Грузилэн музъемаз, Россилэн бурд улаз

Ангелина Снигирева
By Ангелина Снигирева 29 июля, 2019 16:20

Абхазиын ог 250 сюрс улӥсез. Мукет кун, мукет калык. Ӵапак мукет культураен, улон-вылонэн тодматскон вылысь Абхазие вуылӥм. Инкуазезлы но, адямиосызлы но паймимы.

Выль Афон котырсь гурезьёс
Фото: Е. Сараматова

Уло пенсионеръёс чот
Абхазие мыныны дӥсьтод меда? Россиысь адямиосты отын уг ярато, лушкасько, жугисько, шуо. Кытын улоды? Зарезь но кырсь, пе, висьыны уд кутске-а? Кыӵе но юанъёс ӧз чузъяське сюрес азьын. Кунгож вамен ортчыса вуттӥмы гинэ, соку ик шӧдӥмы: вуимы воксё мукет дуннее.
Сюреслэн огпалаз — шимес тӧлъёслэсь но зоръёслэсь утись ӝужыт из борддор кадь кузянак гурезьёс. Мукет палаз — пумтэм кыстӥськись, чильпырась зарезь. Шыпыт. Нош инкуазез макем чебер! Куашетӥсь, ялан кытчы ке дыртӥсь городлэсь пегӟемды потэ ке, ӵапак татчы лыктоно. Нош сюресъёссы макем вольытэсь! Машина вӧй вылтӥ кадь гылӟе. Одӥг кышъям интыез но ӧвӧл — котькытын асфальт. Гурезьёсы пуктэм оген-оген сылӥсь котькуд корка доры но асфальт я бетон кисьтэмын. Сюбег икыр-кукыр пролкаосын но асфальт. Россия сюресъёс лэсьтыны юрттӥз, шуо Абхазиын улӥсьёс. Машинаос но татын дуно иномаркаос гинэ. Котькудӥзлэн аслаз азбарез вань ке но, пуны вордӥсез ӧжыт: сое сюдыны-утялтыны кулэ ук — дуно усе, эшшо ке туристъёс куртчемзылэсь кышкало. Котькуд юртъер угось туристъёсты бордаз кыскон понна ужа: вамышлы быдэ кин ке сэрегзэ арендае сётыны дась. Одӥг уй понна дунъёс 250-300 манетысен кутско.
Ми Гагра ( азьвыл Гагры) городысь егит семьяе сюрим. Георгий Гвасалия — юрист, Нино Концелидзе — кырӟась, француз но англи кылъёсысь переводчик. Кыксы но дышетскемын Москваысь кун университетын. Но выжыоссэс, сям-йылолъёссэс утён, анай-атайёссылы матэгес луон вылысь берытскемын вордскем палъёсазы.

— Георгий дышетскемезъя уж аслыз кельшымон шедьтӥз, нош мон дорын пукисько, — вераськон сямен вераз Нино. — Дышетӥсе кутски вал. Толэзяз 5 сюрс 700 манет басьтыны ӧз кельшы. Культурая юртъёсын но сомында ик тыро. Соин ик али уж утчасько. Куд-ог дыръя сюанъёсын кырӟасько — ӝыт куспын 70 сюрс манет басьтыны луэ. Тазьы кемдэ ке, туж шумпотоно ни. Абхазиын шоро-куспо уждун 10-12 сюрс манет. 20 сюрс манет но солэсь ятыр басьто электрикъёс, ульча сузясьёс, банкын но администрациосын ужасьёс. 80 процентэз калык выре туризмен: комнатаоссэс арендае сёто — туристъёсты чебер интыостӥ нулло. Сезон куспын 500 сюрс манетозь люканы быгато. Капчигес соослы, кинлэн дораз пересез вань. Шоро-куспо пенсия 10 сюрс манет. Сое но ваньмызлы Россия тыре. Абхазия вӧзаз 500 манет будэтэ. Ужтэк кылемъёслы но, нылпи вайисьёслы но пособие тыре Россия.
Сиён-юон дунъёс татын куртчылӥсько. Кылсярысь, 1 килограмм помидор 250 манет сылэ коть базарын, коть магазинын. Абрикос — 200 манет вылын. Соос но Россиысь я мукет кунъёсысь ваемын. 1 литр йӧл 90 манет вылын, со но Краснодар котырысь вуттэмын. Асьсэлэн урамъёстӥзы скалъёс гань-гань ветло ке но, кечъёсты гурезьёсын возё ке но, йӧлзэс ваньзэ сямен сыр лэсьтонэ куто, ресторанъёсы келяло.

Абхазиын котырак гурезьёс
Фото: Е. Сараматова

— Туристъёс чотын гинэ улӥськомы бере, нокин дунзэ пичи но уськытыны уг малпа, — вера Георгий Гвасалия. — Соин ик сиён-юон басьтонын туж ӝикыт кариськоно луэ.
Сиён-юон дунъёс бадӟымесь ке но, Абхазиын улӥсьёс мерттӥськыны туж ик мыло-кыдоесь ӧвӧл. Гагра городын котькудӥзлэн 6-10 сотка музъемез вань. Куд-огез отчы туристъёс понна юрт ӝутэ. Куд-огез мандарин, виноград, киви будэтэ. Но кияр-помидор будэтӥсез чиньыен лыдъямон. Ву кисьтано ук. Россиысь Сочи, Адлер котырын зоре ке, ми пала зоръёсты гурезьёс уг лэзе. Турын ик шунды шорын ӝуа, шуо. Асьсэос котькуд квадрат сантиметре герань сяська мертто. Сое нуналлы быдэ вуэн кисьтало. Бакчаын кус тӥяськытозь мерттӥськыны дышем адямилы та воксё абдрамон потэ.

Заводъёс гуньдэмын

Гаграын кенер интыын — лавр куакъёс. Асьсэос солэсь сиён уг пӧрало, нош туристъёслы сое веникен-веникен кузьмало я вузало. Ӟезьыоссы нош воксё но полисаднике пыроно кадесь гинэ. Уйлы но уг ӵогаськыло.

— Кышкыт ӧвӧл-а ӵогаськытэк кӧлыны?- юасько.

— Кинлэсь? — мыня Нино. — Милям калык уг лушкаськы — со бадӟым сьӧлыкен лыдъяське. Собере ми ваньмы ог-огмес тодӥськомы, кин ке маке шаянтӥз ке, сое адӟонтэм карозы, талэсь калык кышка. Жугиськисез но туж шер луэ.

— Соин-а азбарады уен-нуналэн тыл ӝуа: ваньмыз шара. Кысэм потыса, сюлэм ик серектэ. Милям татын часкын 1 кВт понна 40 копейка гинэ люкаське бере, тылэз жаляны тодамы уг лыктылы.

Гурезь улын ик гурт интыяськемын
Фото: Е. Сараматова

Оглом коммунальной услугаоссы понна тырон Абхазиын ар ӵоже ог 3 сюрс манет сяна уг люкасько. Сое но аръёсын тырытэк возё. Мунчозы нокинлэн но ӧвӧл — пӧсе пырыны татысь калык дышымтэ. Зарезь дуре но асьсэос уг ветло, ай гужембыт пыласькытэк кылеменызы данъяськисьёс пӧлазы вань. Шунды шоры но уг потало — кузы сьӧдэктэмлэсь кышкало: милям урамын ужасьёс гинэ шунды шорын пыжо, шуо, соос шоры калык сьӧд ужын ужасьёс шоры кадь учке. Зарезе пырыны юрдо. Очистительной сооружениоссы городъёсын ӧвӧл угось. Гаграын со интыен-интыен вань, но гумыос кузя ваньмыз кошке ог 20 иськемлы палэнэ интыяськем Пицунда городэ. Татысь ни вань гумыос меӵак зарезе пото. Соин но зарезьын пыласькись туристъёс тросэз кӧтынызы курадӟо.

Гурезьёсын со понна кыӵе шулдыр но чылкыт! Омыр ик мукет кадь. Рица ты дорысь кошкем ик уг поты. Ярдурысен учкиськод шораз но малпаськод: тодэм ик та Иосиф Сталин, кытчы аслыз дача пуктыны. Зэм, солы шуыса пуктэм дача 1977-тӥ арын быдэсак ӝуам — электропроводка бордысь тыл потэм. Туннэ отын фундаментэз гинэ на адске. Рельсаослэсь лэсьтэм мумыкоръёс бордын адӟиське на штампез: «КМЗ им Сталина № 18 V 1947». Экскурсовод Зия Концелидзе верамъя, туристъёсты кыскон вылысь калыкез Н. Хрущевлэн дачаяз нулло, сое Сталинлэн шуо.

Рица ты
Фото: Е. Сараматова

Ачиз Зия — грузин. Но Абхазиын кемалась улэ ни. Соин но юатэк ӧй чида Грузиен 1992-тӥ-1993-тӥ аръёсы пуромем ож сярысь. 70 аресъем воргорон гуньдэм кадь луиз. Собере лулӟиз:

— Ми али но ум тупаське. Аслаз вынъёсыд пумитэ султы ай. Мынам агае Грузиын улэ. Но милям Абхазиын семьямы, музъеммы. Кызьы ми сое ум уте? Войнаын 16 сюрс адями быриз. Грузия тюрьмаысь но адямиосты поттӥз милемын ожмаськон вылысь. Со войнаын 34 сюрс грузинъёс быризы. Тау, Россилы — кунмес утьыны юрттӥз. Ми али ке но Россилэн утемез улсын улӥськомы. Войналэсь азьвыл Абхазиын 650 сюрс улӥсез лыдъяське вал, али — 250 сюрс. Тросэз кошкемъёс — со грузинъёс. Грузия умойтэм лэсьтӥз. Абхазилэн потэ вал гань-гань шокчемез. Вина лэсьтэ, тамак поттэ, сое Грузия ваньзэ ачиз вылэ гожтэ вал, Абхазиын номыр уг лэсьтӥськы шуыса. Кӧня калык бугыръяськиз талы пумит. Зэм, тамак поттӥсь предприятимы война бере куашказ. Цемент лэсьтонъя заводмы гинэ но пытсаськиз. Пу гинэ на поттӥськомы, но сое но вузаны келяськомы. Асьмелы материал пуктӥськыны вуттӥськомы Россиысь. Но осконэн улӥськомы: предприятиосмы выльысь ужалозы ай.
Ыбылэм, пуштылэм коркаос татын вамышлы быдэ. Нокин но соосты тупатыны уг дӥсьты. Одӥг сэрегзэ тупатозы, отчы банк я магазин усьтозы, нош мукет палаз, мылкыдэз шимес куашкатэ ке но, нокин номыр уз лэсьты. Со дыре ик котькудӥз корка азьзэ ӵужоз. Одӥг усем куар но уз кельты, нош муртлэсьсэ ноку уз ӝуты. Пуштытъям юртъёс но мед сылозы, эсьма, ӵемгес тодамы ваёмы со кышкыт войнаез, шуо.
Абхазиын бусыоссы гинэ но аналмо ни. Виноград сокем трос уг мертто ни. Одӥг гинэ на данъяськонзы — сям-йылолъёссэс утьыны выро. Татын нылпи садысен абхаз кылэз дышето. Ваньмаз 156 школаын дышето кылэз. Котькуд ужрадзэс радъяло 2 кылын: ӟуч но абхаз. Ӟечкылан гинэ ӧвӧл со. Кылсярысь, 1 сюрс 950 выпускниклы Гагра шорын ужрад радъязы 2 кылын. Тросэз нылпиос будо песянай-песятайёссы вӧзын. Анай-атайёссы нылпиоссэс 6 толэзьысен пересьёссылы сёто, соос сям-йылолъёслы умойгес дышетозы шуыса, асьсэос ужаны выро. 8 час бере одӥг пиналэз но урамысь уд адӟы — юртъёсазы пуко. Кӧлыны ярато 10 часозь ужаны мынон нуналэ но. Шундыен ӵош вазь султыны дышем муртлы та валантэм. Соос кадь гань-гань кариськыны ми ӧм дыше. Ялан кытчы ке мынэм, мае ке адӟем потэ вал. Нош адӟыны вань мае.

Елена Сараматова

Ангелина Снигирева
By Ангелина Снигирева 29 июля, 2019 16:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<