Ортчемзэ бугыртэ видеокамера

Ангелина Снигирева
By Ангелина Снигирева Июнь 10, 2019 16:51

Никита Сморкалов Восточно-Европейской институтын дышетӥсь луыса ужа, Ижевск сярысь документальной киноос лэсья. Алигес егит режиссёрлэн «Знамя. Сто лет после восстания» документальной фильмез потӥз. Со Ижысь но Воткинскысь заводъёсын ужасьёслэн восстанизылы — 1918-тӥ арын большевикъёслы пумит султэмзылы — сӥземын. Н. Сморкалов верамъя, та история туала вакытэз валаны юрттэ.

Н. Сморкалов

— Никита, маин тонэ документальной кино бордаз кыскиз?

— УдГУ-ысь историяя факультетын 1-тӥ курсын дышетскыкум, анае-атае видеокамера кузьмазы. Мон соку визуальной антропологиен вырыны кутски. Вакчияк верано ке, та удыслэн ужпумез — адямиослэсь улон-вылонзэс видеое пуктыса кельтыны. Кино лэсьтыку, сюлмаськиськод, мед со чебер луоз, учкисез мед паймытоз шуыса. Нош визуальной антропологилэн научной ужпумъёсыз: улонэз возьматоно озьы, кыӵе со вань. Документальной кино талы туж матын луэ.
Визуальной антропологиен курсысьтым эшеным ӵош вырим, дышетӥсьёсмы керӟегъяськизы, оломар дауртӥськом шуыса. Ми, еж макеос, малпаськом вал: тросэз удмурт гуртъёсы ветло, нош ми мар ке выльзэ каром. Эшеным Свияжске экспедицие кӧня ке пол вуылӥм. Со Татарстанысь черкогурт, шормуӵын интыяськемын. Отын Свияга шур Волгае усе. Али быдэсак музей луэ, нош 2008-тӥ арын отын куашкам гурт гинэ вал. Отын трос суредаськисьёс улӥзы. Ми соослэн улон-вылонзы сярысь исследовательской фильм лэсьтӥм. Киномы ӧз удалты, но отын улыны милемлы туж кельшиз вал. Али валасько, асьме палась но тунсыко материал люканы луысалыз шуыса.
Зэмзэ вераса, мон алама студент вал. Занятиосы ӧй ветлылы, «быжъёсы» трос вал, ваньзэ сессия дыръя тупатъялляй. Мон сярысь шуо вал: азьтэм ке но, визьмо, вань экзаменъёссэ сётоз. Эшшо мынам 5-тӥ курсозь йырсие кузь вал, пунэтэн ветлӥ. Нош дипломме утён азьын пилеш ӵышкиськи, защитае тӧдь-тӧдь костюмен лыктӥ. Мон али валасько, сыӵе вылтӥяськон чик но чебер ӧвӧл шуыса. Дышетӥсь луыса, валай: бадӟымъёслэн сыӵе студентъёслы вожзы потэ.
Озьы научной уже документальной кино лэсьтонлы инъет луиз. Улон выльме, адямиос улонысь кошко, юртъёс куашкало, нош видеоын ваньмыз воштӥськытэк кыле. Озьы тон интыосты, адямилэсь улонзэ ышемзылэсь утиськод кадь.

Анаеныз

— Адямиос видеокамераен муртэ улоназы капчиен-а лэзё?

— Пӧртэм учыръёс луыло. Шумпотӥсько, асьсэос монэ ӧте ке. Но режиссёръёс пӧртэм сямен ужало. Кылсярысь, Москваын Марина Разбежкиналэн — кинорежиссёрлэн, сценаристлэн — документальной школаез вань. М. Разбежкина «кыйлэн зонаез» сярысь веранэз вань. Кый доры матэктыку, со пештырске, вера кадь: вамыш лэсьтӥд на ке, мон тонэ куртчо. М. Разбежкиналэн дышетскисьёсыз котькуд адямилэсь сыӵе зоназэ шедьтыны тыршо но со кузя котыръясько. Ужъёссылы синмаськисько, но аслым сыӵе амал сюлэмея ӧвӧл, со адямиез вӧсь карыны быгатэ. Но М. Разбежкина шуэ дышетскисьёсызлы: бырйы, тон умой адями яке умой режиссёр.
Лэчыт юанъёсты сэрттыку-пертчыку, ваньмызлы ярамон кино лэсьтэмед нокызьы уз лу. «Знамя. Сто лет после восстания» киноен ӵапак озьы луиз. Алигес сое нырысетӥзэ возьматӥ Ижкарлэн музеяз. Сое учкыны фильмысь геройёс вуизы: восстание дыръя бырем большевикъёслэн ӵыжы-выжыоссы, но повстанецъёслы дурбасьтӥсьёс. Киноез учкеммы бере соос экран азе потӥзы, куспазы керетон пурӟиз. Мынам улонам нырысьсэ сыӵе вал: фильм экранысь улонэ выжиз. Али но сюлмы шуг.
Огез героиня алдаськыса-а, янгышаса-а одӥг учыр сярысь камерае вераз. Мон со верамзэ фильме пыртӥ. Со, кино мыныку ик, дорам лыктӥз но юаз: мар малпаса, тон сыӵе монтаж карид? Монэ белогвардеец нимаз на. Алигес со жингыртыса шуэ: мынам, пе, гипертонической криз луиз, монэ киноысь ӧд ке утялты, судэ сёто.
Но мон киноме воштыны уг ӧдъяськы. Мае ке синйылтӥськод ке, сое возьматоно, мед со сярысь калык малпаськоз. Мон киноосме, кинэ ке шумпоттоно шуыса, уг лэсьяськы.

Брангуртын экспедициын

— Малы сыӵе секыт тема борды басьтӥськемед потӥз?

— Малпасько, та восстание сярысь тырмыт ӧм малпаськылэ, ӧм валалэ сое. Кызьы со шоры учконо? Мае ке но капчи валаны, кылсярысь, нацизм — со урод. Нош большевизм? Со шоры учкон пӧртэм.
Нырысьсэ мон Ижысь но Воткинскысь ужасьёслэн бугыръяськемзы сярысь тодӥ, Ижкарысь Гуманитарной лицейын бадӟым классъёсын дышетскыкум. Отын милемыз пӧртэм исследованиос лэсьтыны дышетӥзы. 9-тӥ классын со история мыным туж тунсыко потӥз: трос пеймыт интыосыз, адямиос али но уг тодо, мар зэмзэ соку вал, кин понна дурбасьтоно. Мон восстанилы сӥзем книгаос лыдӟи, кыӵе ке проект лэсьтӥ но вунэтӥ со сярысь 2017-тӥ арозь.
Восстание дырысен 100 ар тырмон матэктэмен, мар ке но вырӟиз кадь. Мон Ижкарлэн музееныз кусып возисько, соос но та темаез ӝутыны ӧдъязы. Соку мон та оже пыриськем муртъёслэн ӵыжы-выжыосынызы вераськыны кутски. Туж трос материал люкай, адямиос асьсэос мыным вазиськылӥзы. Котькудӥз вераз со сярысь, мар сое сюлэмшугъятэ.
Кылсярысь, одӥг воргорон мыным экскурсия ортчытоно кариськиз. Со восстание вакытысь окопъёсты шедьтэм: Ижысь Строительысь завод палан нюлэскын музъем пыр гудэмын. Кыдёкын ӧвӧл чугун сюрес ортче — стратегия ласянь туж кулэ инты. Со окопъёс сярысь калык уг тоды. Воргорон киноям Ижкарысь заводын ужасьлэн архетипез кадь адӟиське: ужзэ яратӥсь, сое ӟеч тодӥсь адями. 19-тӥ даурлэн пумысеныз семьяысьтыз пиосмуртъёс заводын ужало. Киноям со винтовкаез сэрттэ но бича. Сэрттэм винтовкалэн люкетъёсыз кияз туж ӝог пыӵал тӥрлыклы пӧрмо. Со кыӵе ке синпӧртман кадь.
Мукетыз герое — Иван Пастухов большевиклэн внучатой племянницаез Татьяна Николаевна. Со сюлмаське, Ижысь Пастуховлэн коркаез сисьмыса улэ шуыса. Со 1869-тӥ арын пуктэмын, Нылпиослэн творчествоя дворецссылэсь кыдёкын ӧвӧл. Элькунысьтымы историысь памятникен лыдъяське, но сое нокин уг тупаты. Мон 2017-тӥ арын нырысетӥ кадръёс лэсьтӥ, соку коркалэн укноосыз пулъёсын шуккылэмын вал. Алигес вӧзтӥз ортчи: эшшо но золгес куашкам ини.
Кино лэсьтыку, учкисез историен кызьы ке но тодматоно нырысь. Та секыт уж. Мынам уг поты аслэсьтым малпанме вераме, куд-ог дыръя аслам малпанэ но ӧвӧл. «Знамя…» кинолы мон вакчияк текст дасяй но сое кӧня ке пол возьматӥсько, адямиослэн восстание сярысь пичи ке но тодон-валанзы мед луоз шуыса. Учкисьёслэн со бордысь асьсэлэн малпанзы мед кылдоз — котькудӥзлэн аслаз.
Оглом верано ке, мон тырши возьматыны, мар адямиос малпало но верало ортчемез сярысь, кызьы соос асьсэды ортчеменыз герӟало. Кино лэсьтонъям мукет тема ачиз кылдӥз. Ижын тросэзлэн кылэмзы но ӧвӧл та восстание сярысь, со Россилэн историяз туж бадӟым пытьы кельтӥз ке но. Калыклэсь тодымтэзэ куд-ог образъёс пыр возьматӥ. Алигес оружейной заводлэн валтӥсь корпусэзлэн башняез ӝуаса усиз. Озьы мар ке но ыше, нош адямиос сое адӟытэк-валатэк кылё. Со дыре ик асьмелэн история шоры учконмы туж ӝог воштӥське, кылсярысь, одӥгзэ памятникез куашкато, нош мукетсэ пукто ке.
Озьыен, киное 100 ар талэсь азьло ортчем восстание сярысь ӧвӧл, со асьме вакыт сярысь. Али кин ке но большевикъёс пала дурбасьтэ, мукетыз повстанецъёс пала кариське. Мукетъёсызлы нокытчыязы но уг йӧты. Вал-а, ӧй вал-а… Со ваньмыз мифология, но со мифъёс нимысьтыз адямиослэсь улонъёссэс вошто. Кин ке егитъёс пӧлысь серекъялоз но, 100 ар ортчыса, адямиос та пумысен керето на шуыса.

В. Познерен пумиськон. 2012-тӥ ар

— Тон Ижкарысь эшшо одӥг миф сярысь кино лэсьтӥд. Солы осконо ке, городмы 20-тӥ даурлэн пумаз электронной крезьгурлэн шоркарез вал.

— Бен, 2017-тӥ арын «Утопленники» киное потӥз. Университетын дыштскыкум, мон тунсыко крезьгурез, нью-эйджез, шудӥсь музыкантъёсын тодматски. Соку Восточно-Европейской университетын «чайно-барабанной» ӝытъёс ортчылӥзы. Кытысь ке кылӥ, городмес «электронной крезьгурлэн шоркарез» нимало вал шуыса. Ижын, пе, 1980-тӥ-1990-тӥ аръёсы тунсыко егитъёс аспӧртэм крезьгур кылдытъяллям. Огласянь, Ижкарысь крезьгурчиос Западысь музыкантъёслэсь адӟем каризы, мукет ласянь — асьсэлэн куаразы чузъяськиз, кыӵе ке этнической инъетэз но вал отын. Со крезьгурлэн выжыосыз татысь, Иж музъемысь, пото. Та монэ туж паймытӥз, соин кино лэсьтыны малпай.
Мон трос материал люкай: крезьгур, клипъёс, вуж передачаос, статьяос… Со сяна, крезьгурчиосын пумиськылӥ. Тросэз Москвае улыны выжизы, но Ижкаре куд-ог дыръя куное бертыло. Питерын Артемий Троицкий критикен пумиськылӥ. Со али Эстониын улэ, Россие вуылыкуз, соин герӟаськыны быгатӥ. Со киноям палэнысен учкись эксперт сямен вераське. Жаляса верано, люкам материалысьтым ог 90 процентсэ киноям ӧй пырты. Фильм бордын ужаку, ӵем озьы луэ. Но сотэк ӧйлась — ваньзэ пыртӥд ке, кино куашкалоз. Куддыр бӧрдоно, тунсыко кадръёсты вандыса кельтыку.
Мон кинолэсь нимзэ алигес воштӥ. Крезьгурчиос вазиськизы: ми улэпесь, малы тон милемыз выем муртъёсын ӵошатӥд? Ма, мон бӧрысь ачим но валай, кинолы «Утопленники» ним туж ик уг тупа шуыса. Али со «Ижвейв» — «Ижкар тулкым» — нимаське. Мон нырысь озьы одӥг проектме нимай вал. Малпай «крезьгуро кинотеатр» радъяны, музыкантъёсын кино возьматъяны. Бӧрысь аналтӥ. Мон озьы ӵем карисько: кыӵе ке уже уг кельшы ке, жалятэк куштӥськисько солэсь. Мар ке но уг пӧрмы ке, ӵок, со понна тодон-валан, кыӵе ке быгатон люкаськиз. Бӧрысь со мукет ужын кулэ луоз.
«Ижвейвез» али но пӧртэм каръёсын возьматъяло, со «Ютубын» вань ке но, адямиос сое ӵошен учкыны люкаськыло. Трос адямиос гожтӥзы ини мыным, та киноен сэрен Ижкарысь крезьгурен тодматскизы шуыса. Та кино документ кадь пӧрмиз, со антропологилы матын. Отын адямиос тодэ ваёнъёссэс гинэ верало, соосын номыр уг луы. Нош «Знамяеным…» мынам улонысь мае ке но воштэме потӥз. Со спектакль кадь, отысь геройёс быръем рольёссэс шудо: таиз заводын ужась, соиз красноармеецлэн нунокез, мукетыз гусар… Соос уг но валало, асьсэлы кыӵе ке сценарий бырйизы но соя уло шуыса. Киноям со спектакльёс ваче вуизы.

А. Троицкий критикен Санкт-Петербургын. 2016-тӥ ар

— Тон киноостэ огнад лэсьтӥськод: ачид режиссёр но, оператор но, монтажёр но, продюсер но.

— Берло дыре адямиосын ӵемгес ужасько ини. Али университетамы студия усьтӥське, отын тросгес ужано луоз.
Университетын арняяз кӧня ке пол студентъёсын пумиськисько. Лекциос лыдӟыны уг яратӥськы. Кызьы видеоен вырыны, лекция лыдӟыса, дышетод? Ми проектъёс бордын ужаськом. Фильм лэсьтэмлэсь азьвыл мар ке радъяськом. Кылсярысь, алигес благотворительной выставка ортчытӥм. Университетамы дизайнъя факультетын трос суредъёс люкамын вал. Ми соосты вузам, поттэм коньдонэн канцтоваръёс басьтӥм но Ижысь огаз реабилитационной центре нуим. Со ужмы сярысь фильм пӧрмытӥм.
Университет киноосылэн спонсорез луэ, аппаратураен юрттэ. Со сяна, «Утопленники» кинолы прокатной удостоверение басьтыны мон краудфандинг (веме) амалэн уксё бичай.
Мынам ноку рос-прос, ӵукнаысен ӝытозь, кытын ке ужаме ӧй вал. Огпол телерадиокомпание интыяськыны малпай, но монэ ӧз кутэ. Но мон шумпотӥсько, телевидение ӧй сюры шуыса — со мыным матын ӧвӧл. Мон али куд-ог дыръя телевиденилы репортажъёс лэсьтӥсько, шаерамы ортчись ӵошатсконъёсты, матчъёсты видеое пуктылӥсько. Огласянь, умой: пӧртэм интыосы вуылӥськод, мар ке тунсыкозэ адӟиськод. Но телевидениын ваньмыз вылтӥз возьматӥське, йылозяз-пумозяз номыре валаса уд вуттӥськы.
Мон коньдон поттӥсько, видео лэсьтыса, адямиослэсь куронъёссэс быдэстӥсько. Азьло сюанъёсты но пуктылӥ, али бырйиськись луи. Мон бадӟым ини.

— Удмурт культураен тунсыкъяськиськод-а?

— Мынам удмурт кылын видеокылбур лэсьтэме вань. Гуманитарной лицейын Зоя Лебедева дышетӥсе вал. Ми дораз, Пичи Пурга ёросысь Брангуртэ, экспедицие потам. Соку ик отчы Тываысь шаман вуиз. 8-тӥ даурысь китай кылбурчилэсь Ли Болэсь кылбурзэ удмурт кылэ Наталья Образцова беркытӥз, со ик кылбурез лыдӟиз. Озьы ми ваньмы ӵошен шундылэн ӝужамез но пуксемез сярысь видеокылбур лэсьтӥм.

— Азьланяз мар ужаны чакласькод?

— Мон али сюрес вожын сылӥсько. 2 ар ӵоже лэсьтэм «Знамяме…» алигес йылпумъяй. Тулыс кышноеным люкиським. Уж дурын ваньмыз воштӥське. Огласянь, ортчемез монэ уг на лэзьы, но азям трос сюресъёс усьтӥсько. Оло, мукет интые улыны выжо. Но мыным Ижкар туж кельше, татын олокыӵе но ужрадъёс ортчо, йӧспӧртэм адямиос уло. Тунсыкоез ӧй ке луысал, кино ӧй лэсьясал.
Мынам одӥг малпанэ вань — муш вордэме потэ. Пичи дыръям мушъёсын выреме вань. Анае гуртысь, атае городысь. Соос заводын тодматскизы, бӧрысь анае Ижысь ӟуч театрын режиссёрлэн юрттӥсез луыса ужаз, атае сторож вал, собере вуз кариз, челночество шуонэн выриз. Мон Ижкарын вордски, но егит дыръям ми гуртэ выжим — анайме гурт улон бордаз кыскиз, соин ми пудо вордӥм. Котькуд нунал городэ школае ветлыны секыт вал. Но со дырысен муш вордон сюлмам кылиз.

— Выль кинодэ кытысь адӟыны луоз?

— Сое 15-тӥ июне 18 часын Ижысь Туала драматургияя но режиссурая центрын (ЦСДР) «Знамя. Сто лет после восстания» киноме (12+) возьмато, бӧрысь кенешон луоз. Нырысетӥ адӟытон азьын кадь сюлмаськисько. Мар ке лэсьтыса, котьку витиськод: мар учкисьёс шуозы, кыӵе мылкыдзы луоз. Адями ас кожаз улыны уг быгаты. Котькуд уж калык понна луэ.

Анастасия Шумилова

Ангелина Снигирева
By Ангелина Снигирева Июнь 10, 2019 16:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<