Пумиськом Нюнягуртын!

Ангелина Снигирева
By Ангелина Снигирева Июнь 26, 2019 15:42
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

29-тӥ инвожое Эгра ёросысь Нюнягурт (Малые Мазьги) вӧзын ортчоз элькун Гербер (0+). Та радэ шулдыръяськонлэн пусэз — кубо питран, со улонлэсь йылтэм-пумтэм луэмзэ но выльдӥськонэз возьматэ. Мар тунсыкоез луоз удмуртъёслэн яратоно праздниказы?

Мар, кин, ку?

Куноосты пумитаны кутскозы 9.30 часысен. Гербере витё ёросъёсысь делегациосты: муниципал кылдытэтъёсты, творческой коллективъёсты, киужъёсъя юртъёсты. Озьы ик вуозы «Удмурт Кенеш», «Шунды», «Дэмен», «Камсьӧр удмуртъёслэн центрзы» но мукет огазеяськонъёсысь ёзчиос. Элькунысьтымы делегациос сяна, Татарстанысь, Башкортостанысь, Марий Элысь, Пермь, Киров но Свердловск улосвылъёсысь, Ханты-Мансийск автономной округысь, Москваысь но Санкт-Петербургысь куноос вуозы. Асьсэос эграос воршудэн-воршудэн лыктозы. Герберез ортчытӥсьёс ог 15 сюрс адямиез пумитаны дась.
10 часысен 16 часозь ужалоз «Киуж ульча» — Удмуртиысь калык киужъёсъя центръёс но ас кожазы ужась кибашлыос киужъёссэс возьматозы-вузалозы.
11 часын валтӥсь сцена вылын Герберез усьтозы, гурт удысын усто тыршисьёсты но удмурт огазеяськонъёсысь азьветлӥсьёсты данъялозы.
11.30 часын «Мудор» площадкаын ӝукез вӧсялозы.
12 часысен пӧртэм ужрадъёс но площадкаос ужзэс мытозы. «Жингрес возь вылын» удмурт ансамбльёс кырӟалозы-эктозы. Концертэ ог 65 коллектив пыриськоз. Эктонъя «Чебеляй» студия Пичи сцена дорын бадӟым мастер-класс ортчытоз. Ансамбльёс кырӟамъя «Чебер герберын» Удмуртиысь дизайнеръёс вурем дӥськутсэс возьматозы. «Тазалык шудонъёсы» спортэн эшъяськись семьяосты ӧтё: соос удмурт шудонъёсын шаплы луэмзэс возьматозы. Элькунысьтымы ёросъёслэн йыръёссы «Ки валтӥсь» ӵошатсконэ пыриськозы. Юрттӥсьёсынызы ӵош соос гозы пунозы.
Та нуналэ егитъёсты бадӟым шулдыръяськонэ ӧте — 18 часысен Эгра черкогуртысь «Эгра» этнопаркын «Шундэктон» ортчоз (12+). Калыкез шулдыртозы егит кырӟасьёс: Алексей Пикулев, Богдан Анфиногенов, Ольга Ипатова, Ксения Ахметханова, «Инвис» ансамбль, bobolenin группа но Эстониысь Gruppa-R коллектив. Тунсыко вожвылъяськонъёсы пыриськисьёсты усто кузьымъёс витё. Огез шуд пуйы дораз велосипедэн бертоз.

Кызьы вуоно?

Ижысь Нюнягуртозь юри автобусъёс чакламын ӧвӧл. Соин транспорт пумысен азьвыл ик сюлмаськоно луоз.
Ижысь Нюнягуртозь — ог 80 иськем. Асьтэлэн машинаеныды мынӥды ке, 1 час но ог 20 минутскын вуоды. Рейсовой автобусъёс ветло Центральной автовокзалысен 9.05 часысен.
Глазовысен Нюнягуртозь — ог 95 иськем. Машинаен ог 1 час но 10 минут пала мыноно. Глазов автовокзалысен автобусъёс ветло 6.40 часысен.
Эграласен Нюнягуртозь — 15 иськем.
Со сяна, Ижысь «Открывая Удмуртию» экскурсионной центр Гербере тур радъя. Гербере нуозы но берен ваёзы, Якшур-Бӧдьялан экскурсия ортчозы на. Автобус кошкоз 8 часын Ижысь Пыӵал тӥрлык лэсьтӥсьёслэн синпелетсы дорысен.

Анастасия Шумилова

Ангелина Снигирева
By Ангелина Снигирева Июнь 26, 2019 15:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<