсь пытьызэс шедьтыны капчигес но ӝоггес. Нош мукет банкъёслы запросъёс гожтоно, кулэ луись документъёсты шедьтозы 30 нуналлэсь кема ортче, — шуэ Н. Никонов.
Но югдур воштӥськыны кулэ. Кемалась ик ӧвӧл радъяськем котрес ӝӧк сьӧрын пӧртэм банкъёслэн оскем муртъёссы огкылэ вуизы: Югдурез утёнъя министерствоен кусыпъёссэс юнматоно, кулэ луись документъёсты электрон амалэн келялляно. Со сяна, соос оскытӥзы транзакциосты (уксёлэсь кытчы кошкемзэ) эшшо но золгес чакланы, ватсаса фильтръёс пуктыны. Та ужрадъёслэн пайдазы шӧдӥськыны кулэ ни июле ик. Со сяна, туэ 1-тӥ апреле Югдурез утёнъя министерствоын, ватсаса кылдытэмын мошенникъёсты шараянъя нимысьтыз группа. Озьыен, лушкаськон учыръёс ӝоггес сэрттӥськозы.
Таос борды итӥськиз элькунысьтымы Национальной банк но. Отысь специалистъёс пӧртэм огазеяськонъёсы вуыло, калыклы валэкто, кызьы утиськоно лушкаськисьёслэсь. Матысь дыре соос потаны чаклало ёросъёсы но, гуртъёсын угось валэктон уж лябгес радъямын.


Визь-кенеш
Уть кисыдэ
Кызьы утёно коньдон возён картаосты лушкаськисьёслэсь? Кыӵе учыръёсы сак кариськоно? Та сярысь вера Югдурез утёнъя министерствоысь уголовной розыскъя управленилэн 5-тӥ ёзэныз кивалтӥсьлэн воштӥсез Михаил Гуляев.

1-тӥез амал: банкын ужась.
Картаысь лушкаськон учыръёс пӧлысь 70 процентэз та сценарийя радъясько.
Адямилэн телефоназ жингырто, шуо: тӥледлы жингыртэ банкын ужась, кин ке картаысьтыды уксёдэс лушканы выре. Адями куалектэ, телефон пыр мар верамзэ уг чакла ни. «Банкын ужась» азинтэ: коньдондэс лушканы медаз быгатэ шуыса, али ик, вань картаостыя даннойёстэс выльдоно. Программа выль сямен ужаны кутскоз, лушкаськисьёс сое тӥяны уз быгатэ. Адямиез вераны косо картаез номеръёссэ, мышпалысьтыз 3 лыдпуссэ (СVC-код), озьы ик телефоназ СМС-эн пыр вуэм лыдпусъёсты. Банкын ужасьёс соосты ноку но юаны кулэ ӧвӧл шуыса верамдылы но пӧечиос шуозы: ми соосты ум кылӥське ук, тӥ роботлы-автоматлы вераськоды. Нош телефонын зэмзэ но автоинформатор вераськыны кутске: сигнал чузъяськем бере, пе, вералэ лыдпусъёстэс. Адями нош ик оске, куалектэм кабеныз вань лыдпусъёссэс вера. Нош лушкаськисьёслы та ик кулэ.
Мукет дыръя адямиез оскытыны выро: банк пуктэмъя, кредитной картадыя тыриськондэс та толэзе тырытэк но быгатӥськоды яке проценттэк вакытэз 50 нунал интые, 120, пе, луоз но трос мукет та выллем. Эшшо ке ӵектозы мобильник вылысь телефон номерзэс чакланы: учке ай, пе, банклэн картады вылэ пусъем номерез милямезлы тупа, малы уд оскиське? Одӥг лыдпусэз ке но пӧртэм луоз — абдрам адями тае уз ик синйылты. Мошенникъёс угось куто IP-телефония амалэз: телефонэ жингыртыны быгато Интернет пыр дуннелэн пӧртэм сэрегысьтыз.
М. Гуляев верамъя, тазьы жингыртӥсьёслы оске 90 процентэз калык. Но куд-огез умойтэмзэ валаны кутске, телефон пыр вераськыкуз ик. Тани кемалась ик ӧвӧл Ижысь нылкышнолы жингыртӥллям, картаезлэсь номерзэ куриллям. Таид вераны ымзэ усьтэм ик вылэм ни но, «сотрудниклэн» «Ижкомбанк» кылэз шенгыль-пенгыль верамез пельзэ вандэм. Валам, та — мошенникъёс. Озьы солэн уксёез утиськем.

2-тӥез амал: ялонъёсын сайтъёс.
Лушкаськонъёс пӧлысь таосыз 20 процентсэ басьто. Пӧечиос телефон номеръёсты шедьто ялонъёсын сайтъёс пыр. Созэ я тазэ вузэз басьтэммы потэ шуыса, адямилы жингырто, мукетызлы, пе, медад вузалэ — предоплата келяломы. Со понна куро адямилэн картаезлэсь номерзэ, кодъёссэ. Банкысь сотрудниклы гинэ ӧвӧл, нокинлы но вераны уг яра картаедлэсь номеръёссэ-кодъёссэ.

3-тӥез амал: социальной сетьёс.
Уксё талан учыръёс пӧлын таосыз 3 процент лыдъясько.
Алдаськисьёс адямилэсь социальной сетьёсысь аккаунтъёссэ (нимаз бамъёссэ) тӥяло но солэн нимыныз эшъёсызлы гожтэтъёс келяло: секыт югдуре шеди, келя вал картаям уксё яке мукет та выллем. Таяз учырын но тодыны турттозы юрттыны дась луэм муртлэсь даннойёссэ, картаоссэ.
Таӵе ик югдур Viber, WhatsApp сетьёсын — отын но пӧртэм ивортонъёс вуыны быгатозы. Тодмотэм ссылкаосты зӥбылоно ӧвӧл. Озьы ик осконо ӧвӧл пӧртэм конкурсъёсын вормисе потэмды сярысь ивортонъёслы, пыриськоно ӧвӧл юалляськонъёсы (опрос). Эн вунэтэ телефонысьтыды антивирусной программазэ выльдылыны. Угось лушкаськонъёс пӧлысь 1 процентэз герӟаськемын телефонэ вирусэн программаосты пуктонэн. Адями соосты скачивать каре но — телефонэныз герӟам картаосыз, счётъёсыз лушкаськисьёслы адӟиськыны кутско.

Елена Никитина

Ангелина Снигирева
By Ангелина Снигирева Июль 8, 2019 15:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<