Смена бӧрсьы — спортзалэ

Ангелина Снигирева
By Ангелина Снигирева Июнь 7, 2019 09:18

Предприятиос кылдытъяло мугорез кыдатон клубъёс

Кылем арня пумын Глазов городын ортчиз шаерысьтымы предприятиосын ужасьёслэн 9-тӥ гужем спартакиадазы. Отчы пыриськиз 600 пала адями, соос 12 амалъя кужымзэс эскеризы.

Шудонъёсты усьтон дыръя


Кужмоосыз
Бадӟым ужрад ортчиз «Спорт — норма жизни» ӧтён улсын. Со радъяське, тазалыко улонэз пыӵатон сярысь сюлмаськыса. Берло дыре шаерысьтымы куд-ог бадӟым предприятиосын нимысьтыз кылдыны ӧдъязы мугорез кыдатонъя клубъёс. Озьы заводъёсын ужасьёс ваньмон дыръязы тазалыксэс юнмато, спортэн эшъяськыса. Солэн пайдаез шӧдӥськиз ни кылем арня пумын Глазов городын ортчем спартакиада дыръя. Нырысь аръёсаз таӵе ӵошатсконэ ог 10-15 предприятиосын ужась коллективъёс гинэ пыриськылӥзы ке. Туэ 25 предприятиос лыктӥзы. Соос 2 группалы люкемын вал: быдӟалазыя 1 сюрс адямилэсь тросгес ужасьёсын предприятиос но солэсь пичигес.
31-тӥ мае 17 часын Глазовысь спортъя «Прогресс» комплексын ӵошатсконъёсты сӥё-дано усьтӥзы. Люкаськем калыклы шуныт кылъёс веразы но спортын вормонъёс сизизы Глазов городлэн йырыз Сергей Коновалов, Удмуртиысь Профсоюзъёслэн федерациенызы кивалтӥсь Сергей Шерстобит, Мугор кыдатон культурая, спортъя но егитъёсын ужан политикая министерствоысь калыкен ужанъя ёзэн кивалтӥсь Ирина Ульенко. Куноос понна глазовъёс шулдыр представление возьматӥзы. Вакчи дыр куспын Глазов городлэн историеныз тодматӥзы, Идна батыр сярысь тодамы вайытӥзы. Собере стадион тыр пазьгиськизы спортсменъёс, полазы вал капчи атлетъёс, покчи фигуристъёс (соос роликъёс вылын нискылазы), байкеръёс. Нимысьтыз данъязы ёросысь спортъя ветеранъёсты. Одӥгез соос полысь — Наталья Владимировна Асеева, 68 ар ӵоже Механикая Чепца заводын тыршемын, туннэ но ветеранъёслэн улоназы мыло-кыдо пыриське, пыдын бызьылонъя ӵошатсконъёсын Росслэн но дуннелэн трос полэс чемпионзы вал.
Ӵошатскон 3 нунал ӵоже кыстӥськиз. Ужасьёслэн спартакиадазы туж матын луэ Гурт шудонъёслы. Сояз но, таяз но спортэз яратӥсьёс бызьыло, гира ӝуткало, баскетболэн, волейболэн, дартсэн шудо, гозы кыскалозы, семьяос нюръясько. Спартакиадае пыртэмын на уян но акватлон (уян но бызьылон). Вань мылкыд карисьёс ужасьёслэн спартакиадаязы пыриськыны уг быгато. Шаерысьтымы Дартсэн шудонъя федерациен кивалтӥсь но тренер Сергей Полушкин ивортэмъя, предприятиосын ужасьёслы, Удмуртиысь спортъя кыӵе ке сборной командае шедемын ке, спартакиадае пыриськыны лэземын ӧвӧл ни. Одӥг ласянь, со туж шонер кадь, медаль басьтыны луонлыкъёс мукетъёсызлы но сётоно, нош мукет ласянь, тренер куректэ: ӵошатсконлэн данэз, пе, тазьы усе, спортсменъёслы нокин шоры учкыны, кыстӥськыны. Озьы-а, тазьы-а, но ӵошатсконэ пыриськыны мылкыд карисьёслэн лыдзы арысь аре йылэ, кужмоосыз гинэ Элькун ӵошатсконэ шедё.

Ижысь «Радиозаводысь» Чужановъёс 1-тӥ инты басьтӥзы

Кин кызьы дасяськиз
Стадионысь лыдпусъёсын табло котыре трос калык люкаськемын, куспазы маке ӵаш потто. Можга городысь «Свет» заводын ужась грузчик Андрей Плеханов шумпотэмын нырысетӥ зарни медаль басьтэмезлы. 100 метрез 11,9 секунд куспын бызем. Котыраз люкаськем эшъёсыз сое ӟечкылало, нош арлыдо воргоронъёс — спортысь ветеранъёс — йырынызы шонало, 100 метр понна, пе, со трос, ас вакытаз 11 секундлэсь шаплыгес бызьылӥмы. Егитъёс асьсэлэсь каро, ужась муртлы со умой лыдпус шуыса. Споръяськизы ке но огкылэ вуизы — мугорез ялан кыдатыса гинэ, ӟеч лыдпус возьматыны луоно.
Можгаысь Андрей Плехановлы вань кинлэсь адӟем карыны. Угось солэн песятаез — Совето Союзысь дано тренер Сергей Плеханов. Андрей Россиысь биатлонъя сборное шедьылэмын. Бӧрысьгес футболэ выжем, вакчи дистанциосы бызьылыны яратэ.

  • Ужасьёслэн спартакиадаязы нырысьсэ 2017-тӥ арын пыриськи, соку Сарапул городын ӵошатсконъёс ортчизы. Бызьылыса соку 3 азвесь медальёс басьтӥ, нош туризмъя вожвылъяськонысь зарни кубокен бертӥ вал, — шуэ заводын ужась. — Милям заводысьтымы цехъёс куспын асьме спартакиадамы мынэ, жаляса верано, мугор кыдатыны луонлыкъёсмы ӧвӧл, ваньмон дыръям гинэ парке потасько.
    Со понна ужасьёссылэсь тазалыксэс юнматон ласянь умой сюлмасько вылэм «Глазов-молоко» предприятиын. Татысь автоколоннаен кивалтӥсь Михаил Шкляев шумпотэмын, спартакиадае шедиз шуыса.
  • Ачим мон Глазов ёросысь Качкашур гуртысь луисько, предприятиын 5-тӥ арзэ ужасько, сомында ик «Комос Групп» огазеяськонэ пырись предприятиос куспын ортчылӥсь ӵошатсконъёсы пыриськисько: гозы кыскасько, волейболэн шудӥсько, — шуэ Михаил Сергеевич. — Берло дыре секыт кортлы синмаськемын: штанга ӝуткасько. Заводын ужасьёс спортзалэ дунтэк ветло. Соин ик ваньмон дыр шедьыку, спортзалэ дыртӥсько, мугорез посыса, мылкыд капчигес луэ. Таяз учыре монэ гира ӝутканы куризы. 24 килограммъем гираосты толчок амалъя 16 пол, рывок амалъя 30 пол ӝутыны быгатӥ. Озьы аслэсьтым рекордме пуктӥ, но спартакиадае пыриськись эшъёсы азьын возьытгес вал: соос тросгес ӝутъязы.
    Та ӵошатсконлэсь рекордзэ выльдӥз Можга ёросысь нюлэс поттон удысын ужась Юрий Иванов. Таиз спортсмен Гурт шудонъёслы дасяське, спартакиада солы тренировка выллем луиз: толчок амалъя 140 пол, рывок амалъя 210 пол гираосты ӝутказ.
  • Семья ке юн…
    Кужмо нюръяськон пуромиз семьяос куспын. Соос ӝӧк выл теннисэн шудӥзы, эстафетаын бызьылӥзы но туристической полосаез ортчизы. Нылын семьяос пӧлын вормисе потӥз Ижысь радиозаводын ужась Александр Чужановлэн семьяез. Асьсэос соос Дэри ёросысь Подшивал гуртын уло. Светлана кузпалыз куасэн бызьылэ, 11 аресъем Надежда нылзы сэзь тэтча-бызьылэ, со сьӧры покчиез нылзы но уйиське.
  • Семьяос понна чаклам ӵошатскон милемлы капчиен сётӥськиз, сюлмаськимы вал пиналмы понна гинэ, — шуэ Александр Владимирович. Туннисэн умой шудӥмы, ӝог бызьылӥмы, нош туризмын 2-тӥ луимы, огъя зачётын 1-тӥ интымес утьыны быгатӥмы.
    Александр Чужанов верамъя, спортэн эшъяськыны мылкыд карисьёслы, радиозаводын вань луонлыкъёс кылдытэмын.
    Пичи предприятиосысь семьяос куспын вормисе потӥзы Пичи Пурга ёросысь Баграш-Бигра гуртысь Васильевъёс Радим пиенызы. Ольга ужа Ижысь «Парадигма» огазеяськонлэн Яганысь филиалаз.
  • Спортъя пӧртэм ӵошатсконъёсы пыриськиськомы, таяз учыре мамамылы юрттӥськимы, — вера семьялэн кузёез Александр Васильев. — Ачим мон чугун сюрес вылын ужасько, кылем арын железнодорожникъёс пӧлын семьяенымы ӵошатскимы. Ветлӥмы Алтай Республикае, 16 команда пӧлысь 3-тӥ инты басьтӥмы. Ужан интыын мугорез кыдатыны луонлык уггес шедьы, со понна артэ Орлой гуртысь спортъя клуб вань, тол но, гужем но отын мугорез кыдатыны луоно.
    Вормисьёс ӧз воштӥське
    Ужасьёслэн 9-тӥ спартакиадазы йылпумъяськиз, медальёс кузёоссэс шедьтӥзы. Вормись командаосты шараязы муниципал кылдытэтъёсъя. Бадӟым предприятиос пӧлын, котькинлэсь трос очко люкаса, нош ик вормись луизы Ижевскысь предприятиос. 2-тӥ но 3-тӥ инты басьтӥзы Глазов но Сарапул городъёс. Пичи предприятиос пӧлын висъяськизы Можга, Ижевск но Глазов городъёс. Пусйыны кулэ, та спартакиадаын вормисе потэмъёслэсь ик матысь дыре кылдытэмын луоз Удмуртилэн сборной командаез. Тужгес кужмо спортсменъёс сентябрь толэзе Тамбов городэ мынозы.

Валентина Емельянова

Туспуктӥз атворез

Ангелина Снигирева
By Ангелина Снигирева Июнь 7, 2019 09:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<