Малпанысен — законозь

Ангелина Снигирева
By Ангелина Снигирева Июнь 27, 2019 16:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Егитъёслэн парламентсы ёросысь ёзчиоссэ 27-тӥ июне «Инициатива» форуме бичалляз. Озьы шаерысьтымы егит азьветлӥсьёс, Егитъёслэсь нуналзэс, вылезлы дышетскыса, пумитазы.

Можга ёросысь азьветлӥсьёс
Фото: А. Снигирёва

Шаермылэн ӵуказе нуналыз али егитъёс бордысь потэ. Соин элькунмы бадӟым саклык висъя, соослы азинскыны юрттонлы. Соин но Удмуртиын Россиысь вань улосъёс пӧлысь нырысьсэ егитъёслэн политиказы пумысен закон ужаны кутскиз. Россиын та дырозь со кутымтэ на.
Егитъёслэн парламентсылэн кивалтӥсез Константин Алексеев вераз, ёросъёсысь егитъёсты таӵе форуме люкало ни 2-тӥ арзэ. Сое радъяны малпан кылдӥз гуртысь азьветлӥсьёсын пумиськон дыръя. Угось куд-ог учыръёсы егитъёслэн малпанъёссы туж тунсыкоез, но соосты улонэ пыӵатыны, кызьы проект гожтыны, мар бордысен кутскыны уггес валало. Ӵапак форум со шугъяськонъёсты тупатыны юрттысал, пе.
Форумын кӧня ке секция ужаз. Огаз егит парламентарийёс тодӥзы, кызьы малпанэз законозь вуттыны луоз. Кыӵе сюрес ортче документ, закон луытозяз, егитъёслы вераз «Огъя Россия» партилэн Тӧроезлэн Д. Медведевлэн Удмуртиысь общественной приёмноезлэн секретарез Светлана Кривилёва. Бӧрысь егитъёс асьсэос сюлмаськытӥсь ужпумъёсты сэрттон пумысен малпаськизы. Лэчыт ужпумъёс пӧлын вал, кылсярысь, гуртысь егитъёслы ужаны ярась луонлыкъёс кылдытон.
Мукетаз секциын егитъёс пумиськылӥзы экономикая министрен Михаил Туминэн. Со проектъёс бордын ужан, соосты улонэ пыӵатыны луонлыкъёс пумысен дэмланъёссэ вераз. Проект борды кутскемлэсь азьло нырысь ик валано кулэ-а со калыклы, шуиз министр. Егитъёслэн парламентсылэн ёрос ёзъёсыныз кивалтӥсьёс понна нимаз дышетон ужрад ортчиз на. Соослы азьветлӥсь луон, азяд шонер ужпумъёс пуктон, котырад адямиосты бичаны быгатон сярысь вераз бизнес-тренер Артём Губарец.
Быгатонлыксэс шонер ӧре вӧлмытыны быгатэменызы висъясько можгаос. Та вакытэ отысь азьветлӥсьёслэн кӧня ке проектъёссы улонэ пыӵало ни. Егитъёслэн парламентсылэн ёрос ёзэныз кивалтӥсь Валентина Берёзкина соосын тодматӥз.
Кылсярысь, Пычасысь Ольга Пронина, гуртысьтызы ачиз кадь ик мыло-кыдо егитъёсты люканы быгатӥз. Соос алама улӥсь семьяослы корка пушсэс выльдыны дунтэк юртто. Со понна школаязы нимысьтыз сэрег усьтӥзы. Отчы ремонт бере кылем чыры-пыры обойёс, клейёс, краскаос ваё асьсэос гуртоос ик.
Нош Можга черкогуртысь Анна Евдокимова сюлмаське, егитъёс мед лыдӟиськозы шуыса. Нылмурт Интернетын лыдӟиськон бам кылдытӥз, отын тунсыко выль книгаосын тодматскыны, аслэсьтыд книгадэ вузаны, воштыны, кин мае лыдӟе тодыны луэ.
Бадӟым Учалась Анастасия Чернова черкысьтызы ужасен ӵош гужемлы быдэ православной лагерь усьто. Отчы арысь аре тросгес но тросгес нылпиос лыктыны мылкыд каро.
Пазялысь Алексей Курбатовен малпам «Гонка смелых» ӵошатскон быдэс элькун тыр чузъяське ни. Туэ вожвылъяськонэ лыктыны но пӧртэм амалъёсын кужымзэс мертаны мылкыд каро ни шаерысьтымы уноез спортэз гажасьёс.
Ачиз Валентина Березкина кылдытӥз вашкала удмурт дӥськут «Катар» студия. Отчы ветлӥсь нылъёс но пиос удмурт культураен мургес тодматско, сое калыке вӧлмыто. Та вакытэ студия бордын «Катар» но «Керемет» коллективъёс кылдӥзы ни. Егитъёс кырӟало, экто, мода возьмато.

Ангелина Снигирёва

Ангелина Снигирева
By Ангелина Снигирева Июнь 27, 2019 16:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<