Арган но кубыз

Ангелина Снигирева
By Ангелина Снигирева Июль 8, 2019 14:42

Эгра каргуртысь Лия но Дмитрий Лекомцевъёс быдэс шаермылы тодмо луэмын чебер кырӟаны быгатэменызы. Кузпалъёс кыкназы но культура удысын тыршо, Эгра ёрослэсь данзэ вылэгес ӝутыны юртто. Дмитрий Николаевич кылем арын пусъемын Удмурт Республикалэн Тӧроезлэн «Признание» премиеныз, нош Лия Алексеевнаез алигес сӥлы каризы Удмуртиысь Правительстволэн Данъян грамотаеныз.

Лия но Дмитрий Лекомцевъёс

Кырӟась

— Мон вордскемын Юкаменск ёросысь Балы гуртысь Невоструевъёслэн семьяязы. Мамае — Людмила Валентиновна — уйпалась удмурт, нош папае — Алексей Кузьмич — бесерман, — веранзэ мытӥз Лия Алексеевна. — Семьяямы ми 3 нылпиос будӥмы, братэ, мон но сузэре. 1-тӥ классэз артысь Ёжгуртын дышетскыса вуттӥ но, семьямы Глазов ёросысь Кожиль гуртэ улыны выжиз. Отысен шулдыр улонэ кутскиз. Школаын дышетскыкум, кытчы гинэ ӧй пыриськы: кырӟанъя-эктонъя кружокъёсы но ветлӥ, спортъя ӵошатсконъёсты ӧй кельтылы. Туж яра вал сцена вылын кырӟаны.
Бадӟым классъёсы ветлыкум, крезьгуро инструментъёсын шудыны дышетски. Нырысь ик гитара киям кутӥ, собере — арган. Со вакытэ ик гуртамы кылдӥз искусствоосъя школа, отчы но мыло-кыдо ветлӥ. Угось выжыысьтымы тросэз крезьгуро инструментъёсын шудыны быгатӥзы. Кылсярысь, бабамы Устинья Афанасьевна Горбушина, папамылэн мемеез, балалайкаен шудӥз. 92 аресозь улӥз, солэсь троссэ частушкаоссэ каль но кырӟаськомы куд-ог концертъёсамы. Папамы но крезьгурез умой шӧдэ вал. 16 арес дыръяз, комбайнэн ужакуз, сӧсырмыны шедем. Пал ки кылемез арганэн шудыны ӧз люкетылы. Туннэ солы 74 арес ни, юртъер котырын берга, ваньмон дыр шедьтыкуз, одно ик арганзэ кыскалоз. Со ик арганэз яратон мылкыд пыӵатӥз.
Школаез йылпумъякум, аслым зэмос артист кадь потӥсько ни вал, пӧртэм гуртъёстӥ концерт пуктыса ветлӥмы. Дышетскыны ик ӧй ваньмылы кадь. Но школаме умой йылпумъяй. Семьяямы мон гинэ сыӵе шумприч, котькытчы мыло-кыдо пыриськисько. Сузэрелэсь каль но юасько ке, со ассэ удмурт шуэ, нош мон ым бесерманъёслэн шаплызы лякиськем, вылды.
Пичи дыръям мынам туж потэ вал продавец луэме. Нош школаме йылпумъяса, малпасько вал Ижысь культурая колледже пырыны — папае ӧз лэзьы. Пичи на, пе, кыдёке кошкыны. Озьы со ӵектэмъя Глазовысь медициная училищее пыри. Дышетскыны туж кельшиз. Анатомия, физиология, фармацевтика, малэсь адями кылдэмын — ваньмыз туж тунсыко потылӥз. Нош аслам сюлмы сцена вылэ куриське. КУжрадъёсын группа но училище понна кырӟасько вал. 3 арлэсь ортчемзэ но ӧй шӧды кадь. Дышетсконме йылпумъяса, 1 арзэ гуртысьтымы фельдшер-акушер пунктын медсестра вал. Уже кельшиз кадь, нош артист луон сярысь лушкем малпанъёсы ялан сюлэмме бугыръязы.
Эшъёсы, тодмоосы но ялан артистэ дышетскыны косо — озьы ик лэсьтӥ. Ижевскысь культурая колледже дышетскыны шонтӥ. Отчы вуи но пайми, кудаз отделение пыроно шуыса: сояз но сюлэм кыске, таиз но матын потэ. Крезьгуро инструментъёсын шудыны дышетскисьёс ичигес кырӟало, пе. Со веранэз кылыса, кырӟасьёс пӧлы вамыштӥ. 3 арзэ кырӟаны дышетски, крезьгуро инструментъёсын но тодматски. Арганэн, балалайкаен, крезен, шуланъёсын, шумовой но ударной инструментъёсын шудыны быгатӥсько.

Пичи Лия

Шудӥсь

— Нош мон Эгра каргуртын вордскемын, анай-атае кыкназы но Балезино ёросысь, Андрейшур но Верх-Люк гуртъёсысь луо, — шуэ Дмитрий Николаевич. — Кузпалъяськемзы бере соос Эгра ёросэ улыны выжиллям, малпало вылэм Эгра каргуртын Лекомцев фамилия нуллӥсьёс ӧвӧл. Нош татын соос эшшо но тросгес вылӥллям.
Ми но семьяямы 3 нылпиос будӥмы, 2 нылъёс но мон — шорысез пинал. Крезьгур сярысь ке верано, милям но семьяямы кырӟасьёсмы но шудӥсьёсмы трос гинэ вал. Мамае Маргарита Вячеславовна ас вакытаз Воткаысь педагогической училищее пырыны медэ вылэм, баллъёсыз тырмымтэен, дораз бертэм. Родняосмы но ваньзы сямен шулдыр кырӟаны но крезьгуро инструментъёсын шудыны быгато, нош одӥгез дядяе — Олег Вячеславович Корепанов — «Италмас» ансамбльын баянист вал. Соослэсь адӟем карыса, мон но арган кысканы дыши. Бадӟым праздникъёс, сюанъёс дыръя арганэн шудылӥ.

Пичи Дмитрий

Крезьгурез валаны быгатонлыкъёсме шӧдыса, лэся, анай-атае монэ Эграысь крезьгуръя школае гожтӥллям. Отын дышетсконме куштылэме но вань. Анаелы тау карисько, тышкаськытэк гинэ берыктыны быгатӥз. Дышетскыны кутскид бере, йылпумъяно ни, оло, улонад кулэ луоз ай. Азьпал улонме тодыса кадь верам. Ӵапак крезьгурлы дышетскеме ик улонын монэ сюдӥсь луиз.
Пичи дыръям вожъяськыса учкылӥ поездъёс шоры, мынам машинист луэме потэ вал. Угось улӥмы чугун сюрес дурын. Вылаз ик Балезино ёросын улӥсь песянай-песятайёсмы доры поездэн бертылӥмы. Эсьмаса, вань эшъёсы шорам вожъяськыса учкылӥзы. Тыныд, пе, удалтэм, поездэн ворттылӥськод. Поездъёс шоры учкыса, туннэ но машинист луон мылкыд сюлэмме бугыртылэ. Но школаме йылпумъяса, дышетскыны пыри Ижысь культурая колледжысь оркестровой отделение. Оркестрысь вань крезьгуро инструментъёсын шудыны дышетӥзы. Озьы ке но арганэз номырин уг вошты. Ӵыжы-выжыосынымы пумиськонъёс дыръя одно ик арганме киям кутӥсько.
Колледжын дышетскыкум яратонме пумитай — Лияез. Мон шумпотыса шудӥ со понна, аслэсьтым малпам кырӟанъёсме быдэстылӥ, крезьгуро инструментъёсын шудылӥ, нош Лия кырӟасе вал.

Дэмен

Дышетсконмес йылпумъяса, кыкнамы ик Эграысь культурая юртэ (борысь со Эшъяськон юрт луиз) ужаны интыяськимы, — веранзэ азьланьтэ Дмитрий Лекомцев. — Милемыз Глазов городэ но, Вавож черкогуртэ но ужаны ӧтё, улон инты но висъялом шуизы вал. Сояз но, таяз но ветлэммы бере сюлэмы вордскем ёросам ик кыскиз. Уг ваты, туннэ но мукет ёросъёсы ужаны ӧтисьёс вань, но Эграме номырин воштэме уг поты.
Табере 17 арзэ ӵош ужаськомы: гуртын но, ужан но котьку артэ, ог-огмылы юрттӥськомы. Куд-ог эшъёсмы паймо, ог-огдылэсь уд акыльтӥське-а шуыса. Ужын ми — эшъёс, дорын — кузпалъёс. Эгра ёросын тросэз мукет кузпалъёс культура удысын ӵошен ужало.

Нылпиосынызы

Ар ужаммы бере «Раздолье» коллектив кылдытӥмы, мон кивалтыны кутски, ачим ик репертуар бырйисько, Дмитрий концертмейстерлэсь ужзэ быдэсъя, — итӥське Лия Алексеевна. — Пиналъёсын ӵош 13 кузя люкаськиськомы, покчиезлы 7 арес. Кырӟась анай-атайёссы сьӧры нылпиоссы лыкто. Ма, асьмелэсь но нылпиосмес сцена вылэ поттыны быгатӥмы ни. Кылем арын шумпотонмы йылӥз, коллективмы «Калык ансамбль» ним басьтӥз. Ӵемысь потаськомы Удмуртилэн палэназ конкурсъёсы, фестивальёсы. Коллективен потыны луонлык ум шедьтӥське ке, кузпалэным яке семьяенымы ӵош ужрадъёсы пыриськиськомы. Вунонтэм кылёз 2012-тӥ ар. Соку ми тужгес кыдёке потамы — Новосибирске, Г. Заволокин нимо «Играй, гармонь любимая!» конкурсэ. Обь шур дурын палаткаосын улӥмы, отысь бурдъяськем мылкыдын бертӥмы. Со дырысен арлы быдэ «Играй, гармонь любимая» конкурсэ ветлыны тыршиськомы, 1-тӥ степенё лауреатъёс луимы. 2016-тӥ арын Удмуртилэсь данзэ утимы Смоленскын ортчем «Голоса России» фестиваль-конкурсын. Таяз ужрадэ кузпалэным ветлӥмы, быдэстӥмы уйпал удмуртъёслэсь кырӟанъёссэс но песянаелэсь такмакъёссэ. Надежда Уткина ӧтемъя кунгож сьӧры но потамы. Швейцариын но Франциын концертъёс сётӥмы, та ужрадлы шуыса юри бесерман дӥсь вурытӥ. Адямиос сылыса кизэс чабизы.
«Раздолье» коллективын сяна, Дмитрий Николаевич каргуртысь мукет коллективъёсын, крезьгуръя школаын но аккомпаниатор луыса ужа на. Эграын кырӟась коллективъёс трос бере, котькудзылэн репертуаръёссы пӧртэмесь. Ми, кылсярысь, вашкала кырӟанъёслы туала шӧм пыӵатыны тыршиськомы. Гуртъёсы потаса, песянай-песятайёслэсь кырӟамзэс диктофонэ гожъяськомы но бӧрысь сцена вылын быдэстӥськомы.

Выльзэ утчасьёс

— Ужелэсь люкиськытэк ик, вылӥ образование басьтӥ, — шуэ Лия Алексеевна. — Удмурт кун университетысь искусствоя но дизайнъя институтэз горд дипломен йылпумъяй. Татын ик аслым выль удыс усьтӥ, шуыны луоз. Историяя кафедраысь дышетӥсь Вера Болдырева ӝыныё бесерман луисько шуыса тодӥз но, бесерман крезен (кырӟанъёсын) тодматскыны ӵектӥз. Магнитофон лентаысь крезьгурез кылӥ но, сюлэмы ик олома луиз кадь. Выльысь но выльысь кылзыса, ачим но кырӟаны кутски. Бесерман крезьёс капчиен сётскизы.
Отӥяз кубызлы синмаськи. Мадьяр воргорон Миклош Деметер, Ижевске вуылыкуз, паймытӥз та инструментэн шудыны быгатэменыз. Нош мон соку ик малпаськонэ уси, нош удмуртъёслэн таӵе инструментсы ӧй вал шат? Кубыз сярысь утчаськонме диплом ужелы пӧрмытӥ. Кез ёросэ экспедициен потакумы кубызлэсь люкетъёссэ шедьтӥмы.

«Раздолье» калык ансамбль

Пӧртэм инструментъёсын шудыны быгатӥсько вал ке но, кубыз борды басьтӥськемелэсь азьло кема малпаськи, нош шудыны пӧрмыто меда? — шуэ Дмитрий Лекомцев. — М. Деметер буйгатӥз, крезьгурлы дышетскем муртъёс но шудыны быгато. Вераны гинэ капчи вылэм, нырысетӥ гур пуктытозь, кема курадӟи. Чидатэк кӧня ке пол киысьтым кубызме куштылӥ но — но ворми. Табере со милям удалтонлык но вормон вайись инструментмы. Бадӟым фестивальёсын арганэн калыкез уд паймыты ни, нош кубызмес адӟо ке, адямиос мушъёс кадь котырамы люкасько. Эсьмаса кубызэн ӵош, арганлэн куараез ик воштӥське кадь.
Новосибирске ветлыкумы, вань калыкез паймытӥмы. Соку ми мушъёслэсь кырӟанзэс быдэстӥмы. Куазь зороно кадь луиз, пеймыт пилемъёс котырамы люкаськизы, лек тӧл палаткаосмес ӝутыны выре, нош милемлы концерт пуктоно. Кубызэн шудыкумы, тӧл воштӥськиз, пилемъёс палэнтӥськизы. Со дырысен оскыны кутски, инкуазь но крезьгур куспын маке но огазеясез вань шуыса. Кубыз — со туж ненег инструмент. Адямиослэн соин шудыны мылкыдзы вань кадь, но ваньмыз крезьгур пӧрмытыны уг быгато. Шудыны мылкыд карисьёс понна семинаръёс ортчытъясько. Вашкала дыръя, пе, сюанын кубыз куара уг ке чузъяськы вылэм, юмшанзэс пуны сюан шуылӥллям.

Семья ке юн…

— Артистъёслэн улонзы ялан сцена вылын, одӥгез ужрад ортче гинэ, мукетызлы дасяськоно. Озьы нуналлы быдэ, — шуэ Лия Алексеевна. — Дмитрий Николаевич 9 часысен 20 часозь ужа, концертъёслы дорын но ӵошен дасяськиськомы. Ярам коть, кыкнамы ик культура удысын ужасьёс, ог-огмес капчиен валаськомы. Адямиос уйин, пыс-пыс кӧло, дыр, нош милям крезьгуръёсмы кылдо. Дмитрий Николаевичлэн миндэр улаз котьку но диктофонэз улэ. Уйшоре султоз но крезьгурзэ плёнка вылэ гожтоз. Солэн дасо мында кырӟанъёсыз вань ни. Калык но ялан маке выльзэ вите, нош крезьгурез юри пуксьыса уд малпа, солы дарт (вдохновение) кулэ.
Ваньмон дыръям пӧраны яратӥсько, вуриськыны йӧндырисько, нош Дмитрий Николаевич юрт котыр. Кӧня ке ар ӵоже юрт пуктыны выриськомы ни. Лэсьтӥськонмы йылаз-пумаз вуттэмын ӧвӧл ке но, улӥськомы ни. Ӝӧк, пуконъёс но ачиз лэсьтӥз. Куддыръя, пилаен ужакуз но, йыраз крезьгуръёс лыкто.

Гуртын улон туж яра, ульчае пот гинэ, котькытын крезьгур чузъяське, — вераськонамы нош ик итӥське воргорон. — Скал бӧксэ ке, пель сьӧрам соку ик «ми» нота кылӥське, тепловоз ортче ке — «фа», нош туэ милям бакчаямы уӵы каръяськиз. Нуналлы быдэ шулдыр гуреныз милемыз шумпоттӥз. Солэсь кырӟамзэ кылзыны юри бакчае потай.

Сцена пото нылпиоссы но

Крезьгурез валан, сое гажан мылкыд нылпиосмылы но пыӵатыны тыршиськомы, — шуэ Лия Лекомцева. — Милям 3 пиосмы будо. Зӧкъёсыз (бадӟымъёсыз) — Степан но Игнат — сцена вылэ потало, крезьгурез валанзы юн шӧдӥське. Озьы ке но Степанмы югдурез утён удысэз бырйыны малпа, та вакытэ кадет классын дышетске, нош Игнатмы спортэн эшъяське. Покчиез пимы — Архип, солы 4 арес. Таизлы нимысьтыз учкон кулэ, тазалыкез лябгес, эмъясьёс солэсь висёнзэ 1 арес котыраз гинэ шараязы. Малпаськонэ усисько, оло, атае вазь ик тае шӧдэм, оло, соин но егит дыръям монэ эмчилы дышетскыны косэм. Медучилищеын дышетскеме пимес утьыны юрттэ.
Улонамы ваньмыз умой луысал ке, оло, Иже концертъёсы но ӵемгес вуылысалмы. Быгатонлыкъёсме сцена вылын быдэсак возьматыны луонлыкъёсы ӧвӧл кадь потэ. Одӥг нуналлы гинэ концертэн ветлӥськомы ке, зӧк пиосмы пичи вынзэс учко, кыдёкегес ке потӥськомы, кудзэ ке мамамес ӧтиськомы.
Ӝожтӥськыса пукыны милемлы маза ӧвӧл. Дмитрий Николаевич ялан сцена вылын шуыны луоз. Ваньмон дыр шедьтэ ке, пиосынымы ӵош велосипедэн ворттылыны яратэ. Озьы соос мугорзэс но кыдато, Эгра ёрослэн дано интыосыныз но тодматско.
Мон но аслым мукет уж шедьтӥ на. Берло аръёсы Эгра ёросын улӥсь бесерманъёслэн азьветлӥсьсы луисько. Лыдпусъёсъя эскерыса потоно ке, ёросын 11 бесерманъёс лыдъясько, нош ми 16 кузя люкаськимы ни. Бесерман луэмме тодыса, Балезино, Юкаменск палась вуэмъёс асьсэос дорам лыкто. Ёросысь огазеяськонмы юн кусып возе Балезино ёросысь Юнда гуртысь бесерманъёсын. Пумиськонъёс но ортчытъямы ни.

Валентина Емельянова

Ангелина Снигирева
By Ангелина Снигирева Июль 8, 2019 14:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<