Йӧлзы будэ — улонзы вакчия

Ангелина Снигирева
By Ангелина Снигирева Июль 2, 2019 16:20

Та вакытэ шаерамы но Россиысь тросаз улосъёсын вордо сьӧд-куӵо (чёрно-пёстрой) выжыысь скалъёсты. Соос трос нап йӧл сёто. Кызьы та выжыысь скалэз утялтоно, пыр-поч мадиз биология наукаосъя доктор Владимир Мымрин.

Шаерамы куӵо скалъёс вӧлмемын
Фото: В. Штыкова

1 минут куспын — 1,5 литр

Та выжы Совето Союзын кылдытэмын 1930-тӥ-1940-тӥ аръёсы, асьме ветылъёсты Голландиысь ваем ошпиосын бызьылытыса. Сьӧд-куӵо выжы сярысь пыр-поч вераськыны кутскизы 1950-тӥ аръёсы, эшшо 20 ар ортчыса, та сюро таза пудолэн йырыз Совето Союзын 10 миллионлэсь ортчиз ни. Та выжыез умоятон бордын ужазы но али но мыло-кыдо ужало Шор, Урал но Сибирь федерал округъёсын. Валамон, котькуд улосысь пудо ӧжытак висъяське. Кылсярысь, Шор округысь пудоос бадӟым мугороесь, ар ӵоже одӥгез скал шорлыдын 8-8,5 сюрс литр йӧл сётэ, наплыкез — 3,7 процент. Сибирь округысь пудо пичигес, 5 сюрс литр пала йӧл сётэ, наплыкезъя 4 процент котырын возиське. Урал округысь пудо тужгес йӧло лыдъяське, ар куспын 10 сюрс литр пала йӧл сётэ, но наплыкезъя со мукетъёсызлы келя — шорлыдын 3,5 процент.

Сьӧдо-куӵо выжыысь пудоос умой тупало асьме палась куазьлы, ӧжытгес сётско висёнъёслы. 14-16 толэзьем ветылъёсты, шорлыдын 350 килограмм кыско ни ке, бызьылыто. Кунянзы 35-40 килограмм вордӥське ке но, скалъёс капчиен пияло. Ошпиосты кема уг возё. Соосты шорлыдын 1 ар но ӝыны пала вордо. Бадӟымъёссэ но кужмооссэ выжы уськытыны кельто.

Ӟеч выжы уськытон уно аръёс ӵоже кыстӥське. Скалъёс шорлыдын 550-760 килограмм кыско, порозъёс 1 тоннаозь вуо, мугорзы кузьдалаезъя 163 сантиметр но луэ. Аппаратэн кысконлы та пудо умой сётӥське. 1 минут куспын 1,5 литр йӧл сёто. Одӥг ласянь, та пудо туж синмаськымон, мукет ласянь, туж яратэ чылкытлыкез. Улысьтыз кыедзэ, ву юон интызэ нуналлы быдэ чылкыт сузяса возёно. Кыедзэ умой ӧд утялты ке, пудолэн пыдъёсыз висьыны кутскозы. Шунытэз яратэ, одӥг выллем сиёнэз тэрга. Нимысьтыз саклык висъяно скаллэсь вераоссэ утялтонлы. Йӧл кыскем бере соосты ӵушылоно-вӧяно. Гужем ялан эскероно: ӵабтӥськемез, лузьёсын куртчем интыосыз кылдэмын ӧвӧл-а.

Ческыт сюдод, кӧттыро луод

Тодмо: макем ческытгес пудоез сюдод, сокем тросгес йӧл басьтод. Сьӧд-куӵо скал сярысь верамын кадь со. Нунал ӵоже сиёназы луыны кулэ:

  • 8-10 килограмм турын;
  • 30-35 килограмм куар, модос, вайёс;
  • 15-20 килограмм бакча сиёнъёс (гордкушман, ӵужкушман, картошка, мукет та выллем сиёнъёс);
  • 1 литр йӧллы 250 грамм кыд (жмых) яке белокен узыр сиёнъёс;
  • 2-4 килограмм мында изэм ю тысь;
  • 60-80 грамм сылал;
  • 100 грамм витаминъёсын узыр сиёнъёс (чорыг вӧй, кубиста, бур яке кальциен узыр сиёнъёс).

Эскерыса возёно пудолэсь тазалыксэ но. Мултэссэ сиыса, ӝушез висьыны быгатоз. Силосэн но бакча сиёнъёсын пудоез гужемзэ уг сюдо. Угось пастухе потаса, сюроос асьсэлы тырмымон, ог 60 килограмм пала, вож сиён шедьто. Ӵаж-ӵаж кезьыт ву сётонлэсь возиськоно, пукетоно яке ӧжытак, 10 градусозь, шунтоно.

Шаркан ёросын улэ Серьга

Выжыез умоятон пайдаен берытске. Арысь аре пудоос тросгес йӧл сёто. Уралысь гурт хозяйствоосты эскерыса потоно ке, 2014-тӥ арын гинэ котькуд скаллэсь шорлыдын 5 сюрс 614 килограмм йӧл кыскемын вылэм, нош кылем арын та лыдпус 6 сюрс 389 килограммозь вуиз. Туннэ котькинлэсь трос йӧл сётэ Свердловск улосысь Матиолла нимо скал — 17 сюрс килограммлэсь ятыр.

Гурт удысъя но сиён-юонъя министр Ольга Абрамова ивортэмъя, шаерысьтымы сюро таза пудоослэн лыдзы 165 сюрс пала лыдъяське, со пӧлысь 101 сюрсэз — кысконо скалъёс. Пӧлысьтыз 90 процент мындаез — сьӧд-куӵо выжыысь. Туннэ ӟеч выжы кидыс уськытон бордын шаерысьтымы 34 племхозяйствоос ужало. Ӵапак соослэн сюлмаськеменызы ик — 2018-тӥ арын шаерысьтымы пудо утисьёс котькуд скаллэсь шорлыдын 7 сюрс килограммлэсь трос йӧл басьтыны быгатӥзы. Удмуртилэн чемпионэз луэ Шаркан ёросысь «Кипун» хозяйствоысь Серьга нимо скал, ар куспын 12 сюрс 661 килограмм йӧл сётэм. Та лыдпус Урал округысь устоосыз пӧлы шедемын.

Наука удысын ужасьёсты али таӵе ужпум сюлмаськытэ: макем тросгес йӧл сётэ скал, сокем вакчигес луэ улон гумырез. Сьӧд-куӵо выжыысь скалъёс троссэ 4-5 пол кунян вайыны кулэ, жаляса верано, тросэз отчыозь уг уло. Соин ик тодосчиос, племхозяйствоосын ужасьёс скалъёслэсь улонзэс ӟечомытон сярысь сюлмасько.

Валентина Емельянова

Ангелина Снигирева
By Ангелина Снигирева Июль 2, 2019 16:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<