Дэмланъёсты люкалоз офис

Ангелина Снигирева
By Ангелина Снигирева 26 июля, 2019 10:02

Проект гожтыса, пӧртэм малпанъёсты улонэ пыӵатыны луэ. Со понна егитъёслы «iВолга», «Таврида», «Территория смыслов» форумъёс радъяськыло, фондъёс коньдон висъяло. Пичи Пургаысь журналист Анна Павлова йырыныз зымиз проектъёсын ужанэ. Малпанъёсаз — ёросаз проектной офис усьтон. Отчы егитъёс но, арлыдоос но вазиськыны быгатозы.

А. Павлова
Фото: Анна Павловалэн «ВКонтакте»бамысьтыз

— Кызьы тӥ дунъяськоды туала улонын проектированилэсь кулэлыксэ?

— Мон 15 ар журналистын ужасько ни бере, котьку но трос адямиосын кусып возьыса улӥ. Ивор — со нырысь ик адямилэн ужез, малпанэз, быгатонлыкъёсыз, шугъяськонъёсыз. Адӟисько, туннэ нуналлы улонэз капчи но ӟеч карон понна котыр ласянь трос луонлыкъёс вань шуса. Тани гуртоослэн вань интыысь аскивалтон сярысь законзы. Солэсь нимзэ лыдӟыса ик валаны луэ, гурт калык огазеяськыса, пӧртэм малпанъёсты улонэ пыӵатыны быгатэ шуыса. Нырысь ик самоуправление — со куке адямилэн аслаз улонэныз кузёяське. Куштоз-а со жуг-жагзэ нимысьтыз висъям интые яке гопе — ачиз тодэ. Адямилэн котькуд ужез, вамышез мукетъёсызлы юрттэт но луыны, люкетыны но быгатэ. Таӵе вакытэ дышетсконо кыл кутыны, аслэсьтыд быгатонлыкъёстэ будэтыны. Аспӧртэм луонлык сётэ проект гожтон. Одӥг адямилэн ӟеч малпанэз котыраз уно калыкез герӟаны быгатэ. Милям ёросамы трос сыӵе учыръёс. Пургалан кылем арын ӧй на вал пиналъёслы шудон интыос. Соин ик гуртысь анай-атайёсын герӟаськыса, спонсоръёсты шедьтыса, ми асфальт вылэ шудон площадкаос суредамы: шашкиен шудыны бадӟым доска, дартс, лабиринтъёс но мукет. Ми сое кутским но лэсьтӥм, трос коньдон но кулэ ӧз луы. Со ик вань аскивалтон. Калык ӟеч малпанэз дэмла, нош кивалтӥсьёс, ужбергатӥсьёс солы юрттэт сёто. Проект но ӵапак кыӵе ке шуг-секытэз ваче кариськыса вакчи дыр куспын амалтон.

— Кызьы асьтэос проект ужен вырыны ӧдъяды?

— Проектъёс гожъяны, Пичи Пурга ёросысь Егитъёслэн парламентазы ужакум, кутски. Пургаысь лулчеберетъя юртысь Елена Пименоваен ӵош калыкъёслэн кусыпъёссы бордын ужамы. Ёросамы лыктэм калыкез асьме улон сямъёсынымы тодматон понна библеотекаын нимысьтыз площадка усьтӥмы. Та проектлы нырысьсэ грант утӥ вал. Бадӟым юрттэт сётӥз «Креативный капитал» огазеяськонлэн «Фаст» семинаръёсыз. Отын трос тодон-валан басьтӥ.
Ижкарысь пӧртэм мерлыко огазеяськонъёс кадровой школа радъязы. Отын но дышетски. Ӵапак соку проектной офис кылдытон борды басьтӥськи. Туннэ нуналлы со пыд йылаз султэ гинэ ай. Ёрос йырмылы Сергей Юринлы но солэн юрттӥсьёсызлы та кичӧлтонмы яраз. Оскисько, матысь дыре офисмы тыро-пыдо ужаны кутскоз.
Та дырозь проектъёсынымы ог 800 сюрс манет утӥмы ни. Но проектъёсты уксё понна гинэ уг гожто ук. Соос адямилэсь улонзэ ӟечгес карыны юртто. Тани Улын Юриос шайвыл доразы сюрес лэсьтӥзы, Яган школаын телевидение кылдӥз, Иваново-Самарскын — шудон инты.

— Кыӵе ужпумъёс проектной офисты азе пуктӥськоды?

ӟ— Котькинлэн аслэсьтыз улон интызэ ӟечгес каремез потэ. Отысь луэ мукет азе кошкыны яке пичиен пичиен, проектъёсты улонэ пыӵатыса, югдурез тупатыны. Озьы быдэс ёрослы но пайда вайыны луэ. Со бордын ужаломы. Нырысь ик, офис проект гожтыны юрттоз, валэктоз, кызьы малпанэз быдэстоно. Адямиосты ог-огенызы герӟалоз. Шуом, адямилэн потэ егитъёслы инты, парк лэсьтэмыз, со ужез мытон понна пӧртэм специалистъёс кулэ: архитектор, строитель, инкуазез утись но мукет. Соосты котырес ӝӧк сьӧрын люкаса, учкомы, луэ-а уг-а та малпанэз улонэ пыӵатыны но кызьы.
Та — проектной офислэн огез палыз, мукетыз — чакласьно, кыӵе гуртлэн шуг-секытъёсыз вань, кызьы сое азинтыны луэ. Гуртъёс азинскемен, быдэс ёрос но азьпала вамыштэ.

— Нош али Пичи Пургалась егитъёслы асьсэ проектъёсынызы кытчы вазиськыны луэ?

— Кыӵе ке малпанзы кылдӥз ке, мыным вазиськыны луэ. Огазеяськыса уж капчигес мыноз. Вашкалаосмы верало вал, шудо луэмед потэ ке, матысьёстэ улытозяд эн вунэты. Ужаны яратон сяммы борды ог-огдэ гажан ватсаськысал ке, асьмеос бадӟым вамыш лэсьтысалмы.

Мария Емельянова

Ангелина Снигирева
By Ангелина Снигирева 26 июля, 2019 10:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<