Крезьгуртэк гужем мӧзмыт

Ангелина Снигирева
By Ангелина Снигирева Июль 8, 2019 15:28

13-тӥ сентябрёзь Ижын ортче «Крезьгур — гужем» фестиваль. Та дыр ӵоже Удмурт кун филармониысь коллективъёс 5 интыын ог 50 концерт возьматозы.

Филармонилэн директорез Алексей Фомин верамъя, азьвыл аръёсы гужем филармониын чус вал, артистъёс сцена вылэ ӧз поталлялэ. Но крезьгурез яратӥсьёслэн гужем но концертъёсы ветлэмзы потэ.
Соин 2015-тӥ арын филармония вӧзы шатёр пуктӥзы, отын Москваысь филармониын ортчись концертъёсты онлайн учкыны-кылзыны луэ вал. 2016-тӥ арын концертъёс Шор площадьысь сцена вылын ортчизы. Отчы трос гинэ кылзӥсьёс вуизы. Соин туэ бадӟым фестиваль радъямын вал, филармониысь вань коллективъёсты уже кыскемын. Фестивалез вуоно аръёсы но ортчытъяны чаклало.
Концертъёс филармонилэн залаз ортчизы ини, азьланяз соос «Столица» вуз карон центрын, филармония вӧзысь шатёрын, Киров нимо паркысь фан-зонаын но Правительстволэн юртэз сьӧрысь ротондаын луозы. Ротондаын концертъёс бере арлыдоослы эктон ӝытъёс ортчылозы. Троссэ концертъёсы дунтэк кылзыны луэ, филармоние но фан-зонае пырон понна кӧня ке манет тыроно луоз.
Фан-зонаын фестиваль ужзэ мытоз удмурт коллективъёслэн концертэнызы. 8-тӥ июле калыкез шулдыртозы «Шулдыр ӝыт», «Италмас» но «Танок» ансамбльёс (0+). Джаз крезьгурез яратӥсьёсты возьмало 11-тӥ пӧсьтолэзе IzhJuzzNight концертэ (18+). Отчы пыриськоз Казаньысь тодмо саксофонист Сергей Васильев. Концерт бере уйшорозь эктыны луоз. Фан-зонаын ик ортчоз пиналъёслы опен-эйр (0+). «Бременские музыканты» выжыкылэз учкыны луоз «Золотая мелодия» оркестрлэн шудэмез улсын.
Вань площадкаосын капчи, шулдыр классической произведениос чузъяськозы. А. Фомин верамъя, та фестивальын чакламын калыкез академической крезьгурен тодматыны. Филармонилэн залысьтыз артистъёс трос калыкен тырмем интыосы потылозы. Озьы филармония возьматыны тырше, классической крезьгур чик но мӧзмыт ӧвӧл шуыса.
Артистъёс кырын кырӟало, филармонилэн концертной залаз лэсьтӥськисьёс юр-яр каро. Али отысь пуконъёсты вошто. Выльдӥськон бере музыкантъёслы инты паськыталоз. Учкисьёслы 630 пукон интые 560 инты кылёз, со понна пукыны гань-ганьгес луоз. Балконэз но воштозы — али отысен концертъёсты учкыны туж ик умой ӧвӧл. Нош вуж пуконъёсты Ижысь музейёсы нуыны чаклало. Нялтас вераса, филармоние соос 2013-тӥ арын В. Короленко нимо театрысь ваемын вал.

Анастасия Шумилова

Ангелина Снигирева
By Ангелина Снигирева Июль 8, 2019 15:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<