Быгые — Африкаысь сиёнэз веръяны

Ангелина Снигирева
By Ангелина Снигирева Июль 3, 2019 09:52

6-тӥ-7-тӥ пӧсьтолэзе пӧраськыны но сиыны-юыны яратӥсьёс люкаськозы Шаркан ёросысь Быгы гуртэ. Татын 6-тӥ арзэ ортчоз фин-угор сиён-юонлы сӥзем «Быг-быг» фестиваль (0+).

Быг-быгын веръяны луоз портэм калыкъёслэсь сиёнъёссэс
Фото: М. Егоров

«Быгы» центрлэн кивалтӥсез Жанна Ермолаева верамъя, фестиваль куноосты котькуд ар мар ке выленыз паймытыны тырше. Кылсярысь, котьку сямен, пӧраськисьёс куспын вожвылъяськон ортчоз. Но туэ пӧраськыны быгатэмзэс возьматозы покчиос но — соос понна радъяське «Пичи шеф» конкурс. Отчы пыриськозы 6 арескысен 13 арескозь нылпиос.
Котькуд ар Быгые Россиысь пӧртэм улосъёсысь но мукет кунъёсысь пӧраськисьёс вуо. Туэ, фин-угор поваръёс сяна, фестивале вуоз Зимбабвеысь пӧраськись Афеас Томас Матэ. Со Пешенс туганэныз ӵош Африкаысь калыкъёслэсь сиёнзэс пӧралоз. Нялтас вераса, быгыос Т. Матэез асьсэлэсь пизэс кадь витё: кылем арын пиосмурт «Мынам Удмуртие» телерадиокомпанилэн «По соседству» проектаз пыриськиз, кӧня ке дыр ӵоже Быгыын улӥз.
4-тӥ арзэ «Быг-быг» дыръя сиён-юонэн герӟаськем сям-йылолъёсты, пӧраськон амалъёсты эскеро. Таяз арын эмъяськонын кутӥськись турын-куаръёс сярысь вераськозы. Со сяна, фестивальлэн 2-тӥ нуналаз егитъёс, командаослы люкиськыса, Шаркан ёросысь пӧртэм гуртъёсы экспедициен поталозы. Соос калыклэсь юалляськозы, кыӵе турын-куаръёсын эмъясько но кыӵе сям-йылолъёсын соос герӟаськемын. Бӧрысь та материалъёсын пичи книга поттыны чаклало.
Вашкалаез яратӥсьёслы тунсыко потоз «Корт даур» площадка. Сое радъя Москваысь Юрий Габров этнограф. Со тодматоз вашкала фин-угор калыкъёслэн дӥсенызы, пӧртэм арбериосынызы. Озьы ик вералоз, кызьы пӧраськылӥзы фин-угоръёс ог сюрс ар талэсь азьло, ачиз ик возьматоз та амалъёсты.
Удмуртиын сиён-юонлы сӥзем фестивальёс трос гинэ. «Быг-быг» ваньзэсты огазеяны малпаз: татын пӧртэм ёросъёсысь фестивальёс пумиськозы, соос куспын вожвылъяськон ортчоз. Эграос тодматозы «Пельменика» фестиваленызы, яръёс — «Губи-Fest» ужрадэнызы, кезъёс — «Pest-Fest» — пешниклы сӥзем — фестиваленызы, нош Вотка ёросысь Перевозной черкогуртысь улӥсьёс — сылалтӥськемлы сӥзем «Перевозинский засольник» фестиваленызы. Со сяна, Удмуртиысь пӧртэм ёросъёсысь «ветлӥсь» гуръёслэн пумиськонзы ортчоз, нош соослэн кузёоссы калыкез гурысь али гинэ поттэм пыжиськемен утялтозы.
Котьку сямен, «Быг-быг» азбарын пӧраськонъя мастер-классъёс ортчозы, сиён-юонэз веръяны луоз. 6-тӥ июле «Даур герӟет» концерт, кырын эктонъёс ортчозы. Егитъёс понна пӧртэм ужрадъёс чакламын, кылсярысь, «Ыж гон гольф» шудон. «Бенъёслэн» но «Бонъёслэн» командаоссы нош ик кужымзэс мерталозы, футболэн шудыса.
Куноос палаткаосын улыны быгатозы. Фестивале Ижысь нимысьтыз автобус мыноз, со 8 часын вырӟоз, Быгыысь берен кошкоз 18 часын. Автобусын инты басьтон понна жингыртоно 89508119515 телефон номеръя. Со сяна, Ижысь Шарканэ рейсовой автобусъёс ветло, Шарканысен Быгыозь но автобусъёс ширъялозы. Тросгес тодыны луоз фестивальлэн «ВКонтакте» вотэс бамысьтыз https://vk.com/byg_byg.

Анасасия Шумилова

Ангелина Снигирева
By Ангелина Снигирева Июль 3, 2019 09:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<