Ож йылпумъяськымтэ на…

Ангелина Снигирева
By Ангелина Снигирева Июнь 21, 2019 14:44

Берло 30 арзэ Ижысь Е. Драгунов нимо индустриальной техникумысь историен дышетӥсь, шаерысьтымы поисковикъёслэсь «Долг» огазеяськонзэс кылдытӥсь но валтӥсь Фаиль ИБРАГИМОВ одӥг малпанэн улэ: фронт бервылъёсысь тросгес солдатъёсты поттоно. «Долгысь» егитъёс чиптэм-чаптэм ышем солдатъёсты утчало, соосты ватыны юртто. Туэ Ленинград котырысь 18 солдатэз шараязы ни.

Ф. Ибрагимов

— Быдӟым ожлэсь кутскон нуналзэ, 22-тӥ июнез, арысь аре ӝожгес но ӝожгес мылкыдын пумитано, — шуэ Фаиль Фаизович. — Соин но, лэся, тросгес чалмыт улэм потэ. Чалмытын тросгес кылӥське но адӟиське. Ож вормонэн уг йылпумъяськы на. Экспедициын вераськонэн йырин но ӧвӧл. Ми угось сюйысь ӝутэм солдатъёсты ватыны дасяськомы. Ӵемысь со 10-тӥ майлы тупа. Асьсэос солдатъёс лыктэммес, соосты шедьтэммес возьмало кадь.

— Фаиль Фаизович, тӥ асьтэос кинэ утчаськоды? Тӥлесьтыд киндэс талаз каргам ож?

— Анае пичи дырысеным весь вералля вал ож вылтӥ секыт улэм-вылэмзэс. Атайзэ фронтэ басьтэмзы берегес ик 1942-тӥ арын анаез кулӥз. Озьы огзылэсь пичи мукетыз 5 нылпиос быдэс юртэ огназы кылизы. Пичиезлы 1 арес но ӧй вал на. Эстымтэ коркан со кӧкыын ик кынмыса кулэм. Нылпиос толалтэ улэп кылён понна музъемысь кынмем картошкаез поттаса сиё вылэм. Атайзы фронтысь ӧз ни берытскы — штрафбатын быриз. Сое туннэ ке но ӧй шедьты на. Озьы ик утчасько анаелэсь агайзэ. Оже кошкон азяз кикыен час пушкы гожтэт поныса кельтэм, ог-огзэс ноку ӝож медаз каре шуыса курем. Часэз заводьыкузы, ӵыжы-выжыосыз шедьтӥллям гожтэтсэ. Латвиын Гумар Ахметовлэн шаез вань шуыса шараяй ни. Но со мынам дядяе-а, ӧвӧл-а — уг тодӥськы на.

Погранвойскоосын службаме ортчыкум, сюлэмам уката юнмаз кадь ӵыжы-выжыосме утчан мылкыд. Историен тунсыкъяськон но сокугес пушкам сайказ, лэся. Соин но армия бере Удмурт кун университетысь историяя факультетэ пыри. Сое йылпумъяме бере монэ ӧтизы Ижысь 4 номеро ГПТУ-э (али 4 номеро техникум), милемлы, пе, дышетӥсь но, комсомол огазеяськонлы секретарь но кулэ. Афганистанын ожмаськонэ пыриськемъёс училище бордын кылдытӥллям пиналъёсты армилы дасянъя «Память» клуб. Монэ но нылпиосын ужаны ӧтизы. Пиналъёсты парашютэн тэтчаны, акваланген зымылыны, парапланэн лобаны, асьсэды утьыны дышетылӥмы, мугорзэс кыдатӥмы.

Огсыр улон но ужан сямен син шоры шуак йӧтӥз Москваын потӥсь «Собеседник» газет. Казаньысь кун университетысь студентъёс Новгород улосысь Мясной Бор гурт котыре раскопкаосы поталлям. Историк сямен мон тодӥсько вал: Мясной Бор — 2-тӥ ударной армилэн ожмаськон но котыртэме сюрем интыез, сое Долина Смерти шуо. Армилэн кивалтӥсез генерал Андрей Власов соку фашистъёслы пленэ сётскиз. Кылбурчи Муса Джалиль 2-тӥ ударной армилэн «Отвага» газетэзлэн редакторез вал, ӵапак со интыосын пленэ сюриз. Соин но бигеръёс экспедицие потазы, туспуктэмъёсын бадӟым материал печатлазы. Тодӥсько вал, котыртэмын дасо сюрс солдатъёс быремын шуыса. Но газетэз лыдӟеме бере малпаськонэ уси: малы татчыозь солдатъёс ватэмын ӧвӧл? Мылкыд ӝутӥськиз: оло, милемлы но поисковой движение кылдытоно? 2-тӥ ударной армие быдэс Приволжск федерал округысь солдатъёсты бичазы вал ук.

Урок ортчытон дыръя

— 1989-тӥ ар. Удмуртиын нокин но поисковой отрядъёсын потамын ӧй вал. Макем секытэн сётӥськиз котырады адямиосты люкан?

— Соку 25 муртэ огазеяй. Тросэз соос пӧлысь — студентъёс. Малы нылпиосты басьтӥ? ГПТУ-э сюремъёс туж шаянэсь вал. Улонлы дышетэме потӥз соосты, визьмаме, олокытчы но медаз сюре, адями мед луозы шуыса. Нылпиослы экспедициын капчигес мед луоз шуыса, вазиськи Ижысь 18 номеро военной трестэ. Соос грузовой машина висъязы, милесьтым секыт котырмес — лопатаосмес, палаткаосмес но мукет инвентарьмес — машинаен Мясной Борозь нуизы. Асьмеос — поездэн.

Со вакытэ мар со экспедиция, валасез рос-прос ӧй вал на. Куд-ог отрядъёс шутэтскыны лыктӥмы кожаллям, лэся, — воштӥськон дэремъёсын гинэ вуиллям. Нош татын кузь кунчиё сапег, ӟеч снаряжение кулэ. Куд-ог азе гусеничной тракторен сяна пырыны но уг луы. Соин ик троссэ доразы келязы. Нош милям группаямы 16 аресъемъёс но шедизы ке но, соос котькыӵе шуг-секытъёслы дась вал.

Нюлэскы пырыкумы ик, война вакытысь РГД-33 граната шедьтӥмы. Нылпиос кышкатскизы. Аслам но сюрлые кузя юзыр-кезьыр ортчиз. Военной лагере сапёрез ӧтьыны адями келямы. Сапёр лыктӥз но шуэ: граната я пуля шедьтэмдылы быдэ-а, пе, монэ ӧтчалоды. Гранатаез кияз бергатӥз-бергатӥз но сэрпалтӥз: та уз пушты ни, пе. Бератаз адӟимы: пыд улын сыӵе арбериос лыдъяса быдтонтэм. Соосты ми огазе бичаллямы ик. Соосты отӥяз пуштытъязы. Но нюлэскы пырыку, сюлэм ялан тымиське: ож кемалась ортчемын ни, нош татын толон гинэ кадь ожмаськон чалмемын. Пыд улын каскаос, котелокъёс, пуньыос, минаос, снарядъёс, пыӵал тӥрлык пумтэм костасько, снарядъёслэн пуштэм гуосазы, писпуос улын, возь вылын — котькытын солдатъёслэн лысьӧмъёссы.

— Пиналъёс кызьы сое чидало?

— Огпол туж юзырес вал госпитальлы шуыса чаклам возь вылын. Татчы сюрсэн-сюрсэн сӧсыръёсты радэн-радэн пулэсь носилкаос вылэ тыриллям. Соосты озьы котыртэмысь поттыны дасяллям. Учкиськом но, ваньзылэн йыркобызы пасямын. Сӧсыръёсты озьы асьмелэнъёс ик одӥгтэм ыбылӥллям, поттэмзы луымтэысь, огзы но немецъёс киулэ медам сюре шуыса. Учебникъёсъя историез дышетэм муртъёслы тае ваньзэ валаны но адӟыны туж шимес, таин тэрытӥськыны туж секыт. Улонэз золгес дунъяны кутскиськод.

Нылпиос сярысь ке… Нырысетӥ экспедициосы пыриськемъёс табере сьӧразы нылпиоссэс нулло ни. Туж тросэз дорам лыкто, соку, 30 ар талэсь азьло, котырам люкаме но экспедицие поттэме понна тау каро. Кыкез студентъёсы Чечняын ожмаськон пыр потэмын, медальёсын, орденъёсын пусъемын. Тӥляд визьмамдылы луыса ожысь улэп бертӥмы, шуо. Тросэз созэ но верало: тӥ бордады ӧй карысалды ке, тюрьмае шедьысалмы, урод сюрес кузя кошкысалмы.

Экспедицие — семьяеныз валче

— Нырысетӥ экспедиция бере асьтэос но выльысь вордскем кадь луиды, вылды?

— Иже берытскыса, Мясной Бор котырын ожмаськем ветеранъёсты утчаны кутски. Сюриз Алексей Семёнович Солодянкин. Со сьӧрамы экспедицие куриськиз. Ож вакытэ со младший лейтенант вал. Сое немецъёс палан ожмаськись испанецъёс пленэ кырмизы. 3 ар пленын возизы. Тылскем дурын синвуаськыса вералляз, кызьы армия котыртэмысь мозмытскыны выриз. Быдэс ар ӵоже 2-тӥ ударной армиез немецъёс инмысен но, музъем вылысен но ыбылӥзы. Пыӵал тӥрлык, сиён асьмелэнъёс вуттыны уг быгато. Котыртэмысь потыны сюбег коридоретӥ гинэ луэ. Со но куддыр 150-200 метр кыльылӥз. Сэзьёсыз но оскымонъёсыз со коридоретӥ пыӵал тӥрлыклы но снарядлы бызьыло вал.

Алексей Семёнович бӧрдыса гудӥськиз. Иже берытскеммы бере «Вторая ударная» кырӟан гожтӥз. Ми сое али ке но кырӟалляськомы гитара шудэм улсын.

— Но вуонояз аре тӥ Ленинград котырын гудӥськиды. Малы интыдэс воштӥды?

— 2-тӥ ударной армия Любань палан но ожмаськиз. Любань котырын 3 ар ӵоже асьмелэнъёс Ленинградэз немецъёслэсь утьыны выризы. Но та интыосы ноку нокин вуылэмын ӧй вал на. Пырыны-потыны отчы шуг — нюр интыос лачак. Соин ик эскероно кариськимы Любань котыръёсты. Со милям базамылы пӧрмиз ни.

30 ар экспедициен потасько ни. Туннэ ке но паймемысь уг дугдӥськы: асьмеос вормимы, но малы асьмеос асьме солдатъёсмес дыраз но сӥё-дано ватыны ӧм быгатэ, малы али ке но та ужез пумозяз лэсьтыны ум пӧрмытӥське? Малы со, поисковикъёслы сяна, нокинлы но кулэ ӧвӧл? Тани «Долг» — общественной огазеяськон ук, энтузиастъёс вылын возиське. Ярам, ёросъёслэн йыръёссы юртто ватӥськон нуналэ. Но кытчы но ӧм вуылэ ни — Мурманск, Карелия, Краснодар котыре — котькытын одӥг кадь суред: асьме солдатъёс му вылын ик кыллё — куддыр вылазы 5-7 сантиметр ӝужда гинэ сюй, ӝуйы. Соосты ӝут но ват кадь. Быдӟым ож бере кышкыт вал, вылды: котыр гранатаос, минаос. Кунлы но соин йырин ӧй вал — гуртъёсты, производствоез ӝутоно. Но тужгес ӝожез но паймымонэз тани мар. Войналэсь бервылъёссэ калык син азьысь ватон вылысь, кылсярысь, Ленинград котырын ожмаськем бервылъёсы писпуос мерттэмын. Тракторен герыен солдатъёс вылтӥ ортчемын. Солдатэз шедьтӥськомы: мугорызлэн одӥг люкетыз одӥг палан, мукетыз — мукет палан, оло солэн, оло мукет адямилэн. Туж тросэз вылын писпуос будо. Тазьы кельтыны уг яра. Соосты ватыны кулэ, соос асьме улонмы понна асьсэ улонзэс сётӥзы.

Утчаськон ужрад дыръя

Вормонлы сӥзем парадъёсын гинэ Атыкай музъемез гажан мылкыд пиналъёслы уд пыӵаты. Соин студентъёсты сьӧрам ӧтисько. Уноез — индустриальной техникумын дышетскисьёс, татын дышетӥсько ук. Урокъёсме но котьку тунсыко ортчытыны вырисько, сюлэмзэс вырӟытэм потэ. Со сяна, «Поиск» кружок нуисько. Нылпиосты экспедицие дасясько. Сезон ӵоже ог 200 муртэ сьӧрамы поттэммы луэ. Пӧламы вузъёсысь но студентъёс итӥсько, гуртъёсысь но пиналъёс кыстӥсько.

Улон воштӥськемъя валаны кутскиськод: ми ум утчаське солдатъёсты, соос асьсэос милемыз шедьто. Ваньмызлы уг возьматӥсько ук. Азьвыл металлоискательёсын ветлӥськомы вал. Кортэз шедьтэ ке, куара сётэ. Солы оскылӥмы. Но ӵемысь пӧяськеме кыльылӥмы. Соин ик табере щупен ужаськомы, котькуд чузъяськем куараез кылыны дышетскиськомы. Сыӵе дыръя астэ но ӟечгес кылыны кутскиськод. Куддыр выльысь но выльысь берытскиськод ортчем интые, татын солдат луыны кулэ шуыса. Шедьтӥськод. Котыраз эшшо мукетъёсыз возьмало. Интыен-интыен ог-огзы вылын кадь кыллё — сокем трос быремын.

Паймымон учыръёсын но пумиськоно. Туэ тулыс огзэ солдатэз сюйысь ӝутыны оскимы Татарстанысь нылпи колониысь 6 пиналъёслы. Нырысь пуньыез потӥз. Со вылын ӵабъямын: «Мезрин Д.П. 15.1.1942 осужден военным трибуналом к 10 годам лишения свободы». Архивъёсын бугыръяськыны кутским. Зэмен ик вань сыӵе адями, Башкириысь. Малы ӵапак нылпи колониысь пиналъёслы возьматӥськиз со? Озьы тупаз, шуоз кин но со. Шайвылын номыр но огшоры гинэ уг тупа. Миым сьӧрамы Ижысь автозаводской больницаысь хирург Валерий Казанцев ветлӥз. Ӝыт ни ӵошен потӥмы эскериськыны. Валера, уд сокы, но тани тыныд кузьым, шуисько. Пуньы шедьтӥ, нош вылаз солэн фамилиез — Казанцев — гожтэмын. Сыӵе интыосын оломарлы но оскыны кутсконо.

— Немецъёсты кыӵе мылкыдын шедьтӥськоды?

— Нырысь соосты тушмон карыса ум ик ӝутӥське вал — совето вакытэ фашистъёсты адӟемпотостэм карон мылкыд зол пыӵатӥзы. Али, немец солдатэз шедьтӥськомы ке, одно ик ӝутӥськомы. Со но сыӵе ик солдат, передовое ыстэм мурт ук, татын генералъёс ӧвӧл. Немецъёслэсь шӧйёссэс, арбериоссэс сетӥськомы воинской захоронениосты утялтонъя народной союзлы. Отысь адямиос немецъёсты Ленинград улосысь Сологубовка гурт дорысь огъя шайвылэ вато. Германия аслэсьтыз солдатъёссэ ас дораз уг басьты угось. Ӵыжы-выжыоссы вуыло я уг — созэ уг тодӥськы. Япония тани асьме музъем вылын бырем солдатъёссэ сӥлы каре. Дальний Востокын Шумшу шормуӵын раскопкаос дыръя шедьтэм японецъёсты кунгож сьӧры поттон понна но сюлмаськылӥмы.

— Солдатъёслэсь ӵыжы-выжыоссэс шедьтон макем ӝог ортче?

— Куддыр 2-3 час тырме. Туэ 9-тӥ Май азьын Дмитрий Яковлевич Мингалёвлэсь лысьӧмъёссэ, пуньызэ шедьтӥмы. Свердловск улосысь вылэм. Правнукез 10-тӥ мае ватӥськон нуналэ дорамы вуиз. Солы песятаезлэсь котырзэ сётӥмы.

Шедьтэм ожгарчилэсь арбериоссэ ӵыжы-выжыосызлы сётон дыръя

30 ар ӵоже милям огазеяськонмы гинэ 6,5 сюрс солдатъёсты ӝутӥз но ватӥз ни. Шедьтымтэос талэсь но трос. Нырысь-валысь солдатъёслэсь лыдзэс ӧм ик чоталэ, журналамы ӧм гожъялэ — ӝоггес сюе ватэм потылӥз. Сомында солдатъёс вал — ватыса вутты гинэ. Соку опыт но ӧй вал на. Туннэ котькуд солдатлы бадӟым саклык висъяськомы. Туспуктӥськом пиньёссэ. Одӥг пиньзэ базае но кельтӥськомы, отӥяз ДНК лэсьтыны мед луоз шуыса. Акт гожъяськомы. Котыр ласянь эскериськомы солдатлэсь арбериоссэ, медальонзэ. Люкам материалэз келяськомы Обороная министерстволэн Подольскысь архиваз. Соос бордын пыр-поч ужаны асьмеос ик отчы вуылӥськомы. Зэм, берло дыре Подольске но потыны шуг луиз — уксё уг тырмы. Асьме кисыысь поттоно луэ ук. Грант вылын трос уд улы.

Жаляса верано, арысь аре экспедициос дыръя шедьтэм солдатъёслэн лыдзы уг кулэсмы. Туж тросэз ватэмын ӧвӧл на. Шедьтэмъёсыз пӧлысь но 2,5 сюрсэзлэн гинэ ай нимъёссы шараямын. 10 солдат ваемын Удмуртие. Но мон ваёнлы пумит. Кин ӝот-ӝот тодэ, кыӵе солдатлэн со лысьӧмыз? Пумозяз тае ноку ум тодэ ни. Соин ик солдатъёсты огъя шае ватыса ик умойгес шуыса лыдъясько.

— Кыӵе малпанъёсын улӥськоды?

— Псков котырын Удмуртиын кылдытэм 98 номеро дивизия ожмаськиз. 313-тӥ дивизимы — Карелиын. 357-тӥез — Смоленск но Тверь котырын. Та интыослы бадӟым саклык висъяме потэ. Со сяна, Мурманск, Краснодар котыръёсты эскереме потэ на. Уксёен берло дыре секытгес. Туэ асьме коньдонэн потамы. Нош студентъёслы секыт коньдон шедьтыны. Соин но группамы кулэсме но кулэсме. Нош адямиос вазисько: мынэсьтым но песятайме шедьтэ, отын-отын ожмаськиз…

Куддыр мар но со лэсьтыны луэ ик. Россиысь Общественной палаталэн экспертэз луисько бере, луонлык кылдэ бырем солдатъёсты ватонъя законэ воштонъёс ӵектыны. Кылзӥсько. Озьы Обороная министерстволы дэмланъёс пӧлын вал поисковой батальон кылдытыны. Табере отчы асьмелэсь пиосмес но службае келяны кутскимы. Но со батальон быдэс Россилы одӥг. Со огназ вань ужез уз вормы. Пуктӥськемлэсь азьвыл фронт бервылъёсты котыр ласянь эскероно. Таӵе ӵектонэн али потӥм.

Шедьтэм солдатъёсты ватон. 2019-тӥ ар.

Патриотизмез пыӵатыны школаысен кутсконо, шуо. Но парта сьӧрын солы уд дышеты — нылпиослы улонэз возьматоно. Кылсярысь, таӵе экспедициос зэмос воргоронъёсты будэтыны юртто. Нылпиос син азьын визьмасько. Соин но али вераськисько нылпи колониысь пиналъёсты поттон сярысь. Со сяна, егит калыкез шаерамы воинской захоронениослэсь электронной базазэс кылдытон борды кыскимы ке, со трослы пайдаё луоз. Сыӵе базамы туннэ ӧвӧл. Вырисько на музей кылдытонэн. Милям туж трос материалъёсмы. Соосты радъянэ нылпиосты кыскыны луысал.

— Асьтэлэн 3 пиосты. Соос сьӧрады вуттӥсько-а?

— Куинез ик сьӧрам экспедициосы ветло. Кузпалме но мон экспедициын пумитай. Со но дышетскемезъя историк. Семьяе котьку бордам. Ми ваньмы одӥг ужен герӟаськемын. Утчаськон милемыз кужмогес, юнгес каре. Семьяе ӧй валасал ке, огнам тамында лэсьтыны ӧй быгатысал.

Елена Сараматова

Ангелина Снигирева
By Ангелина Снигирева Июнь 21, 2019 14:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<