Атай луыны дышетоно

Ангелина Снигирева
By Ангелина Снигирева Июль 10, 2019 13:22

Кунамы пыӵа «Утём улонэз» проект. Удмуртиын солы кутскон сётӥз Россилэн Президентэз бордын ужась нылпилэн правоосызъя оскем мурт Анна Кузнецова.

А. Кузнецова Ижысь 4 номеро больницалэн ужаменыз тодматске
Фото: udmurt.ru

Арысь аре аборт лэсьтон учыръёс кулэсмо ке но, лыдпус бадӟым на. Удмуртиысь Правительстволэн Тӧроезлэн воштӥсез Анастасия Муталенко пусъемъя, шаерамы араз шорлыдын ог 6 сюрс нылпи куштон учыр луэ. Та пӧлысь ӝыныез гинэ врачъёс косэмъя. Кылсярысь, туэ 5 толэзь ӵоже 2 сюрс 300-лэсь ятыр аборт лэсьтэмын, та пӧлысь ог 1 сюрс 500-эз — эмъясьёс куремъя. Нуны куштӥсьёс пӧлын быдэ вуымтэос но, студентъёс но, 40 арессы сьӧры ортчемъёс но. «Утём улонэз» проектлэн Удмуртиысь координаторез Анна Юшкова верамъя, 48 процентаз учыръёсы нылкышноос таӵе вамыш лэсьто, семьяязы уксёен шуг-секытъёс кылдэмен но гажанэныз кусыпъёссы тэшкамен. Эскеронъёс возьмато созэ но: 10 процентаз учыръёсы кышномуртъёс кышкало ужзэс ыштыны, 16 процентэз ӝожтӥсько улон интызы пичи я ӧвӧл шуыса. 13 процентэз кышкало, пиналзы сӧсыр я висись вордӥськемлэсь.

— Нылпи куштон ӵемысь югдурысь потыны воксё уг юртты, нош ар ӵоже троссэ ужпумъёсты сэрттыны-пертчыны луэ. Тани мае нырысь ик валэктыны кулэ секытэн нылкышноослы, — шуэ Ижысь Перинатальной центрысь психолог Екатерина Драчёва.
Татчыозь нылкышноосын больницаын кенешылӥз акушер-гинеколог гинэ. Табере нылпиезлэсь мозмытскыны малпась кышномуртэн ужалозы психологъёс но. Со понна больницаосын нимысьтыз кабинетъёс усьтӥськозы. Шаерысьтымы 9 больницаын соос ужало ни. Таос пӧлысь 5-ез — Ижын. Озьы ик ужало Вотка, Глазов, Эгра, Сарапул ёрос больницаосын. Юрттэт сётӥське дунтэк.
Озьы ик нылкышноосын ужалозы калыклы улон-вылонын юрттэт сётонъя центръёсысь специалистъёс, юристъёс. Тросэзлэн угось уж ласянь но шугъяськонъёссы кылдо. Анастасия Муталенко пусъемъя, ужпум пуктэмын: нылпилы дӥсь, кӧкы гинэ басьтыны ӧвӧл, семьяын кылдэм югдурез но сэрттыны-пертчыны юрттоно, соку выль улонэз — нылпиез — утьыны пӧрмытомы.
Нош мар со понна кулэ? Та юанлы валэктон утчаса, Ижысь 4 номеро больницаын Анна Кузнецоваен пумиськонэ котырес ӝӧк сьӧры люкаськылӥзы калык огазеяськонъёсы пыриськисьёс, психологъёс, врачъёс, шаерысьтымы кивалтӥсьёс. Оскон телефон, остановкаосын, трос калыко интыосын улонэз утёнлы сӥзем баннеръёс гинэ тырмыт ӧвӧл угось. Али ӧдъяло декретын пукись нылкышноослы асьсэ ужзэс усьтыны юрттыны. Соку ӵуказе нуналлы но осконзы йылоз, шуо. Тросэз нылпиен утиськыкузы усьтэм ужзэс азьланяз но азинто.

— Асьмеос олокӧня пӧртэм профессилы дышетӥськомы. Но асьмеос ум дышетӥське атай луыны, — шуэ Удмуртиысь Атайёслэн огазеяськонэнызы кивалтӥсь, Иж город администрацилэн йырызлэн воштӥсез Дмитрий Чистяков. — Психологлэн кабинетаз гинэ вераськон тырмыт ӧвӧл. Атайлэн кылыз, верамез бордысь ӵемысь потэ нылкышнолэн но пиналлэн азьлань улонзы. Ми дась абортъёслы пумит но ужаны. Нылпиез утён, атай луон — милям но валтӥсь ужмы.
Нылпиос пыласькыкузы выё, укноысь усё, машина улэ сюро. Анна Кузнецова та бордын но ужаны куриз.

— Удмуртилэн Тӧроеныз Александр Бречаловен пумиськыкумы, кенешимы эскерон ортчытон пумысен, малы нылкышноос анай луыны дась ӧвӧл, — шуиз Анна Юрьевна. — Рос-прос тодыны кулэ, мар соослы люкетэ? Оло, больницаос, улон коркаос, сюресъёс тросгес лэсьтоно? Быдэс кунамы сыӵе юалляськон ортчытоно. Соку гинэ асьмеос тодыны быгатомы, мар кулэ шудо луоно понна. Туннэ унояз улосъёсын трос нылпиё семьяослы пуктӥськыны музъем пудо шай бервылын, нюр интыын висъяло. Инфраструктура сярысь веранэз ик ӧвӧл ни. Та ужпумъя но одно ужано.
Секыт югдур кылдэмын сирота нылпиослы квартираос висъянъя. Черод маке кузьда. Соослы квартира люкылон понна кулэ ог 200 миллиард манет. Но уксё бордын гинэ ужпум ӧвӧл — политика умойтэм. Застройщик гинэ но ӧвӧл, шуиз Анна Кузнецова. Соин ик али та ужпум борды но рос-прос басьтӥськыны медо.
Нылпилэн правоосызъя оскем мурт вуылӥз Ижысь реабилитация центре но. Татын нуналлы быдэ 255 пиналлэсь тазалыксэ юнмато. Анна Кузнецоваез возьмало ни вал «Журавейник» центрысь нылпиос. Инклюзивной медиа-клубысь нылпиос, гужем шутэтскон интыос сӧсыр пиналъёслы радъямын ӧвӧл, шуизы, пандусъёс уг тырмо шуыса ӝожтӥськизы. Сӧсыр нылпиослы школаосын но нылпи садъёсын интыос сярысь юалляськизы анай-атайёс но.
Туннэ семьяез утён, нылпилэсь улонзэ шудо карон ужпум валтӥсь интыын. Быдэстымтэ ужпумъёс трос на, но умой пала вамышъёс лэсьтӥсько ни, шуэ Анна Кузнецова.

Елена Сараматова

Ангелина Снигирева
By Ангелина Снигирева Июль 10, 2019 13:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<