Чебер гуртын — чебер калык

Ангелина Снигирева
By Ангелина Снигирева Июнь 11, 2019 16:12

Россиысь Чебер гуртъёслэн огазеяськонзылэн кивалтӥсез Александр Мерзлов, Кун Думаысь депутат Николай Николаев но Удмуртиысь Правительстволэн Тӧроез Ярослав Семёнов вуылӥзы Пичи Пурга ёросысь Брангуртэ но Эгра ёросысь Сэп гуртэ.

Кивалтӥсьёс Брангуртэн тодматско

Гуртъёсын тодматскыса, ассоциациысь экспертъёс малпаськозы: пыртоно-а удмурт гуртъёсты тужгес чебер гуртъёс пӧлы?
Я. Семёнов верамъя, Брангурт но Сэп — Удмуртилэн марӟанъёсыз. Та чебер гуртъёсын чебер адямиос уло. Сэпез элькунамы но Россиын умой тодо, нош Брангуртлэн нимыз быдэс дунне тыр но чузъяське, пусйиз Я. Семёнов.
10-тӥ июне эспертъёс тодматскизы Брангуртэн. Куноос нырысь ик пыразы Дун-сьӧлыктэм Троицалэн храмаз. Брангуртын черк 1860-тӥ арысен ужаз, но 1939-тӥ арын юртсэ куашкатӥзы. Черк выльысен улӟиз Брангуртысь песянайёслы луыса. Соослэн тыршеменызы, 2012-тӥ арын храмез пуктыны кутскизы, нош 2016-тӥ арын Сарапулысь но Можгаысь епископ Антоний литургия ортчытӥз но выль храмез вӧсяз. Али храм вӧзын куноослы улон-вылон корка лэсьто. Я. Семёнов оскытӥз, Брангуртысь песянайёслэсь кичӧлтонъёссэс быдэстыны элькунмы азьланяз но юрттоз шуыса.
Делегация песянайёсын гуртысь культурая юртын пумиськиз. Песянайёс куноослы тодмо кырӟанъёсты удмурт кылын быдэстӥзы, улон-вылонысьтызы пӧртэм учыръёсты мадизы.
Куноос озьы ик тодматскизы Александр Пилинлэн музей-галереяеныз: кибашлы басмалэсь но гынлэсь киужъёс пӧрмытэ. А. Пилинлэн гындыса лэсьтэм дӥсез Парижын ортчем Pret-a-porter выставкаын возьматэмын вал, коллекция озьы ик Европаысь мукет каръёсы, Америкае но Австралие вуылӥз.
11-тӥ июне экспертъёс Сэпе вуылӥзы, татысь Бырем гуртъёслэн калык музеенызы тодатскизы. Та музей вера 7 бырем гуртъёс сярысь. 2016-тӥ арын музейын ужасьёс, В. Потанинлэн благотворительной фондэзлэн «Воштӥськись дуннеын воштӥськись музей» конкурсаз проектэнызы пыриськыса, грант утӥзы, со коньдонэн музей лэсьтӥзы.

Гуртъёс чеберско

Йӧно тус — трос коньдон

Пыртозы-а Брангуртэз но Сэпез Россиысь тужгес чебер гуртъёс пӧлы? А. Мерзлов верамъя, гуртъёсты нырысь котыр ласянь эскероно.
Ми чакласьком, макем юртъёс адӟымонэсь, инкуазь шулдыр, калыклэсь пумитамзэ, утялтэмзэ учкиськом, — валэктӥз А. Мерзлов. — Удмурт гуртъёс куно пумитаны быгато вылэм. Но, со сяна, милемлы эскероно: вань на-а татын вашкала гурт улон-вылонлэн тодметъёсыз но азинске-а туризм. Озьы ик гурт калык огазеяськонамы пырыны мылкыдзэ огкылысь вераны но милемлы куриськон келяны кулэ.
Н. Николаев верамъя, «Россиысь чеберез гурт» ним та гуртъёсы тросгес туристъёсты кыскоз. Нош со умой экономика понна: коньдон вуэ, выль ужан интыос кылдо.
Историез учконо ке, лачак гуртъёс Россиын ышемын-быремын, — вераз Н. Николаев. — Нош мукетъёсыз кема дыр ӵоже пушъё но азинско, дырлы, политикаысь югдурлы уг сётско. Кызьы озьы пӧрме? Та гуртъёсысь адямиос, асьслэсь культуразэс утьыса, сям-йылолъёссэс чакласа, инкуазез гажаса уло. Соин валче экономиказы но азинске. Та гуртъёслэсь адӟем кароно. Нош Россиысь Чебер гуртъёслэн огазеяськонзы таӵе интыос сярысь иворез вӧлмытыны юрттэ.

Сергей Захаров

Туспуктэмъёс басьтэмын udmurt.ru сайтысь

Ангелина Снигирева
By Ангелина Снигирева Июнь 11, 2019 16:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<