«Чеберайлы» — 2 миллион манет

Ангелина Снигирева
By Ангелина Снигирева Июнь 11, 2019 14:30

Кызьы радъяськоз удмурт нылкышнолы сӥзем марафон

«Удмурт Кенеш» огазеяськонлэн нылкышно творчествоя «Чеберай» проектэз Президентэзлэн фондэзлэсь грантсэ утӥз. Озьы удмурт нылкышно чеберлыклы, творчестволы сӥзем марафонэз ортчытыны 2 миллион 580 сюрс манет висъяськоз. Кенешиськом «Чеберай» проектлэн автореныз но кивалтӥсеныз Ксения Широбоковаен.

— Таӵе бадӟым проектъёсты гожтон но улонэ пыӵатон понна кулэ ӟеч команда. Кинъёс отчы пыро?

— Проект бордын 3 кузя ужамы. Туж юрттӥзы «Удмурт Кенеш» огазеяськонлэн секретарез Алевтина Чиркова но Калык творчествоя элькун коркалэн директорезлэн воштӥсез Мария Якунькина. Проект республикаысьтымы вань 25 ёросъёс пыр потоз, 3 сюрслэсь трос нылкышноосты огазеялоз. «Чеберай» — «Удмурт Кенешлэн» но Калык творчествоя коркалэн проектэз. Юрттӥсьёсмы пӧлын озьы ик Удмуртиысь Культурая министерство, партнёръёсмы — Нациосын ужан политикая министерство, «Удмурт нылкышно кенеш» огазеяськон.
Проектмы туэ пӧсьтолэзьысен вуоно арын ноябрь толэзёзь мыноз. Али ужаськом ни конкурсъёслы логотипъёс дасянь бордын. «Чеберай» проектын ужрадъёс 3 ӧръя радъяськозы: «Интерчеберай» Интернет конкурс, чеберлыкъя но творчествоя «Чеберай» конкурс но нылкышноосты ужбергатонэн герӟаськем проектъёс гожъяны, блогъёс нуыны дышетон.

— Малы проектэз одно ик нылкышноосын герӟаны малпады?

— Мон ачим творчествоеным трос пол пыриськылӥ но вормылӥ пӧртэм ужрадъёсын. Шаркан ёросамы 2006-тӥ арын «Чеберина» конкурс ортчыку, отчы нырысьсэ пыриськи, нырысетӥ инты басьтӥ. Нош 2010-тӥ арын республикаямы ортчем «Чеберина» конкурсын ворми. Вуоно араз Удмуртилэсь данзэ ути фин-угор нылъёслэн Пермьын ортчем «Уйпал кизили» конкурсазы. Отын но нырысетӥ инты басьтӥ. Озьы нылкышно чеберлыклы сӥзем конкурсъёс пыр потыса, мон туж умой адӟи соослэсь тырмымтэоссэс. Конкурсын вормиськод, тыныд мар ке кузьмало, йырад корона поно, но азьланезлы со номыр уг сёты. Мынам потэ вал, та ӵошатсконъёс нылкышнолы азинскон ласянь пайдаё мед луозы. Возьматэме потӥз удмурт нылкышнолэсь пуш дуннезэ — гуртъёсын кыӵе но быгатӥсь, визьмо, сабырлы кышномуртъёс ӧвӧл ук! Творчество юрттэ соослы кужмогес луыны. Нылкышно котькыӵе ужез мед быдэсъялоз, со — чеберай. Озьы луыны кулэ.

— Мынам тодэмея, «Чеберай» проектэ пыриськыны быгатозы пӧртэм арлыдъем кышномуртъёс, коть 18, коть 70 арес мед луоз. Туж тунсыко, кызьы ачиз ӵошатскон радъяськоз но кызьы устоосыз пӧлысь устооссэ быръёды?

— Верай ни вал, конкурс 3 ӧръя радъяськоз. Августэ кутскоз «Интерчеберай». Отчы вань удмурт нылкышно блогеръёс, гуртысь огшоры нылъёс, нылкышноос, песянайёс пыриськыны быгатозы (16 арескысен кутскыса). «Интерчеберай» ӵошатскон марафон выллем ортчоз Инстаграм интернет вотэсын. Арнялы быдэ нылъёслы выль заданиос сётъяськозы, шуом, асьсэ гуртсы сярысь мачконо (верано), асьсэ калыксы, удмурт луэмзы, удмурт калык пӧрамъёс сярысь. Гожъяно одно ик 2 кылын — ӟуч но удмурт. Туж потэ на вал англи кылын но карем, но гуртоос понна со секыт луоз, малпасько. Инстаграм будэс дуннее вӧлмемын. Озьыен, «Интерчеберай» ӵошатскон пыр удмурт кыллы, удмурт культуралы быдэс дуннелы адӟымон реклама лэсьтэмын луоз.
«Чеберай» проектлэн 2-тӥ этапез сентябре кутскоз. Толэзьлы 3 пол поталомы республикаысь пӧртэм ёросъёсы, нылкышноослы сӥзем форумъёс ортчытъяломы. Со форумъёс мыныку, котькуд ёросын быдэн 2 ужрад ортчоз: нылкышноосты дышетонъя мастер-класс но «Чеберай» конкурсэ отборочной тур. Кинъёс пыриськозы мастер-классэ? Вань мылкыд карись нылкышноос, арессы лыдэ уз басьтӥськы. Татын соослы бизнес-проектированиея мастер-класс ортчытозы, Интернетын блогъёс нуыны дышетозы. Зэм, инты луиз ке, быгатозы пыриськыны пиосмуртъёс но.
Нош «Чеберай» конкурсэ пыриськись нылкышноос 3 группалы люкемын луозы: 18 аресысен 30 аресозь, 30 аресысен 50 аресозь но 50 арес но солэсь бадӟымъёс. Отборочной турын котькудӥз ассэ, быгатонлыкъёссэ возьматыны кулэ. Одно ик возьматоно луоз киужъёссэ, творчествозэ но. Конкурсэ пыриськисьёслэн ужъёсынызы адӟытон радъяськоз.
Туэ сентябрь толэзьысен вуоно арын март толэзёзь ми ортчом вань 25 ёросъёсты. Котькуд ёросын 3 чеберай быръемын луоз. Март толэзе кутскоз соослы Интернет пыр куара сётон. Со куара сётон бере быръемын луоз 10 вормись. Пӧлысьтыз 8-эз — 18-30 аресъемъёс, одӥгез — 30-50 аресъем но эшшо одӥгез — 50 арес но солэсь бадӟымъёсыз пӧлысь.
10 вормись сярысь профессиональной видеороликъёс кылдозы. Со съёмкаос сӥземын луозы удмурт сям-йылолъёсты утёнлы. Та ужрадъёс бере нылъёс финаллы дасяськозы ни. Финалэ 8 нылаш пыриськоз. Таиз ужрад зэмос бадӟым праздниклы пӧрмоз, ортчоз со 2020-тӥ арын ноябре. Татын нылъёсты пӧртэм испытаниос витёзы: удмурт костюмен дефиле, йырвизьзэс сынан но мукет. Ужрад бадӟым гала-концертэн йылпумъяськоз. Со Удмуртилэн кунлык басьтэмез дырысен 100 ар тырмонлы сӥземын луоз.

— Вожвылъяськон ёросъёсысь, гуртъёсысь нылъёс понна гинэ-а? Шуом, Ижкарын яке воксё мукет улосын улӥсь удмурт нылъёс пыриськыны быгатозы-а?

— Проект чакламын гуртъёсысь удмурт нылкышноослы. Но городъёсын улӥсь удмурт нылъёслэн отчы пырськемзы потэ ке, заявкаоссэс матысь ёрос пыр сётыны быгатозы. Озьы ик республикалэн палэназ улӥсь удмурт нылъёс. Шуом, Татарстанын, Башкортостанын, Перм улосын туж тунсыко, творчество котыре кыстӥськись нылъёс вань.
Вераме потэ на, «Чеберай» проект йылпумъяськем бере солы сӥзем «Женское творчество Удмуртии» яркыт журнал поттэмын луоз. Эшшо — вормисе потэм нылъёслэн туспуктэмъёсынызы календарь Интернетын кылдытэмын луоз «Чеберай» клуб. Конкурс мыныку, та клублэн вотэс бамаз проектэн герӟаськем пӧртэм иворъёс луозы. Нош берло ини со пыр тодыны луоз Удмуртиын но Россиын нылкышноослы сӥзем ортчись ужрадъёс сярысь.

— Туж умой, нылкышно чеберлыклы сӥзем конкурс выльысь улӟиз, паськытгес но мургес пуштросэн тырмиз шуыса. Нош проект йылпумъяськиз ке, конкурс сярысь нош ик вунэтозы…

— Уз. «Чеберина» конкурсэз азьланяз 3 арлы огпол ортчытъяломы. Но таиз сярысь вераськыны вазьгес ай. Али ми нылкышноослы вазиськиськом, туэ конкурсамы мыло-кыдо мед пыриськозы. Удмурт кышномуртлэн туж мур пуштросэз, чебер сюлэмыз, зарни киосыз. Соин ик удмурт кышномурт вылтус ласянь гинэ ӧвӧл, пуш дуннеезъя но — зэмос чеберай.

«Удмурт Кенеш» огазеяськон Президентлэн фондэзлэн грантъёсыз понна конкурсын 2014-тӥ арысен воромисе поталля. Озьы улонэ пыӵатэмын гуртысь шуге-леке вуэм удмурт семьяослы сӥзем «Тангыра» проект, нылпиез огдыре ик 2 кылын дышетонлы сӥзем «Билингва» но фин-угор эктонъёслы сӥзем «Мост» проектъёс.
Туэ Президентлэн фондъёсысьтыз грантъёс сётонъя конкурсын Удмуртиысь 26 проект вормисе потӥз. Соосты пыӵатонлы 27 миллион 441 сюрс 450 манет сётӥськоз. Оглом конкурсын Россилэн 84 улосысьтыз 1 сюрс 644 огазеяськонлэн проектэз вормисе потӥз. Фондлэсь грантъёссэ басьтонъя туэ ар понна 2-тӥез конкурс кутскоз ни 10-тӥ июне. Заявкаосты сётыны луоз 31-тӥ июнёзь.

Елена Миннигараева

Ангелина Снигирева
By Ангелина Снигирева Июнь 11, 2019 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<