«Сирота» кыл мед вуноз

Ангелина Снигирева
By Ангелина Снигирева Июнь 6, 2019 16:57
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Россиысь Нылпи юртъёсысь выпускникъёслэн ассоциацизы «Асьмеос кулэ ог-огмылы» акция сярысь ялӥз. Со борды итӥськиз республикамы но. Пӧртэм ужрадъёс пӧлын одӥгез луиз Кун Кенешысь котрес ӝӧк сьӧрын пумиськон.

Воткаысь школа-интернатын будэм А. Пищиков номо-дано спортсмен луэмез сярысь вера

Кулэ ог-огмылы
Котрес ӝӧк сьӧрын — Кун Кенешлэн Тӧроез Алексей Прасолов, Тазалыкез утёнъя, демографияя но семья политикая ялан ужась комиссилэн кивалтӥсез Надежда Михайлова, Нылпилэсь правооссэ утёнъя уполномоченной Ольга Авдеева. Дуно куноос пӧлын — шаерысьтымы нылпи юртъёсысь 9-тӥ но 11-тӥ классъёсты йылпумъясьёс, дышетӥсьёссы.

Тӥляд али кун экзаменъёс сётон вакытты — сюлмаськиськоды, жадиськоды, — котрес ӝӧк сьӧры люкаськем пиналъёслы вазиськиз Ольга Авдеева. — Нош экзаменъёстэс сётӥды ке, бадӟым улонэ вамышоды. Малпаськисько, вылды, кыӵе ке профессия басьтоды. Тодэ, таӵе секыт вакытады тӥ огнады ӧвӧл, ми — тӥледын артэ, котькуд юрттыны дась луиськом. Асьмеос ог-огмылы кулэ.
Сюлмысь вераськыны мылкыд сётыса, аслэсьтыз бадӟым улонэн вамыштон вакытъёссэ тодаз вайиз Алексей Прасолов:

Школа бере дышетсконме азинтыны малпай вылӥ дышетскон заведениын. Анай-атае отчы келязы но кельтӥзы. Мыным соку 16 арес вал. Со вакытысен мон ачим понна кыл кутыны дышетски. Пӧламы котькыӵеосыз вал: одӥгъёсыз урод сямъёсын кушласькизы, мукетъёсыз туж тыршизы тодон-валан люканы — ӟеч дышетскид ке, стипендия но тырозы.
Надежда Михайлова Медициная институтэз горд дипломен йылпумъяз.

— Анай-атайтэк кылем пиналъёслэн вылӥ тодон-валан басьтыны но нокыӵе могӟетъёссы ӧвӧл. Профессилы дышетскон — вузын-а, техникум-колледжын-а — тӥ понна дунтэк. Улон инты, дышетскон пособиос висъясько, сюдо, эмъяло дунтэк. Дышетскондэс йылпумъякуды но, огдыре, улондэс радъятозь, пособие басьтыны быгатӥськоды на. Туннэ государство лэсьтэ ваньзэ, сирота пиналъёс асьсэдыз кулэтэмен медаз шӧдэ шуыса.

Азьло но али
Секыт-а, ӧвӧл-а нылпи юртысь бадӟым улонэ вамыштыны — туж умой тодо анай-атайтэк будэм толло выпускникъёс.
Кылсярысь, Воткаысь школа-интернатын быдэ вуэм Алексей Пищиков. Туннэ со дуннелэн кигбоксингъя 2 пол чемпионэз, «Знамя» комплекслэн директорез.

— Государство, зэмзэ но, тырмыт саклык висъя анай-атайтэк кылем нылпиослы, — шуиз со. — Нылпи юртысь потыса, кызьы соослэн улонзы азинскоз — асьсэ бордысь потэ ни. Мон нуналаз 2 пол тренировкаосы ветлӥ, нырысь выри нюръяськонэн, бӧрысьгес выжи кигбоксинге.
Алексей Пищиков малпамъя, нылпи юртъёсын азьло но али улон туж висъяське.

— Вазен ми улӥм но, дышетским но школа-интернатын ик, — шуиз со. — Семьяын будӥсь пиналъёсын ӧм пумиськылэ, шуыны луоз. Нош али сирота пиналъёс огшоры школаосы ветло, мукет огъёзъёсынызы ӵош одӥг парта сьӧрын пуко, эшъясько — туж умой со. Со сяна, вазен урам кузя одӥг кадь пӧрмем пиналъёс ортчо ке, ваньзы тодо ни вал — сирота пиналъёс. Али котькуд нылпи дӥсяське озьы, кызьы аслыз кельше.
Василий но Михаил — нылпи юртысь толло выпускникъёс. Али огзы Удмурт кун университетын, мукетыз Ижысь гурт хозяйствоя кун академиын тодон-валан люкало. Уг вато: нылпи юртысь потыкузы, зэмзэ но, курдазы: мар луоз азьланяз. Но тани соос 2-3 арзэ ни студентъёс. Кыксы но уло общежитиын. Ӵош улоно эшъёсынызы огкыл ӝог шедьтӥллям.

Семьяын кадь
Берло дыре нылпи юртъёсын улон-вылон чутрак воштӥськиз, шуизы нылпи юртъёслэн кивалтӥсьёссы. Выль куронъёсъя нылпиос табере семьяын кадь кадь будо: одӥг комнатае интыяло пӧртэм арлыдъемъёсты.

— Нылпи юртамы улонмес выль сямен радъяны кутским ог 3 ар талэсь азьло, — вераз Воткаысь нылпи юртлэн кивалтӥсез Наталья Черёмушкина. — Зэмзэ но, югдур чутрак воштӥськиз. Табере бадӟымъёсыз пичиоссэ учкыны дышетско, куддыр соосты нылпи садысь басьтыны но ветло. Пиналъёсмы визь люкало Воткаысь ог 10 школаосын, соос понна 20-лэсь уно кружокъёс ужало.
Нош элькун нылпи юртын выль сямен улон-вылонзэс вазенгес радъяны кутскиллям ни. Отын табере пӧртэм программаос, проектъёс пыӵатӥсько. Пиналъёс дышетско коньдонэз валаса кутыны, куно пумитаны…
Катя но дышетскем со программаосъя, ас вылаз эскерем но ни. Со футболист, огдыре шудэм Москваысь «Локомотивын».

— Отын мон мурт квартираын улӥ, сиён но ачим ик пӧрасько вал, — шуэ нылаш. — Пӧраськыны секытгес ик. Но марысь мар ке, жингыртӥсько нылпи юртысь воспитательёсылы…
Ӵап та нуналэ 18 арес тырмиз Ижысь нылпи юртысь Сашалы. Алексей Прасолов солы бадӟым-бадӟым сяська керттэт кузьмаз.

Пумиськонъёс луозы на
Сюлмысь вераськон ог 2 час пала кыстӥськиз. Та рад люкамын вал Ижысь, Можгалась, Воткалась, элькун нылпи юртъёсысь пиналъёс. Кун Кенешысь семья политика понна кыл кутӥсь ялан ужась комиссилэн кивалтӥсез Н. Михайлова но Нылпилэсь правооссэ утёнъя уполномоченной О. Авдеева шуизы: нылпи юртъёсысь потӥсь выпускникъёсын пумиськонъёс арлы быдэ ортчылозы, отчы вань нылпи юртъёсысь нылъёсты-пиосты одно ӧтчаллялозы.
Котькуд нылпи юртлэн директорез выпускникъёсызлы сюлмысь потӥсь кылъёссэ вераз.

— Мыным туж уг кельшы «сирота» кыл, — шуиз Элькун нылпи юртлэн директорез Елена Лучихина. — Милям, кылсярысь, сиротаосмы ӧвӧл. Пиналъёслы шуисько: тӥляд анайды — мон. Воспитательёс пӧлын вань воргоронъёс — соос атайёсты. Котьку, котькыӵе ужпумен милемлы вазиське — ми тӥледлы юрттом.

Элина Васильева

Туспуктэм басьтэмын udmgossоvet.ru

Ангелина Снигирева
By Ангелина Снигирева Июнь 6, 2019 16:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<