Мурт шаерын уг муртало

Ангелина Снигирева
By Ангелина Снигирева Июнь 6, 2019 17:14

Шаерамы арлы быдэ 40 сюрслэсь ятыр кунгожсьӧръёс вуыло. Пӧртэм мугъёсъя: кин ужаны, кин дышетскыны яке турист сямен. Кызьы соос асьсэды республикаямы шӧдо? Кызьы соос шоры учко шаерамы улӥсьёс?

Россилэн кунмуртэз луыны мылкыд карисьёс присяга сёто
Фото: 18.мвд.рф

Кунокуа ӧвӧл ке но…
Та ужпумъёс алигес ӝутэмын вал Адямилэсь правооссэ утёнъя уполномоченной бордын кылдытэм Экспертной советлэн кенешоназ. Радъяськиз со Вотка ёросысь Кудрино гуртын. Инты юнме шорысь быръемын ӧй вал — ӵапак отын 2015-тӥ арысен усьтэмын кунгожсьӧр гражданъёсты огдыре возёнъя центр.
Кинлэн ужез озьы-а, тазьы-а герӟаськемын мигрантъёсын — ваньзы люкаськизы: Калыклы улон-вылонын утён политикая но ужъя, Нациосын ужан политикая министерствоосысь, МВД-ысь, Верховной судысь, Прокуратураысь, Роспотребнадзорысь специалистъёс. Кунгожсьӧр гражданъёсты огдыре возёнъя центрлэн кивалтӥсез Рафис Кудусов соосты нырысь ик ӧтиз экскурсие.
Центр юнме уг лыдъяськы Приволжск федерал округын одӥгез устоез. Лэсьтэмын со туала куронъёсъя, мигрантъёслы вань условиос кылдытэмын: комнатаосын ик (тюрьмаын кадь камераос татын ӧвӧл!) душ, туалет. Соосын одӥг липет улын ик столовой.

  • Но сиён татын ум пӧраське — вайиськом, — вераз Р. Кудусов. — Кӧтсы уг тыры шуыса ӝожтӥськисьёс ӧвӧл. Сиёнзэс комнатаязы но пыртыны быгато.
    Поръян интызы — нимысьтыз, бадӟым ик ӧвӧл, но ӟусъёс но, мугорез кыдатыны куд-ог тренажёръёс но пуктылэмын.
  • Ку мылзы потэ, соку ик поръяны потыны быгато, — валэктӥз центрлэн кивалтӥсез. — Бер ӝыт гинэ ум лэзиське ни. Зэм, мигрантъёс тросгес луо ке, черод кылдытытэк уг луы.
    Кунокуа шуыны та центрез кыл уггес ик пыры. Угось со котыртэмын бышкись ёзъёсын. Мигрантъёслэн комнатаосазы — зӧк кортлэсь ӧсъёс.
  • Но кунокуаын кадь луыны но кулэ ӧвӧл, дыр, угось татчы ӵемысь огдырлы интыяськом Россилэсь законъёссэ тӥясьёсты, — шуиз центрлэн кивалтӥсез. — Валамон, котькудзылэн соослэн асьсэлэн историзы.
    Центр 59 муртлы чакламын, троссэ 42 кузя луылӥллям. Та вакытэ — 7 кузя. Белоруссиысь Юлия, кылсярысь, шуэ: Иже дырын-дырын вуылӥсько яратоно воргоронэ доры. Та рад паспортме лушказы. Со сярысь полицие заявление гожтӥ — штраф тырыны косӥзы. Уксёе ӧвӧл бере — ӧй тыры. Вуттӥзы татчы. Табере, пе, Россие выльысь, 5 ар ортчытэк, пырыны уз лэзе ни.
    Узбекистанысь Нарджикулов фамилиен егит пияшлэн аслаз учырез: Свердловск улосын ужам, отын патент (ужаны лэзись документ) басьтэм. Но Ижысь тодмоосыз ӧтиллям доразы. Табере, юрттэ курыса, вазиське Адямилэсь правооссэ утёнъя уполномоченнойлы, оскытэ: Иже со огдырлы, тодмоосыныз адӟиськыны гинэ, лыктӥз вал. Нырысетӥ нуналаз ик ӝегатӥзы, ужаны ӧз кутскылы. (Законъя, мигрантъёс ужаны быгато со улосын гинэ, кытын патент басьтӥзы но регистрация лэсьтӥзы.) Зэмзэ ик-а Нарджикуловлэсь правооссэ тӥяло — табере эскероз Адямиослэсь правооссэ утёнъя оскем мурт.
    Уполномоченной Вениамин Соломенников верамъя, правооссэс утьыны курыса вазиськись мигрантъёс трос ӧвӧл, кылем арын 17 вал, туэ …кузя луизы ни. Данакез судлэн решениеныз соглаш карисько но доразы кошко. Кылем арын, озьы, кылсярысь, 169 мурт озьы кошкиз, со пӧысь 89-сэ кужмысь улляно луиз. Туэ суд 49 мигрантэз дораз келяз ни.

90 нунал
МВД-ысь миграциосъя ёзэн кивалтӥсь Константин Дубровин верамъя, арлы быдэ элькунамы 40 сюрслэсь ятыр мигрантъёс лыкто. Туэ 4 толэзь ӵоже 13 сюрс пала вуизы ни. Ог 80 процентэз СНГ-е пырись кунъёсысь. Вань на Китайысь, Германиысь, Франциысь, Турциысь но мукет кунъёсысь лыктӥсьёс. 7,7 процентэз — турист чотын вуо. Вань дышетскыны, куное лыктӥсьёс. Бадӟым люкетэз — ог 44 процентэз — мылкыд каро ужаны. Соос чотын элькун бюджетэ туэ 123 миллион манетлэсь трос пыртэмын ни: толэзьлы патентлэн дуныз — 3 сюрс 942 манет.

  • Шаерамы кылем арын ог 25 сюрс йыруж лэсьтэмын вал, со пӧлысь 0,4 процентэз гинэ герӟаськемын мигрантъёсын, — пусйиз МВД-ысь общественной порядок понна кыл кутӥсь Сергей Козлов. — Озьыен, мигрантъёсын сэрен йыртэман, йыруж лэсьтонъёс тросгес луо шуыны уг луы. Куд-огез уг чаклало азязы пуктэм куронъёсты — кылсярысь, 90 нунал ӵоже улон, ужан инты шедьтыны кулэ. Нош соос уг но шедьто, берен уг но кошко. Таӵеосты кыл кутон улэ кысконо луэ.
    Роспотребнадзорысь специалистъёс но мигрантъёс сярысь уродзэ вераны уг быгато. Кыӵе ке висёнъёс дорамы ваё шуыны уг луы, пе. Угось кунгожсьӧрысь ужаны но, дышетскыны но лыктӥсьёс одно пото эмъясьёс пыр — соосты пӧртэм специалистъёс учко. Висёнзы шараяське ке, йӧнатӥськыны дэмлало. Но ас уксёенызы. Ӵемысь секыт висёнъёс, кылсярысь, куртчангы (сифилис), туберкулёз шараяськыку, тросэз берлань кошкыны мылкыд каре — Россиын йӧнатӥськон дуно усёз, шуо. Кинлэн ВИЧ инфекциез шараяське, таӵеослэсь мылкыдзэс уг юало ни — соку ик доразы келяло.

Бордамы басьтоно
Оглом государство шуэ: мигрантъёс асьмелы кулэ — ужась киос уг тырмо. Соос ужало но, казнае коньдон но пырто. Со дыре ик Нациосын ужан политикая министерстволэн калык пӧлын ортчытэмын юалляськонъёсыз возьмато: кызьы Россиын, озьы ик Удмуртиын улӥсьёс туж ик уг шумпото палэнысь лыктӥсьёслы. Кылсярысь, шаерамы юалляськонъёсы пыриськемъёс пӧлысь 62 процентэзлэн мигрантъёсын огкылысь кариськемзы уггес потты. Уката но калыклы сюлэмызъя ӧвӧл вуз каронэн вырись мигрантъёс. Озьыен, калык пӧлын валэктон уж нуэмысь дугдоно ӧвӧл, верало Нациосын ужан политикая министерствоысь специалистъёс. Россилэн Президентэз Владимир Путин но та ужпумлы нимысьтыз саклык висъяны куриз, 2017-тӥ арын кылдытэмын Нациосын ужанъя федерал агентство. Шаерамы та ужен вазенгес ик выре ни Нациосын ужан политикая министерство. Озьы матысь аръёсы пӧртэм выжы калыкъёслы сӥзем ужрадъёс уката трос луыны кулэ, отчы пыриськыны мед быгатозы ужаны лыктӥсь мигрантъёс но.

Элина Кумачёва

Ангелина Снигирева
By Ангелина Снигирева Июнь 6, 2019 17:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<