Висьыны маза ӧвӧл!

Ангелина Снигирева
By Ангелина Снигирева Июль 31, 2019 16:29

Кияса черкогуртэ люкаськылӥзы пӧртэм ёросъёсысь скандинав амалэн бызьылыны яратӥсьёс — «Мугордэ кыдатод — кема улод» фестивале. Пыриськизы пӧртэм ёросъёсысь 150-лэсь ятыр мыло-кыдоос.

Скандинав амалэз 10 сюрс пала адями яратӥз ни
Фото: udmurt.ru

Скандинав амалэн ветлонэз гажасьёслэн лыдзы нуналмысь йылэ. Бодыосын вамышъяны яратӥсьёс элькунамы 10 сюрслэсь ятыр лыдъясько ни. Нырысь-валысь та амал зол вӧлмиз вал элькунысьтымы городъёсын, нош туннэ сое ярато ни гуртъёсын улӥсьёс но. Сое вӧлмытон понна бадӟым уж нуо ёросъёсысь Калыклы улон-вылонын юрттонъя центръёс. Доразы юрттэт курыса лыктӥсьёсты соос бурдъяло мугорзэс кыдатыны. Элькунысьтымы Калыклы улон-вылонын юрттэт сётон политикая но ужъя министерство ивортэмъя, таӵе центръёс пыр скандинав амалэн ветлыны кутскиз ни 6 сюрслэсь ятыр адями. Ӵапак соос пӧлысь мыло-кыдоосыз пыриськизы Кияса черкогуртын ортчем «Мугордэ кыдатод — кема улод» фестивале. Со радъяськиз Гурт шудонъёслы шуыса пуктэм «Юность» стадионын. Фестиваль ортчиз Удмуртиын Тазалыклэсь арзэ пусъён, озьы ик «Демография» нацпроектэз быдэстон улсын.
Та ужрадэз ортчытыны Кияса палъёс юнме быръемын ӧй вал: та ёросысь Калыклы улон-вылонын юрттонъя центр вормисе потӥз Россиысь вожвылъяськонын — со устоен лыдъямын мугорез кыдатӥсь ужрадъёсты ортчытъян ласянь. Киясаос таин гинэ ӧз буйгалэ: быдэс элькун понна фестиваль радъяны малпазы. Табере скандинав амалэн ветлонлы сӥзем вожвылъяськонзы ӟеч сяме пыӵалоз но арлы быдэ кудаз ке ёросъёсын ортчоз.
Фестивале вуэмъёс пӧртэм буёло дӥсен пӧрмытскиллям: пургаос — тӧдьыесь, киясаос — лызэсь, каракулиноос — вожесь но мукет. Котькуд команда стадионэтӥ ортчиз, ёросэзлэсь флагзэ ӝутыса. Соосты шуныт пумитазы Скандинав амалэн ветлонъя федерацилэн кивалтӥсезлэн воштӥсез М. Пасынков, Кияса ёрослэн йырыз С. Мерзляков, Калыклы улон-вылонын юрттон политикая но ужъя министерствоысь специалистъёс. Та бӧрсьы кутскиз зэмос вожвылъяськон: кышномуртъёс 1 иськем бодыосын бызьылӥзы, воргоронъёс — 2 иськем. Фестивале пыриськемъёс пӧлысь тужгес мӧйыез вал Кияса черкогуртысь 84 аресъем Мулланазип Маннапов. Дистанциез со капчиен но ӝог ортчиз: ма, нуналлы быдэ, пе, ог 3 иськем бодыен ветлӥсько, висьыны маза ӧвӧл!

Бодыен ветлыны тупа ардыдоезлы но, пиналэзлы но
Фото: udmurt.ru

— Скандинав амалэн ветлыны кутски ай кылем арын ноябре гинэ, — финише вуыса, вера Пичи Пурга ёрослэн командаысьтыз Галина Кириллова. — Кызьы бодыос борды кутски — куштэме ӧз луы ни. Туж кельше та амалэн мугорез кыдатыны! Толбыт тазьы ветлӥ, одӥг пол но висьыны ӧй усьы. Улӥськомы ми Пичи Пурга черкогуртлэн пумаз, отын бадӟым бусымы вань. Отӥ нуналлы быдэ ветлӥськомы. Куд-ог дыръя, эсьмаса, 7 иськем но ортчиськом. Паймоно кадь: ужысь жадьыса бертӥськод, нош бусые потӥськод но, мылкыд ӝутске, жадён кытчы ке чиптэм-чаптэм ыше, мугор пушкын капчи луэ. Пурга черкогуртамы та амалэз гажасьёс лачак ни, бодыен ветлыны потало быдэс урамъёсын, — шуэ нылкышно.
Нылкышноос пӧлын тужгес шӧртчи вал Сарапул городысь Татьяна Валеева: со пусъемын фестивальлэн зарни медаленыз. Пиосмуртъёс пӧлын но висъяськизы сарапулъёс: ваньзэсты азьпалтӥз та городысь вуэм Николай Валеев. Вормисе потэмъёс пусъемын кузьымъёсын, таукаронъёсын. Сарапулъёслы ик зориз шулдыр стартъёсын но: шаплы бызьылӥзы но, тэтчазы но. Озьыен, вуоноез фестиваль ортчыны кулэ Сарапулын.
Кылем арын ноябре, толбыт ветлӥ, 5 нунал ветлисько арняяз одиг час, 7 час вуэ ке, боды ӧте ни кадь. 7 иськем ортчисько, милям вань пурга пумын – бусыетӥ, туж кельше, настрой – потӥськод, жадемын ни кадь, а сэре мылкыд.

Елена Никитина

Ангелина Снигирева
By Ангелина Снигирева Июль 31, 2019 16:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<