Инмар огазея пыраклы

Ангелина Снигирева
By Ангелина Снигирева 26 июля, 2019 12:19

Малы кулэ черкын венчаться кариськон?

Венчание дыръя
Фото: pravoslavie.ru

Венчание — со черкысь аспӧртэмлыко таинство. Загсын, шуом, яратӥсь адямиос семья кылдытӥзы шуыса гожтӥсько но соослы документ сётӥське. Нош черкын вуоно кузпалъёс Инмар азьын верало, соос ог-огзэс яратыса но ог-огзылы оскыса улозы, ӵош нылпи будэтозы. Инмар соослы юрттэ одӥг мылкыдын улыны. Та йылол потэмын ини Инмар Адамез кылдытэм бере ик. Воргоронлэн урдлыэзлэсь Со Еваез пӧрмытӥз — озьы вордскиз семья. Нош сьӧлык лэсьтэмзы бере пиосмуртэз но кышномуртэз Со узьмагысь (райысь) музъем вылэ улляз, ужалэ, пинал будэтэ шуыса. Озьы, Инмарлэн косэмезъя адямиос вашкала дырысен кузпалъяськыса уло.
Вашкала дыръя загсъёс ӧй вал, егитъёсты черкын баӵко венчать карылӥз. «Венчание» шуэм «венец» кыл бордысь потэмын. Кузпалъяськисьёслэн йыразы эксэйёслы кадь венец поно. Кузё-Инмар соосты азьланяз ӵош улыны бакель каре.
Черклэн дышетэмезъя, семья — со пичи черк. Собыдӟа дунъет сётэмын семьялы. Соин ик оскись адями ас семьяяз тырше Инмарлэсь курон-косонъёссэ быдэсъяса улыны — нылпиоссэ дышетыны анай-атайёсын, песянай-песятайёсын ӟеч кусып возьыны. Пичи черкын угось умой луиз ке, бадӟымаз черкын но ваньмыз каньыл луоз. Семьяез Куиньмоен но (Троицаен) ӵошато — Инмар Атай, Инмар Пи но Святой Дух. Нош семьяын — карт, кышно но соослэн нылпиоссы. Вӧсяськон кылъёсысь тодӥськомы: мае Инмар огазея — со пыраклы, сое люкыны уг луы ни. Кык адямиос семья кылдытыса одӥг луо. Тазьы но ӵошато: кызьы Иисус Христос черкез уте но сое яратэ, озьы ик карт но кышнозэ яратыны кулэ. Кызьы Кузё-Инмар черк сярысь ноку но лек кылъёсын уз вера, уз ултӥя сое, озьы ик карт но кышнозэ яратыны кулэ. Апостол Павел но вераз ук: кышномуртлы картэзлэсь кылзӥськоно, Кузё-Инмарлэсь кадь, картсэ яратоно, Иисус Христос черкез яратэм кадь.

Совето власть дыръя, жаляса верано, тросэз уг дӥсьто вал черке ветлыны. Нош берло 20-25 аръес ӵоже Инмарлы оскемез сярысь адями шара вера ини. Семья кылдытӥсь егитъёс но али тросэз черке лыкто. Куд-огез кузпалъёс, ог 50 аръес ӵош улыса но, венчать карыны курыса, вазисько. Соос шӧдо, Инмар азьын благословение басьтыны кулэ шуыса. Иисус Христос но шуиз ук, асьмеос музъем вылын гинэ кышно басьтӥськом, татын гинэ нылпи вайиськом, нош эксэйлыказ Инмар басьтэ ке, отын уг но кышноясько ни, уг но бызё ни. Соин ик кузпалъёс оско, Инмар соосты музъем вылын огазе кариз ке, инме ӝутскыса но, соос ӵош луозы шуыса.
Кузпалъяськонлэсь улонын номыр но бадӟым ӧвӧл, соин ик сое Инмарен герӟаны кулэ: Кузё-Инмар бакель мед кароз но мед юрттоз азьланяз тупаса, ог-огдэ гажаса, яратыса улыны, нылпи вордыны. Инмартэк уго дунне вылын номыр но ӧвӧл.

Валэктӥз протоиерей Павел Григорьев

Ангелина Снигирева
By Ангелина Снигирева 26 июля, 2019 12:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<