Кариокас — тӧдьы адямиослэн городзы

Ангелина Снигирева
By Ангелина Снигирева 26 июля, 2019 12:54
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Филология наукаосъя докторлы Алексей Арзамазовлы удалтӥз ке удалтӥз: Россилэн культураезлы сӥзем фестиваль чотын вуылӥз Бразилилэн шорсюлмаз — Рио-де-Жанейрое.

Улонлы шумпото

Рио-де-Жанейро город пумысен кылпум потэ ке, нырысь ик син шоры пуксе ӟуч литератураысь яркыт герой — И. Ильфлэн но Е. Петровлэн романъёсысьтызы Остап Бендер. Кыӵе чебер вералляз со та город сярысь, макем ушъялляз! Ӧз удалты солы отчы шедьыны…

— Бразилие вуылэмме мон ӵошатысал Марсэ лобанэн, — вера Алексей. — Москваысен отчы лобись самолётъёс ӧвӧл, Голландиын пересадка кароно, озьы Рио-де-Жанейроозь быдэс сутка ӵоже лоби. Бразилилэн музъем вылаз васькеме бере син шорам соку ик йӧтӥзы чилясь тӧдьы пиньёссэс поттыса серекъясь, шунды улын пыжем адямиос. Ӧвӧл, Россиын сямен киез кутыса гинэ ӟечбуръяськыны соослы ӧжыт: Баризилиын чырткемъяськыны ярато — ӟыгырскыса, бамъёсынызы мукет муртлэн бамъёсыз борды йӧтскыса, чуп карыса. Соос котьку пальпотӥсесь, капчи мылкыдоесь, котькуд адямиен огкыл шедьтыны быгатӥсесь. Удмуртъёс сямен ик, соос но туж ярато но быгато куно пумитаны. Кырӟаса-вераса, эктыса-тапыртыса. Чиед мугоро нылкышнооссы воксё но ӧвӧл кадь, но восьмон пумысен нокин йырзэ уг висьыты – уло, улонлы шумпотыса.
Рио — Бразилиысь одӥгез бадӟымез город. Солэн одӥг палаз — чильпырась-лыз Атлантической зарезь, мукет палаз — ӝужытэсь гурезьёс, аспӧртэмлыко будосъёсын джунглиос. Отын шоканы луонтэм пӧсь, угось толалтэ уг луылы. Мыным капчи ик ӧй вал кезьыт Удмуртиысь 38-40 градусэ шедьыны. Бразилиын шунды чылкак мукет сямен пиштэ — со сутэ, коскатэ, омыр уйёсы но уг сӥя, котырак вӧлске сяська зын.

А. Арзамасов Бразилиын

Фавелае эн ветлы

Рио-де-Жанейроын 8 миллион адями улэ. Соос асьсэды «кариокас» нимало: таиз кылемын вашкала индеецъёслэсь, «тӧдьы адямиослэн городзы» шуэмез возьматэ. Индеецъёс та интыез озьы шуиллям Португалиысь нырысетӥ колонизаторъёс вуэм бере. Нош городзэс Риоын улӥсьёс португал сямен «cidade maravilhosa» нимало — дуннеысь тужгес чеберез город, пе. Рио висъямын люкетъёслы, соос ог-огзылэсь сокем висъясько, куддыр малпаны кутскиськод: та зэмзэ ик-а меда одӥг город?
Мон 2 арнялэсь ятыр улӥ Риолэн лымшор палаз. Ӵапак отысь пумиталод быдэс дуннелы тодмо луэм Копакабана но Ипанема пляжъёсты. Соос Атлантика зарезь дуртӥ олокӧня иськем кыстӥсько. Тӧдьы луоё пляж котырын сыло небоскрёбъёс, театръёс, университетъёс, вуз каронъя бадӟым центръёс, дуно ресторанъёс. Озьы ик котькинэ ас бордаз кыске Корковаду гурезь йылын сылӥсь Иисус Христослэн синпелетэз. Со ӝутэмын 9 ар ӵоже — 1922-тӥ арысен 1931-тӥ арозь, пыртэмын дуннеысь тужгес паймымон 7 интыос пӧлы. Сое учкыны араз вуылэ 1 миллион 800 сюрс адями. Христослэн синпелетэз дӥне тубыса, котыр учкиськод ке, син шоры йӧтэ — Сакыр йыр нимаськись гурезь. Солэн йылыз, пе, сакыр юдэслы кельше…
Риолэн лымшор палыз номырин но уг висъяськы кадь мукет узыр городъёслэсь. Попугайёсыныз ке шат! Угось, дыдыкъёс интые, Рио урамъёстӥ кышкатэк лобало пӧртэм буёлэн кисьтаськись попугайёс. Нош паркъёстӥзы кышкатэк калго обезьянъёс, тропикын улӥсь мукет пӧйшуръёс. Кӧберзы ик ӧвӧл: адями доры лыктыса, зынъясько.

Рио-де-Жанейроысь ульча

Но чылкак мукет суред усьтӥське городлэн уйпалаз. Вамышлы быдэ пумиталод фавелаосты — трущобаосын кварталъёсты, изъёслэсь лэсьтэм улон сэрегъёсты. Зэмзэ вераса, соосты корка шуыны ым уз пыры — огез вылэ мукетыз пуктылэм кырыж-мерыж коробъёс. Куд-огъёсыз гурезь пушкын ик лэсьтэмын. Отын улэ-вылэ Риоысь 20 процентэз калык. Фавелаосын кузёясько: лушкаськон, адями виён, шузимытӥсь суретъёсты вӧлмытон. Ма, ӝомыт луэмъя городлэн лымшор палтӥз но ветлыны уд дӥсьты: трущобаосысь шаян пиослэн ки улазы шедьыны быгатод угось…
Но фавелаосын улӥсьёслэн вылӥе ӝутскыны тубатсы вань — со спорт. Кыдёке ветлонэз ӧвӧл: фавелаысь потэмын быдэс дуннелы тодмо луэм футболистъёс Пеле но Роналдо. Футбол ик огазея ӝужыт небоскрёбъёсын но, куанер фавелаосын улӥсьёсты. Эшшо ке карнавал. Со ортче араз одӥг пол, солы дасясько быдэс ар ӵоже. Мон Риое шеди ӵапак карнаваллы дасяськон вакытэ. Урамъёсын эктыны чортӥсь крезьгур чузъяське, калык серекъя, кин кытын шедем эктэ, босса-нова! Паймисько, солы дасяськон гинэ но сокем зол но яркыт ке, макем абдрамон но вунонтэм ортче, вылды, ачиз карнавал!

Иисус Христослэн статуяез ӝыт

О, коммунистас!

Рио-де-Жанейроын улӥсьёс Остап Бендер сярысь уг тодо. Ма, со сярысь гинэ ӧвӧл, Россия сярысь но куд-огезлэн пал пельыныз гинэ кылэмез вань. Уксёме та кунлэн валютаезлы — реаллы — воштыкум, та ужен вырись нылаш мон шоры таба пасьта синъёсын учкиз: улонам, пе, нырысьсэ адӟисько Россиысь вуэм муртэ. Нош мукет дыръя магазинысь кассир шорам тӧдьы пиньёсыныз пальпотӥз но пель урмымон кеськиз: «О, коммунистас!» Соос али ке но малпало, асьмеос, азьвыл сямен ик, коммунизмын улӥськом на шуыса. Россия сярысь ӟеч тодо дышетскем адямиос гинэ. Но кунмы сярысь тодонзы будӥз, малпасько, миым Россиын футболъя чемпионат ортчем бере: Бразилиысь сюрсъёсын адямиос вуылӥзы дорамы.
Дунъёс Риоын кӧшкемато. Эсьмаса, Парижын но Римын улон дунтэмгес усиз вал, Риоын сярысь. Метроен огпол ветлон 300 манет усе, мар веранэз на сиён-юонлы дунъёс сярысь. Бен, уждунъёссы но пичиесь ӧвӧл. Но озьы ке но, Бразилия уг висъяськы кужмо экономикаеныз, та ласянь шуг-секытъёссы лачак. Но Рио азинске — вамышлы будэ ӝутско спортъя объектъёс, школаос, университетъёс, выльдӥсько сюресъёс.
Ачим наукаен вырисько бере, туж тунсыко вал тодыны, кӧня уждун басьто Бразилиысь тодосчиос. Асьмелы гочаны гинэ кыле! Бразилиын туж дунъяло интеллектуальной ужез. Тодосчиоссы, университетъёсын дышетӥсьёссы тужгес узыр адямиосын лыдъясько. Соослэн кӧня ке квартираоссы, дуно машинаоссы, возё сиён пӧрась но, утялскись но.

Елена Никитина

Ангелина Снигирева
By Ангелина Снигирева 26 июля, 2019 12:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<