Кылыз лэчыт, сямыз лякыт…

Ангелина Снигирева
By Ангелина Снигирева 15 июля, 2019 16:43

Туэ «Удмуртия» издательствоын потӥз Анатолий Уваровлэн «Тон эн усьы ӝоже» кылбур бичетэз. Соин тодматскон ортчиз 20-тӥ июне Ижысь Некрасов нимо библиотекаын.

А. Уваровез тодэ вайтӥзы Ижысь Н. Некрасов нимо библиотекаын
Фото: Н. Некрасов нимо библиотекалэн «ВКонтакте» бамысьтыз

Чуръёсыз уг вужмо
Анатолий Уваров (1933-2005) — удмурт кылбурчи но литературовед, филология наукаосъя кандидат. Со УдГУ-ысь историко-филологической факультетын дышетскиз, 1972-тӥ арын литературая Горький нимо институтын аспирантураез йылпумъяз.
Анатолий Николаевич тодосчи, переводчик, корреспондент, журналист луыса ужаз. Ас кожаз мадьяр кылэз дышетӥз, та кылысь трос произедениосты берыктылӥз. Со сяна, мукет фин-угор авторъёслэсь но Гётелэсь, Гейнелэсь, Байронлэсь кылубръёссэс, «Слово о полку Игореве» произведениез но «Калевала» фин эпосэз «удмуртомытӥз». Аслаз чуръёсыз мадьяр, поляк, фин, англи, итальян, бигер, чуваш, коми, пор, мордва но мукет кылъёсы берыктэмын.
А. Уваров эскериз удмурт литературась юморез но сатираез. «Художественное своеобразие удмуртской сатиры» книгаез 1979-тӥ арын потӥз. Со сяна, ачиз но быгатыса юмористической но сатирической произведениос гожъяз. Аслаз серемес но визьмо басняосаз пышкылӥз адями шекъёсты: вылтӥяськемез, азьтэмъяськемез, мынчыръяськемез но мукетъёссэ.
Улытозяз А. Уваровлэн кылбуръёсыныз удмурт кылын 3 кылбур бичет потӥз: «Вуом али» (1969), «Кык пол кык — вить» (1980), «Эхма!» (1991). Та бичетъёсысь устооссэ кылбуръёсты бырйыса, «Удмуртия» издательство лыдӟисьёсты выль книгаен шумпоттӥз. Ужлэн кичӧлтӥсез — А. Уваровлэн Иван Анатольевич пиез, медицина наукаосъя доктор.
«Удмуртия» издательстволэн кивалтӥсез Юрий Кузнецов верамъя, Анатолий Уваровлэн кылбуръёсыз сюлме бинятлӥсько, тросэз кылбуръёсыз туала вакытлы но тупало. Со тау кариз Удмуртиысь Национальной библиотекаысь ужасьёслы книгаез поттыны юрттэмзы понна. Издательстволэн архиваз А. Уваровлэн книгаосыз кылиллямтэ, соин библиотекаысь ужасьёс книгаоссэ сканировать кариллям. Котькуд гожъяськисьлэн бадӟым шумпотонэз — куке солэсь книгаоссэ нылпиосыз, нунокъёсыз лыдӟо, пусйиз Юрий Васильевич.

Сюлмыз кыскиз дор палъёсаз

Ужрадэ вуылӥз культурая министр Владимир Соловьёв. Соос Анатолий Николаевичен кыкназы ик — алнаш пиос.
А. Уваров — удмурт литературалэн классикез, со дыре ик со асьме вакытысь адями, — вераз В. Соловьёв. — Классикъёслэсь произведениоссэс выльысен печатласа, асьмеос соос сярысь егитъёслы тодазы вайытӥськом, ӟеч литератураен соосты тунсыкъяськытӥськом. Соин ик та книга элькунмылэн литературной улоназ бадӟым инты басьтэ.
В. Соловьёв тодаз вайиз, макем паймымон, ваньзэ быгатӥсь но со дыре ик востэм, лякыт адями вал А. Уваров. Со, пе, ноку алнаш палъёссэ ӧз вунэтылы, ялан дораз бертылӥз, татын ортчись пӧртэм ужрадъёсы, юбилейёсы мылысь-кыдысь пыриськылӥз, алнаш калыкен котьку кусып возиз.
Алнаш ёросысь культурая юртэн кивалтыкум, Сям-Каксяысь культурая юртын А. Уваровлэн юбилеезлы сӥзем бадӟым ӝыт ортчиз, — тодаз вайиз В. Соловьёв. — Соку Николай Постников крезьгурчиен нырысьсэ быдэстӥм Анатолий Николаевичлэн чуръёсызъя гожтэм «Тыпылэсь меда» кырӟанэз. Со али но ӧз вужмы, зэмос воргоронлэн гимнэз луэ.
Культурая министр «Тыпылэсь меда» кырӟанысь оглюкетсэ кырӟаса лэзиз. В. Соловьёв верамъя, алнаш музъем вылын трос дано муртъёс вордӥськемын. Ми быгатӥськом аспал муртъёсынымы данъяськыны, пусйиз министр.
А. Уваровез озьы ик шунытэн тодаз вайиз литературовед, филология наукаосъя доктор Анна Зуева-Измайлова. Со мадиз, кызьы Анатолий Николаевич кандидатской ужез бордын тыршиз: шуг-секытъёс шоры учкытэк, котьку гань-гань, керӟегъяськытэк. А. Уваров удмурт сатираез эскерем бере мукет национальной литератураосын но сатира борды басьтӥськиллям. А. Зуева-Измайлова пусйиз: Анатолий Николаевичлэн сатиралы сӥзем книгаез ноку уз вужмы, угось со возьматэ, мае серекъяло но дунъяло вал удмуртъёс азьло но али. Сое лыдӟыса, валаськод: али но азьтэм, кылзэс кутыны быгатӥсьтэм, кырсь улӥсь муртъёсты курлало, нош дунъяло ужась, тыршись, йӧно адямиосты. Со вань калыкъёслы но вань вакытъёслы тупа.
Мон пайми но шумпотӥ книгалэн нимызлы, — вераз А. Зуева. — Со асьмелы сӥзён кадь: луэ шудо, котькуд нуналлы шумпотэ.
Писателез озьы ик тодэ вайытӥзы Алла Шутова — Ижысь промышленно-экономической колледжлэн (азьвыл 13 номеро ремесленной училище) историезлы сӥзем музеен кивалтӥсь. А. Уваров та колледжын куке но ужам. Со но пусйиз А. Уваровлэсь лякыт, востэм луэмзэ, адямиез дунъяны, тау карыны быгатэмзэ.
Ужрадын А. Уваровлэн чуръёсыз чузъяськизы: кылбуръёссэ лыдӟизы Удмуртиысь культурая элькун колледжысь дышетскисьёс — вуоно библиотекарьёс.

Анастасия Шумилова

Ангелина Снигирева
By Ангелина Снигирева 15 июля, 2019 16:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<