Кылбур дышето быдэс семьяен

Ангелина Снигирева
By Ангелина Снигирева Июль 10, 2019 09:35

Ижысь Кузебай Герд нимо нылпи садысь воспитатель Татьяна Чурина — тэк пуконэз валасьтэм адями. Пиналъёсты визьнодась сяна, со ачиз ик режиссёр но, суредась но, актёр но.

К. Герд нимо гимназиын
Фото: Е. Скворцова

Нылпиосын ужалоз шуыса, Татьяна Владимировналэн йыраз но ӧй вал. Уго Удмурт кун университетысь удмурт филологияя факультетэз йылпумъякуз, егит муртлы ӵектӥзы литературая кафедрае кыльыны, татын стажёр луыса ужаны. Но наука удысын уксёен котьку но ӝикыт. Озьы ватсаса пайда поттон вылысь егит тодосчи ялонъёсын газетэз кутӥз: Ижысь 288-тӥ нылпи садэ воспитатель кулэ, пе. Пиналъёсын ужаны мыныкуз, Татьяналэн кӧберанэз ик ӧй вал. Нош группае вуиз но — бӧрдонэз ым пумаз!
Бадӟым группаысь пиналъёс юр-яр потто, егит муртлэсь верамзэ уг кыло. Татьяна Владимировна мар карыны ик пайме. Собере бӧрдон вӧзы мукет малпан каръяськиз: иське, мон пиналъёсты уг яратӥськы, соосын ужаны уг пӧрмытӥськы бере. Бускель группаысь воспитатель доры пырыса бӧрдылӥз, пиналъёс уг кылзӥсько шуыса.

— Туж бадӟым тау со визьнодасьлы — Ирина Ильиничналы, пиналъёсты пуктыса, гань-гань вераське вал соосын, валэктэ, егит воспитателен асьтэ озьы возьыны уг яра шуыса, — тодаз вае Татьяна Чурина.

Собере нылпи садлэн кивалтӥсез но туж валась вылэм. Татьяналэсь ужысь кошкон сярысь малпанзэ валаса, покчи группаез оскиз, ӵош ужаны ӟеч эш шедьтӥз. Озьы егит специалистлы котыр ласянь визь-нод сётӥсь луиз мукетыз воспитатель Надежда Фефилова. Нуналысь нуналэ пинал визьнодасьлэн аслыз осконэз будӥз, ужаны капчи мылкыдын вуылӥз.
2011-тӥ арын Татьяна Владимировна Кузебай Герд нимо нылпи садэ ужаны выжиз. Татын но удалтӥз ӵош ужась эшен. Надежда Соловьёва воспитателен ӵош малпазы «Чингыли» группаязы семьяосын валче ужаны.

— Туала анай-атайёс тросэз малпало, пиналэз нылпи садын ваньмызлы воспитательёс дышетыны кулэ шуыса. Собере школа, пе, озьы ик визьманы кулэ. Нош улон али мукет куронъёс пуктэ. Соин анай-атай, пинал но визьнодась одӥг сюрес кузя ӵош мыныны кулэ, — малпанзэ шарая Татьяна Чурина.
Озьы покчи группаысен ик пиналъёс но анай-атайёс пӧртэм ужрадъёсы ӵош пырисько. Воспитатель ачиз ик ӝытлы сценарий малпа. Татын трос вылез но тунсыкоез. Кылсярысь, нылпиос азьлапал одно удмурт кылын выжыкыл дасяло, со ужзэс видеое пукто. Собере та выжыкылэз анай-атайёсынызы ӵош учко. Нош макем шумпото покчиос, асьсэды «бадӟым экранысь» адӟо ке!
Городысь мукет нылпи садъёсын сямен татын Тол бабаез дун тырыса уг ӧтё. Асьсэлэсь быгатонлыкъёссэс возьмато атайёс. Сценарийысь мукет рольёсты шудыны но мумы-бубыос ик вожвылъясько. Нош макем воштӥське Татьяна Владимировна, бакча сульдэрлы яке индеецлы пӧрмытске ке. Нылпиос шумпотыса чир! кесясько, горо, лӧптыло.

Татьяна Владимировналэн котьку но выль малпанъёсыз: нылпиосын киуж-а лэсьтоно, ужрад-а ортчытоно. Солэн сыӵе пӧзись мылкыдыз мукетъёслы но палаське. Эшшо воспитательмы котькуд нылпилэсь быгатонлыксэ адӟе, аслэсьтыз ӵектонъёссэ вера, котькуд мумы-бубылы нимысьтыз саклык висъя, — шуэ огез анай Ольга Бикузина.
Нимысьтыз ватсано на: удмурт кылэз дышетон Кузебай Герд нимо садын нуналысь нуналэ мынэ, удмурт кылъя дышетӥсь гинэ та уж понна уг сюлмаськы. Тани Татьяна Чуриналэн группаяз 28 нылпи. Со пӧлысь ог 5-ез удмурт кылын верасько, тросэз валало гинэ, нош 6 пиналлэн удмурт выжыез ӧвӧл. Озьы ке но мумы-бубызы удмурт кылэз дышетонлы уг пумитъясько. Тани 3 ар ӵоже садэ ветлӥсь нылпиос удмурт кылэз ӟеч валало ни. Уго огшоры улонын кутӥськись вань куронъёсты но воспитатель удмурт кылын вера. Шудыны пото ке — «пуксе, дӥсяське», косэ воспитатель. Кырысь пыро ке – «кылиське, кидэс миське». Со муген котькуд ужрадын удмурт сямен кылбур вераны яке кырӟаны мылкыд каро ваньмыз пиналъёс.

— Куддыръя тазьы но луэ: таш-таш удмурт семьяысь пиналъёслы кылбур сётӥськом дышетыны, нош семьяяз я вунэто, я кулэ уг каро. Нош ӟуч семьяын та косонэз ик гижысь-пиньысь быдэсто. Группаямы вань Евсеев Платон. Анаез солэн чылкак ӟуч, нош атаез Киров улосысь удмурт. Кыӵе соос сюлмасько удмурт кыл понна. Удмурт кырӟан яке кылбур сётӥськом ке, быдэс семьяен дышетӥськом-кырӟаськом шуо. Платонлэн яратоно эктонэз но удмурт тапыртон, пе, — вера Татьяна Чурина.
Тэшкылиослэсь удмурт кылын тунсыкъяськонзэс кужмоятон понна воспитательёс ӵектӥзы нылпиослы удмурт дӥсь вурыны. Дэремъёссэс нылъёс но, пиос но туж шумпотыса дӥсяло группаын пӧртэм ужрадъёс дыръя но, нылпи садэ куноос вуыку но. Калык дӥсь манеръя пӧрмытскем пиналъёссэс адӟыса уката шумпото асьсэос мумы-бубыос но.
Оскем потэ, таӵе визьнодась дорысь потозы удмурт кылэз гажась, сое азьланяз но дышетыны мылкыд карись пиналъёс.

Алёна Ионина

Ангелина Снигирева
By Ангелина Снигирева Июль 10, 2019 09:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<