Адӟымон луод, вольыт вераськыса

Ангелина Снигирева
By Ангелина Снигирева Июль 31, 2019 17:02

«Театральной Приволжье» фестиваль улсын Удмуртиысь калык артист, Россиысь дано артист Александр Мустаев пиналъёслы мастер-классъёс ортчытӥз.

А. Мустаев мастер-класс возьматэ
Фото: Э Карипов

Сцена вылын вольыт вераськыны А. Мустаев дышетӥз «Лесная страна» но «Лесная сказка» лагерьёсын шутэтскись нылпиосты. Дано артист соосты нырысь ик индылӥз: сцена вылын гинэ чебер, ваньмызлы валамон вераськоно ӧвӧл, котьку тыршоно аслэсьтыд малпанъёстэ дыг-могъёстэк шараяны.

— Асьмеос ваньмы вераськыны быгатӥськом, но одӥг муртэ кема кылзэм потэ, мукетызлэсь — пегӟем. Огзэ капчиен валаськод, мукетсэ — мырдэм, — вераз Александр Гаевич.

Артистэн ӵош пиналъёс куараосты шонер вераны дышетскизы: гласной куараосты нёжъязы, согласной куараосты могатэк вераны тыршизы. Со понна ӝогверанъёсты дышетӥзы, нылпи кылбуръёсты тодазы вайизы. Пиналъёс мугоръёссэс золтылӥзы, круген бызьылӥзы — шонер вераськон понна, кылэз сяна, мукет быгытъёсты но ужатоно, пе. Со сяна, Александр Гаевич ачиз аспӧртэм кылъёс малпалляз, пиналъёсын ӧвӧлтэм (вымышленной) кылын вераськиз — озьы интонацизэс шонер пуктыны дышетӥз. Адӟымон адями луэмед потэ ке — шонер вераськы, пусйиз А. Мустаев.

Александр Гаевич Удмуртиысь Театр удысын тыршисьёслэн союззылэн кивалтӥсез луэ, пиналъёсын сяна, артистъёсын но журналистъёсын ужа.

— Театрлэн араз синмаськымон адӟисько любительской коллективъёс, — вера А. Мустаев. — Пиналъёс но театре кыстӥсько. Сцена вылын шорен вераськонъя трос урокъёс ортчытъясько. Нырысетӥ занятие — со вольыт вераськонэн тодматскон гинэ, соку нылпилэсь чебер вераськыны мылкыдзэ ӝуатоно. Куд-огезлэн син азьын мылкыдыз пуроме. Но одӥг час ӵоже гинэ дышетскем бере вераськон соку ик чебер уз луы — со понна азьланяз трос тыршоно луоз на.

Пиналъёс дано артистлэсь трос выльзэ тодӥзы, ӟеч мылкыд басьтӥзы. Угось А. Мустаев серекъятӥз но, шудӥз но. Пиналъёс огкылысь верало: секыт вылэм шонер вераськыны. Занятие бере соос малпаськонэ усизы: макем шонер меда соос верасько? Куд-огез валаз, кыӵе куараос бордын солы нимысьтыз ужано, мукетыз выль ӝогверанъёсты дышетэмезлы шумпотӥз, азьланяз артист луыны мылкыдзэс шараясьёс но вал.

Анастасия Шумилова

Ангелина Снигирева
By Ангелина Снигирева Июль 31, 2019 17:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<