Бӧрӟытоз но буйгатоз

Ангелина Снигирева
By Ангелина Снигирева 15 июля, 2019 16:51

Алигес «Удмуртия» издательствоын Любовь Ганьковалэн выль книгаез потӥз. «Палтури» бичетэ (12+) пыризы тодэ ваёнъёс, веросъёс, мадёсъёс, инкуазь суредъёс, визькылъёс но кылбуръёс.

Л. Ганькова произведениосаз улонэз, котькуд адямилы тодмо сюлэмшугъяськонъёсты яркыт кылын суреда. «Калыклэсь ортчыт мылкыдзэ кагаз вылын возьматыны тырши», — гожтэ ачиз автор книгалэн азькылаз. «Чисто шонер гожтэмын», — шуэ мынам песянае, Л. Ганьковалэсь гожъямъёссэ лыдӟыкуз.
Л. Ганькова шыкысысьтыз кыӵе гинэ шер кутӥськись кылъёс уг потты. Солэн кылтӥрлыкез удмурт кыллэсь бусьтыр луэмзэ возьматэ. Автор трос кутэ 2 люкетлэсь пӧрмем, удмурт кылын ӵем пумиськись кылъёсты: лулысь-сюлмысь, кӧй-вӧй, усточи-быгачи, лыдӟем-тодэм, поръязы-шулдыръяськизы. Та книга кыл эскерисьёслы узыр материал сётыны быгатоз.
Авторлэн веросъёсыз-мадёсъёсыз ӟырдыт мылкыдын тырмемын. «Палтуриез» лыдӟон — книгаен ас кожад пукон ӧвӧл. Со авторен ваче син пумиськон, соин кенешон. Азяд визьмо адями пуке кадь, лулшугзэ усьтыса, улон сюрессэ тодаз вайыса.
Автор лыдӟисез ортчемез пала ӵем берыктэ. Историлэсь сюрессэ сопала я тапала берыктӥсь бадӟым учыръёс вӧзын суредамын адямилэн улон-вылонэзлэн визыласа кошкемез. Арлодоослэн синъёссы нюромытэк уз кыле — Л. Ганьковалэн пичи дырыз сярысь тодэ ваёнъёсыз соослы матын луозы. Нош егитъёс азьвыл улон-вылонэн тодматскыны быгатозы. Нимъёс гинэ но макем тунсыко чузъясько: Тури Ивака, Шушлей Насьта, Горд Лиза, Офиння. Чыры-пыры, вылтӥз возьматэм арбериос но адямиослэн сямъёссы пыр гинэ но трос тодоно ортчемез сярысь. Озьы книга этнографической материалэн но узыр луэ.
Любовь Ганьковалэн визькылъёсаз, мадёсъёсаз пыӵам философия удмуртъёслэн дунне шӧдонысьтызы, удмурт калыклэн визьмысьтыз потэмын. Автор суратэк-пожатэк ваньзэ суреда. Ӟеч сюлмо но йӧно адямиос вӧзын возьматэмын чурыт но лек муртъёс.
Синмаськымон авторлэн пичиесь эссеосыз (татын соос инкуазь суредъёс шуыса нимамын). Кылсярысь, «Толэзен вераськон» пичи этюдын кыллэн эмъясь кужымез усьтӥське. Адямилэн асэныз вераськемез тэльмырон-вӧсяськонлы пӧрме, нош уйбыртэмез сюлэм вӧсьсэ улля.
«Палтури» мылкыдэз чепыллялоз, сюлмез бугыртоз, бӧрӟытоз — со ик буйгатоз но.

Виктория Крамова

Ангелина Снигирева
By Ангелина Снигирева 15 июля, 2019 16:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<