Кызьы ЕГЭ-ын 100 балл люкано?

Ангелина Снигирева
By Ангелина Снигирева 2 июля, 2019 16:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт Элькунлэн Тӧроезлэн резиденцияз 38 выпускниклы медаль сётӥзы. Школаез йылумъям егитъёс Удмуртиысь вылӥ дышетскон заведениосы пырыны малпало, азьланяз но, пе, асьме элькунамы ужаломы.

А. Бречалов Якшур-Бӧдьялась Анна Главатскихез
Фото: udmurt.ru

Туэ Удмуртиын 6 сюрс 953 адями школаез йылпумъяз, соос пӧлысь 512-ез усто дышетскемез понна медаль басьтӥз.
Александр Бречалов егитъёслы, дышетӥсьёссылы, анай-атайёссылы тау кариз:

— Ми котьку мынӥськомы азьлань. Соин ик азьланяз тӥляд юрттэтты милемлы туж иназ луоз. Элькунмылы зэмос профессионалъёс туж кулэ. Оскисько, кусыпъёсмес возёмы шуыса, мон котьку дась тӥленыды вераськыны. Улонады ваньмыз мед удалтоз, эн кышкалэ янгышъёс лэсьтыны, кышкалэ мар ке борды басьтӥськытэк кыльыны. Азяды быдӟым ужпумъёс пуктылэ!
Кылем арын усто дышетскемзы понна медаль басьтэм но 100 баллы экзаменъёссэс сётэм нылпиос пӧлысь 232-ез элькунысьтымы ик вылӥ дышетскон интыосы пыризы вал.
Туэ, ЕГЭ сётыса, 48 адями 100 балл люказ.

— Тужгес но висъяме потэ Якшур-Бӧдьяысь ляб адӟись нылпиослэн школа-интернатысьтызы Анна Главатскихез, — ушъяз Александр Бречалов. — Мукетъёсыныз ӵошатыса, Анналы экзаменъёс секытгес сётӥськизы ке но, со литератураен ЕГЭ-зэ 100 баллы сётӥз.
Ачиз Аня Кезысь. Дышетӥсьёсыз пусъё мыло-кыдо, котьмаин тунсыкъяськись луэмзэ. 1-тӥ классэ вуэмез бере ик нылаш ӵош дышетскись эшъёсызлэсь чебер вераськыны быгатэменыз, узыр кылтӥрлыкеныз зол висъяськиз. Покчи классъёсын дышетскыкуз, дышетӥсез Анна Алексеевна Широбокова кылбураны быгатэмзэ синйылтӥз. Кезын Анялэн кылбур бичетэз но потӥз.
Бадӟым классъёсын ини нылаш пӧртэм вожвылъяськонъёсы пыриськыны кутскиз: кылбуръёсты, чеберлыко произведениосысь люкетъёсты шара лыдӟылӥз. «Живая классика» конкурсэ ветлэмез бере сое районын но, элькунамы но тодӥзы ини. Озьы со Парадельфиской шудонъёсы но пыриськиз, кылбур лыдӟисьёс пӧлын вормисе ӧз ке но поты, ассэ умой возьматӥз. Кема ассэ пӧртэм удысъёсын эскериз: математикаен, информатикаен тунсыкъяськылӥз, куасэн бызьылонъя ӵошатсконъёсы пыриськылӥз. Пумен валаз, сюлэмызъя литература но ӟуч кыл ик шуыса.

— Али Анялэн мылкыдыз бурдъяськемын, — вера дышетӥсез Надежда Геннадьевна Поздеева. — 100 балл — со котьку но бадӟым шумпотон, Анялэсь ужаны, тыршыны быгатэмзэ тодыса, таӵе вылӥ лыдпуслы ми ӧм пайме. Мон, арлыдо адями, абдрасько солэн визьмо, рос-прос луэмезлы, со быгатэ нуналлы но, кыдёке азьланезлы но ужпумъёс пуктыны, пӧртэм ужъёс пӧлысь солы кулэ луисьёссэ бырйыны.
Анай-атаез Анялы зол юртто, нылзы понна сюлмасько. Вордӥськем дырысеныз ик нылашлэн синъёсыз уг адӟо, югыт тылэз шӧдо ке но. Эмчиос кемалась шуизы ни, синмыз уз тупатскы шуыса, но анай-атаез вань луонлыкъёс борды ӝабырско, нылзылы юрттэт шедёз на, оско.

— Аняен ми трос вераськылӥмы, — шуиз Надежда Геннадьевна. — Автобусын мыныкум, пе, калыклэсь «учкы, со синтэм» верамзэ кылыны туж вӧсь луэ вал. Но берло Аня аслыз йыг-йыг шуиз: «Ӵок, мон уг адӟиськы шуыса, ваньзэ быгато. Ачим ке ӧй, кин мон сярысь сюлмаськоз». Со вакытысен Аня котьмае ачиз, юрттэт курытэк, лэсьтыны тырше. Ульчпетӥ бодыен ветлэ.
Урод адӟись адямиослы вузъёсы интыяськыны секыт. Аня кема малпаськиз, утчаськиз, кытын дышетсконзэ азьланьтоз. Глазовысь педагогической институтэз социальной коммуникациосъя но кылосбуръя факульетэз бырйиз.
Нош Ижысь Кузебай Герд нимо гимназиез йылпумъям Никита Голубков. Москваын дышетскыны малпа. Информатикаен экзамензэ 100 баллы сётӥз, математикаен 98 балл люканы быгатӥз, нош ӟуч кылъя гожтэм экзаменэз пияшлы 96 балл вайиз.
Кузебай Герд нимо гимназие пияш Пичи Пурга ёросысь Кечол школаез йылпумъямез бере дышетскыны пыриз.

— Котькыӵе предметэн ЕГЭ сётоно луысал ке, Никита ваньмаз 90-лэсь трос балл басьтысал, — вера дышетӥсез Глафира Леонидовна Черепанова. — ЕГЭ-ын люкам баллъёсыныз со тодон-валанзэ возьматӥз. Яратэ дышетскыны, ваньмыз борды рос-прос басьтӥське, тодэ, мар солы азьланяз кулэ.
Пияшлэн одӥг уроксэ но кельтэмез ӧй вал, ӟеч оценка озьы дуриз.

— Информатикаен экзаменэ мынӥськомы, — азьланьтэ Глафира Леонидовна, — юасько Никиталэсь: мае уд тодӥськы? Нош со пумитам: Ваньзэ тодӥсько кадь, тодмотэм темаосы ӧвӧл. Тӥни 100 балл люказ. Математикаен экзаменысь потэмез бере. 14-тӥ заданиысь формулаез тодам вайыны ӧй быгаты, пе, 2 балл, дыр, уз тырмы. Озьы ик луиз. Со ваньзэ вала, лыдъя, тодэ.
Никиталэн программист луэмез потэ.

— ЕГЭ умой сётон понна, — шуэ пияш, — репетиторъёс доры вазиськыны ӧвӧл кышкано, соос туж юртто. Но одно ик аслад тодон-валан борды кыстӥськоно, тыршоно.
Никиталэн семьяез бадӟым. Агаез Вадим Голубков озьы ик Кузебай Герд нимо гимназиез медален йылпумъяз. Ижкарысь М. Калашников нимо технической университетэз быдтӥз но табере Москваын магистратураын проектировщиклы дышетске. Эшшо 2 вынзы вань на. Никита соос понна но сюлмаське, музыкальной яке спортивной школае, пе, сётоно пичиоссэ, мед котыр ласянь быгатонлыкъёссэс будэтозы.

Мария Емельянова

Ангелина Снигирева
By Ангелина Снигирева 2 июля, 2019 16:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<