Чемпионатлы дасяськизы Ижын

Ангелина Снигирева
By Ангелина Снигирева Июнь 26, 2019 16:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Чемпионатлы дасяськизы Ижын

Июне Ижысь А. Демидов нимо спорткомплексын мугорзэс кыдатӥзы Россиысь биатлонъя сборной командаысь нылкышноос. Спортсменъёс тросгес ужазы суй кужымзэс будэтон но лэчытгес ыбылӥськон бордын.

Синмаськымон нылъёс

Ижевске лыктэмын вал 11 спортсменъёс но соослэн тренеръёссы. Удмуртиысь Биатлонъя федерациен кивалтӥсь Иван Черезов верамъя, асьме доры спортсменъёс малпамтэ шорысь вуэмын: быдэс арлы планазы Ижын ортчоно сбор пусъемын вылымтэ. Нош Удмуртиын мугор кыдатон понна ваньмыз дась: бызьылон сюресъёс ӟечесь, ыбылӥськон интыос вань куронъёслы тупало, шугъяськонъёс кылдэмын вал улон интыен гинэ. Биатлонъя федерация югдурысь потон амал ӝог шедьтӥз. Нылъёс улӥзы спорткомплекслы матысь одӥгаз гостиницаын, нош сиськизы комплексын ик.

И. Черезов

— Спортсменъёслэн быдэс нуналзы часэн-минутэн лыдъямын, — шуэ Иван Черезов. — Нуналзы кутске 7 час 15 минутэ зарядка бордысен, 8, 13 часэ но 18 час 30 минутэ сисько. Нуналаз 3 пол тренировка: 9 часыен 13 часозь, 16 часысен 18 часозь но ӝытазе сиськемзы бере. Арняяз 1 нуналзэ шутэтско. Озьы быдэс сборзы ортче. Биатлонистъёслэн та нырысетӥ сборъёссы вал бере, ваньмыз лыктыны ӧз быгатэ, кин ке тазалыксэ юнматэ, кин ке дышетсконзэ азинтэ. Али спортсменъёс тросгес пыдын бызьылӥзы, гужемлэн 2-тӥ ӝыныяз куас бодыосын бызьылозы-тэтчалозы но питрано куасъёс вылэ ӵемгес султылозы.
Ижын сборъёслы тужгес шумпотэмын вал можга нылъёс Ульяна Кайшева но Валерия Васнецова.

— Берло аръёс ӵоже таиз сборе тужгес шумпотымонэз, бызьылон сюресъёс туж тодмоесь, — шуэ Ульяна. — Ваньмыз малпамъя ортче, 1 пол гинэ зор люкетӥз, тренировка дыръя 10 минут ӵоже зориз. Тол ӵошатсконъёс йылпумъяськем бере 2 толэзьзэ гуртам шутэтски, тазалыкме юнматӥ. Шутэтскон нунал шедьыку, али но Можгае бертылӥсько.
Нош Валерия Васнецова шутэтскон нуналъёсы Чайковский городэ дыртэ. Со татысь физкультурая институтэз йылпумъя, спортивной менеджер луыны малпа. Та вакытэ диплом ужзэ утьыны дасяське.
Нылъёс пӧлын вал на Евгения Павлова, Лариса Куклина, Светлана Миронова, Виктория Сливко, Наталья Гербулова, Кристина Резцова но мукетъёсыз. Спортсменъёс Ижевске потазы, музейёстӥ но Иж ӵыпет дортӥ ортчизы, чеберъяськон салонъёсы но магазинъёсы пыразы. Кызьы вераз Евгения Павлова, городын улӥсьёс спортсменъёсты тодмало, кинюртэмзэс куро, фотое пуксё. Удмуртия, пе, спортэн эшъяськись шаер, туж синмаськымон.

Суй кужымзэс будэто

Чибинь уг нориськы

Спортсменъёслэсь огзэ тренировказэс вань мылкыд карисьёс учкыны быгатӥзы. Нылъёс шоры вожъяськыса учкизы шаерысьтымы покчи спортсменъёс.
Со понна спортсменъёс тренировкаоссылэсь оглюкетсэ возьматӥзы. Нырысь ик 2 минут ӵоже суй кужымзэс будэтӥзы. Борддор борды нимысьтыз юнматэм станокъёсын ужазы, резина кыскаса. Собере ваньзы дыртӥзы ыбылӥськыны. Нырысь ик 5 пол ыбо патронъёстэк, собере — патронъёсын. Со вакытэ тренер шара лыдъяське. Ыбылӥськыны, пе, кутскыны кулэ шорлыдын 8 секундысен, нош рубежысь потыны кулэ ни 24-26 секунд куспын. 11 спортсменъёс огвакытэ ыбылӥсько, 55 мишень полысь ӵемысь ваньмыз пытсаськылэ, куд-ог дыръя гинэ 3-4-ез уг ворсаськы. Озьы нылъёс ыбылӥськизы я выдыса, я сылыса быдэс час ӵоже.

Россиысь биатлонъя нылкышно командалэн валтӥсь тренерез Виталий Норицын

— Азямы пуктэм ужпумъёсты ваньзэ малпаммыя быдэстыны кылдӥз, — шуиз Россиысь биатлонъя нылкышно командалэн валтӥсь тренерез Виталий Норицын. — Трасса паськыт, ыбылӥськон станокъёс 40 муртлы чакламын, куазен удалтӥз. Мукет улосъёсын чибиньёс, векчи кутъёс норисько, татын соос малы ке ӧвӧл. Тросгес саклык висъямы мугорез кыдатонлы. Угось сентябрь толэзь пумын Чайковский городын гужем биатлонъя Россилэн чемпионатэз ортчоз.
Матысь дыре биатлонисткаослэн сборъёссы Чайковский городын радъяськозы на, собере Сочие мынозы, отӥяз — Тюмене но кунгож сьӧры. Россиысь тренеръёс оскытӥзы, кытын ке сборъёс ортчытонлы люкетӥсьёс луизы ке, оло, нош ик Ижевске, пе, вуомы ай.
Арлы быдэ декабрь толэзе Ижевскын ортчылэ «Ижысь винтовка» ӵошатскон. Таяз учыре со 50-тӥзэ радъяськыны кулэ. Солы дасяськон шаерамы мытэмын ни. Шаерысьтымы кивалтӥсьёс та вакытэ кенешо спорткомплекслэсь гостиницазэ тупатъян сярысь. Улон интыос вылӥ куронъёслы тупазы ке, «Ижысь винтовкаын» нылкышноос но бызьылозы, угось берло дыре соос Чайковский городын ӵошатско.

Валентина Емельянова

Ангелина Снигирева
By Ангелина Снигирева Июнь 26, 2019 16:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<