Хоккей — визьмо воргоронъёслэн шудонзы

Ангелина Снигирева
By Ангелина Снигирева 26 июня, 2019 13:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кемалась ик ӧвӧл Словакиын хоккейя дунневыл чемпионат ортчиз. Спортэн висисьёс финалын Россилэсь но Канадалэсь пумиськемзэс витизы. Озьы луоз шуыса, малпаз вал Константин СОКОВИКОВ но. Юниор дыръяз со хоккеен рос-прос шудӥз, Канадалэн чемпионэз но луылӥз. Но жаляса верано, Россия финалэ ӧз поты. Маин Россиысь но Канадаысь хоккей пӧртэм луэ?

Константин Соковиков

— Кызьы тон, Ижкарын вордӥськем но будэм пияш, Канадае вуид?

— Канадае монэ хоккей ик вуттӥз. Азбарысьтымы вань пиос хоккеен шудо вал, мон но пӧртэм-а мар-а шуыса малпай но 10 аресам хоккеен вырыны кутски. Пӧрмытӥсько вал, тренеръёс но ушъяллязы. 15 аресозям мон «Ижсталь» понна шудӥ. Собере Уфае ӧтизы, кошки, угось отын командазы золгес. Ӝыны арзэ отын быгатонлыкъёсме будэтӥ. Тренеръёс ӝуась синъёсме адӟыса, дэмлазы Канадае хоккея школае кошкыны. Дышетскон дунтэм ик уз сылы, пе, толэзяз 2 сюрс доллар тыроно. Атаеным кенешимы, луонлык вань бере, мыноно, малпамы. Отын дышетскыкум ини Онтариоысь хоккейной лигаын шудыны кутски.

— Выль кунлы но командалы дышыны секыт-а вал?

— Канадае вуэмме мон «кошмар» шуисько. Пукты син азяд: мыным 16 арес, мон огнам Торонто аэропортын. Отын сюрс пала регистрационной стойкаос, туж бадӟым аэропортсы, пумтэм-йылтэм кожалод. Мынам гожтыса кельтэмын вал, кытчы мыноно, кин монэ пумиталоз. Но мон англи кылэз уг тодӥськы бере, долкаса сылӥсько ини. Киысьтым клюшкаме, экипировкаен сумкаме адӟыса, кыӵе ке воргорон хоккей сярысь юалляськыны кутскиз. Ярам «хоккей» кылэз ке но валасько вал. Со воргорон ик мыным юрттӥз, кулэ интые нуиз, нош отын выль командаысь адями монэ вите ни вылэм.

Канадецъёс пӧлын улыса, кылзылы но, сямъёссылы но ӝог дышиськод, ачид но соос кадь ик луиськод. Мыным отын умой вал. Командаямы оглом 80 адями. Отын гинэ мон валай, мар со зэмос команда: мушкетёръёслэн сямен — «один за всех и все за одного».

Яратылӥ тренерен «тон» шуыса вераськыны. Мон валасько, со кылзылэн аспӧртэмлыксы шуыса, но озьы капчигес шудыны но, кусыпъёсты юнматыны но.

— Командаяд 80 адями вал шуиськод, нош шудонэ 20-ез гинэ потэ ук. Кызьы сомында адями пӧлысь бырйылӥзы?

— Шудонэ поттозы созэ, кинлэн синъёсыз ӝуало, кин али золгес шудэ, кин ассэ уг жаля. Ӵок, тон чебер нискыласькод, шайбаез олокызьы но бергатыны быгатӥськод шуыса, вормон понна ӧд ке нюръяськы, команда понна котьмалы дась ӧд ке луы, номырид уз пӧрмы. Канадае лыктон азям мон умой нискыласько гинэ вал, нош татын вожвылъяськыны но шудыны дышетски. Сямы но кыдаз, валай, кутскем ужез ноку куштыны уг яра, пумозяз вуттоно шуыса.

Россиен ӵошатоно ке, Канадаын воксё мукет сямен хоккеистъёсты будэто. Асьмелэн хоккеист 16 аресаз туж ик ӟеч шудыны уг пӧрмыты ке, шуо: «Жаля астэ но, милемыз но, кошкы хоккейысь». Нош Канадаын верало: «16 аресын тынад ваньмыз кутске гинэ, оскы аслыд». Отын пинал дырысен вормисьлэсь психологизэ пыӵато. Малы соос сокем хоккеез ярато? Малы быдӟым ӵошатсконъёсын ваньзэс вормыло? Соин сэрен гинэ.

— Нош малы хоккеез куштӥд?

— Йырыным малпаськытэк, мылкыдъёсы сьӧры кошки. Кожалляй, табере ваньзэ тодӥсько, быгатӥсько. Ар но ӝыны Канадаын шудыса, 18 аресам Удмуртие бертӥ. Малпай, татын мон трос шудо, бадӟым уждун басьто. Азьло озьы ик вал, татын монэ дунъяллязы. Но бӧрсьысь бӧрсе шуккиськи. Нырысь пельпумме чигтӥ, пыдесъёсысьтым сӥныръёсме (связка) кеси. Эмъясьёс шуизы: хоккейысь ӧд ке кошкы, инвалид кыльыны быгатод. Шудэмысь дугдэме бере ар пала кайгырыса улӥ, улонысь льӧль малпанме ыштӥ кадь. Табере мар ке лэсьтон азьын рос-прос малпаськисько. Али толалтэ пиналъёсын азбарын куддыръя шудылӥсько, конькиен ворттылӥсько.

— Нош вань-а шудонъёс, кудъёссэ тон али но ӵем тодад вайылӥськод?

— Вань-вань. Мон соку нырысетӥ арзэ Канадаын шудӥсько вал. Командамы Канадаысь юниоръёс пӧлын чемпион луиз. Со вунонтэм! Кыӵе ми шудоесь вал! Со вормон туж секытэн сётскиз, сомында кужым быдтӥмы! Финалын ваньмы травмаосын шудӥмы. Финал азьын мон едӥньме (пах) кеси. Ветлыны уг быгатӥськы вал, вӧсь. Шудонэ лыктӥ, мыным уколъёс пуктылӥзы. Туж вӧсь вал. Но кытчы пырод? Вормоно!

Тодмо хоккеистъёс пӧлысь вераме потэ Литваысь Дарюс Каспарайтес сярысь. Со аслаз силовой приёмъёсыныз висъяськылӥз, ваньзы солэсь кышкаллязы. Стэнлилэн Кубокезлэн финалаз со чигем урдлыен шудӥз. Токма уг кырӟало ук «Трус не играет в хоккей». Футболын тани ӧжыт гинэ ог-огзы борды йӧтско но — быдэс спектакль кутске, кыӵе, пе, вӧсь. Со понна ик футболэз ноку ӧй яратылы.

Эшшо дивизионын нырысетӥ инты понна шудонэз тодам вайылӥсько. Кин вормоз, со ик плей-оффе нырысетӥ интыын потоз: капчигес соперникъёс сюрозы, шудонъёс аслад стадионад ортчозы. Оглом вераса, туж серьёзной шудон. 2-тӥ яке 3-тӥ периодын сыӵе ожмаськон кутскиз, осто быри. Командаос куспазы жугиськыны кутскизы. Йӧ вылын оглом 40 адями, ваньзы мыжгасько. Тренеръёс но ӧз чидалэ, ог-огзылы пумит мыжыкъёсын потӥзы. Нокинлэн милемыз дугдытэмез уг луы, йӧ вылын 3 судья гинэ.Та шудонэз мукет нуналэ ортчытӥзы. Соку ини ми вормимы. Серем вал: ӵуказеяз тренировкае лыктӥмы но, ваньмылэн ымныръёсмы ӵабъямын, лыз-вож. Тренеръёслэн но.

— Кема аръёс ӵоже ини хоккейын Россия но Канада валтӥсь соперникъёс. Тросэз тодо, дыр, вал, тон Россиысь шуыса. Кызьы тонэн вераськылӥзы?

— Милям валтӥсь тренермы но Россиысь вал, 15 аресаз озьы ик кошкем Канадае, карьера лэсьтӥз, кышно вайиз, выжы лэзиз. Мон сяна, командаямы эшшо 2 ӟуч пияшъёс шудӥзы: огез Москваысь, мукетыз Санкт-Петербургысь. Милемыз «русская мафия» шуылӥзы. Ма, серекъяса гинэ ваньмыз со. Ог-огенымы весь умоен вераськылӥмы, эшъяськылӥмы.

Кунгож сьӧрысь адямиосын тодматскыны котьку тунсыко ук, ӵем юалляськылӥзы, кытысь ми. «Ижкарысь» шуисько но, юало: «Нош со кытыназ? Москвалэсь кыдёкын-а?» Соос Москваез гинэ тодо ук. Верасько, отысен мон дорозь поездэн 20 час пала мыноно на шуыса. Соку ик котырес синъёсынызы шорам учко: «Тон Сибирьысь-а мар-а?»

Но хоккей сярысь верано ке, зэм, лигаын тросэз тодо вал, мон Россиысь шуыса. Тодӥсько на, огпол телевизор пыр Россия но Канада куспын кыӵе ке шудонэз учкимы. Канада, милемлы 6 гол пыртыса, вормиз. Ӵуказеяз милям асьмелэн шудонмы вал. Вбрасывание дыръя пумит командаын шудӥсь пияш дорам лыктӥз но шуэ: «Усто асьмелэнъёс толон ӟучъёсты вормизы, озьы ук?» Адске вал, верам кылъёсызлэсь ачиз туж шумпотэ шуыса.

— Нош маин висъясько Америкаысь но Канадаысь НХЛ но Россиысь КХЛ лигаос?

— Ваньмыныз, мон шуысал. НХЛ-ын нырысь ик коньдон поттыны выро. Малы соос берпуметӥ Олимпиадае но ӧз ветлэ? Соос трос коньдонзэс быдтысалзы. НХЛ — бадӟым бизнес-проект. Клубъёсты возисьёс сомында коньдон символикалы, шудонъёсты телевизор пыр возьматыны быдто. Хоккеистъёслы уждун но жалятэк тыро.

Канадаын хоккеез азинтон понна ваньзэ лэсьто. Милям но, бен, рос-прос школаосмы вань. Но Канадаын стадионъёс котькуд гуртын. Отын 500 адями гинэ мед улоз, но стадионзы вань. Хоккей соослэн виразы. Ми 5 сюрс адямилы чаклам стадионын шудылӥмы, буш интыос ноку ӧй вал. Нош асьмелэн юниоръёс шоры учкыны калык уг мыны.

Кызьы малпаськод, малы дунневыл чемпионатын сборноймы финалэ потыны ӧз быгаты?

Россилэн сборноез вормыны быгатысал. Но асьсэос асьсэлы тушмон луизы. Кема кыткиськизы. Шудонэз шӧдыны, вань кужымдэ сётыны кулэ. Ӧз удалты, мар карод. Командаын трос зол хоккеистъёс. Мон нимысьтыз Никита Кучеровез висъясал. Со Америкаын «Тампа-Бэй Лайтнинг» команда понна шудэ. Туэ со НХЛ-ын устоез бомбардир луиз, одӥг сезон куспын сомында очко одӥг ӟуч хоккеист но ӧз люкалля на. Аспӧртэм малпаськыны быгатэ, соин ик ӟеч шудэ. Павел Дацюклы тупа. Дацюк — легенда. Али со Россиын шудэ ни, но НХЛ-ын сое али но волшебник шуо.

— Нош тон Россия яке Канада понна дурбасьтӥськод?

— Одно ик Россия понна!

Мария ЕМЕЛЬЯНОВА

Ангелина Снигирева
By Ангелина Снигирева 26 июня, 2019 13:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<