Суредын — удмурт нылкышно

Ангелина Снигирева
By Ангелина Снигирева Июнь 6, 2019 17:21

Удмуртиысь калык художниклэн Алексей Холмогоровлэн (1925-1987) тросаз суредъёсаз огшоры удмурт кышномуртъёс, скал кыскисьёс, анайёс пуктылэмын. Огез тодмо «Молодая мать-удмуртка» ужаз суредамын Капитолина Каргашина.

К. Каргашина

Капитолина Ивановна шкафысьтыз поттӥз ӝикытак бинялтэм горд пужыё тӧдьы кышетсэ. Ӵапак та кышетэн, пе, Алексей Холмогоров сое суредам. Егит нылашлы 15 арес гинэ вылэм.

— Вордӥськемын мон Балезино ёросысь Голёгуртын (Ягошур), 3 нылпиос пӧлысь покчиез вал, — вера К. Каргашина. — 5-6 арес дыръям быдэс семьяенымы Ижлы матэгес лыктӥмы — Дэри ёросысь Шор Постол гурт котыре, отын соку нюлэс поттӥсьёслэн посёлоксы вал. Анай-атае отын тыршизы. Дышетскыны ветлӥмы Красное черкогуртэ. 7-тӥ классэз быдтэме бере, асме ачим сюдоно шуыса, уж утчаны Ижкаре лыктӥ. Городысь тодмо суредась нылызлы утиськись утча, пе, щуыса кылӥ.
Алексей но Нина Холмогоровъёс туж лякытэсь но визьмоесь вал. Алексей Павлович университетын ужаз, ӝытъёсы мастерскояз ышылӥз. Мон Маша нылынызы пукылӥ, квартираязы утялскылӥ. Нош одӥг пол Алексей Павлович монэ суреданы ӵектӥз, удмурт ымныр кулэ, пе. Кышет шедьтыны куриз, ӵапак анаелэн кашемир кышетэз вал, удмурт дэрем ачиз мугорыя вуттӥз. Озьы нуналлы быдэ сямен мастерскояз вуылӥ, туж яратылӥ отчы ветлыны. Отчы сомында суредаськисьёс люкаськылӥзы.
Ар пала Холмогоровъёс дорын ужаса, Капитолина Ивановна та семьяысь кошкиз. Кузпалъёслэн 2-тӥ нылпизы вордӥськем бере пиналъёссэс утьыны песянайзы вуиз. Та ик пум луиз нылашлэн мастерское ветлэмезлы но. Озьы Капитолина Ивановна адӟыса ӧз вутты суредэз.

А. Холмогоровлэн «Молодая мать-удмуртка» суредэз

Берло гинэ, трос аръёс ортчыса, пиналъёсы суредэз возьматӥзы. Но мон отысь асме тодмай но, ӧй но кадь, суредын нылпиен егит кышномурт, нош мон нылаш вал на ук. Собере, Алексей Павлович монэ огнаме суредаз вал ук, — азинтэ веранзэ кышномурт.
Егит нылмурт эшшо одӥг семьяын утиськиз на. Отӥяз «Ижсталь» заводысь столовойын пӧраськисьлэн юрттӥсез вал, бӧрысь ачиз пӧраськись луиз, татын оглом 11 ар ужаз. Собере 16 ар калыкез ческыт сюдӥз ЦУМ-ысь столовойын, отӥяз тыршиз 25 номер училищеын, татысь ик пенсие потӥз.
Кузпалыз Владимир Каргашин лэсьтӥськон удысын тыршиз, валче соос 1 ныл но 2 пи будэтӥзы.

Ангелина Снигирёва

Ангелина Снигирева
By Ангелина Снигирева Июнь 6, 2019 17:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<