Куное ӧте Гоша

Ангелина Снигирева
By Ангелина Снигирева Июнь 26, 2019 17:13

Берло кӧня ке толэзь ӵоже Сьӧлталан, кузьыли карын сямен, уж пӧзе — быдэс черкогуртын лэсьтӥськон, утялтӥськон мынэ. Угось кӧня ке нунал ортчыса, черкогуртын 24-тӥ гурт шудонъёс ортчозы.

Кунгож сьӧрын кадь

«Кема возьмам! Пӧсь! Асьмелэн!» — таӵе ӧтён улсын дасяськон мынэ. Зэм, сьӧлта музъем нырысьсэ гурт шудонъёсты дораз ортчытоз, нырысьсэ сомында куноосты пумиталоз. Шуыны луоз, сьӧлтаос быдэс шаерысьтымы спортсменъёсты пумитанлы кӧня ке ар талэсь азьло дасяськыны кутскизы ни. Черкогурт шорын ик пӧртэм буёло тылъёсын пиштӥсь фонтан кылдӥз, выльдэмын-тупатъямын Быдӟым ожысь синпелет вӧзысь инты. Нош кыӵе воштӥськизы черкогурт ульчаос, кунгож сьӧрын кожалод, синъёссылы оскытэк, верало асьсэос сьӧлтаос.
Урамъёс чылк-чылк утялтэмын, сяськаос мерттэмын.

Черкогурт шорын — фонтан

— Гурт шудонъёслы ми 2017-тӥ арысен дасяськыны кутским ни, — вера Сьӧлта ёрос йырлэн воштӥсез Алла Неустроева. — Зэм но, та ужрад ми понна кема витем, шумпоттытӥсь но со вакытэ ик сюлмаськытӥсь. Одӥг ласянь, солы луыса дорамы выль стадион, спортъя комплекс ӝутӥсько. Кызьы таӵе воштӥськонъёсы шум уд поты? Угось та дырозь йӧнала стадионмы гинэ но ӧй вал. Озьы ке но спортэз гажасьёс ёросын ичи ӧвӧл, милям спортсменъёсмы вормыло элькун вожвылъяськонъёсын. Нош выль объектъёслы луыса таза улонэн эшъяськисьёс трослы уноялозы шуыса оскиськом. Мукет ласянь, 1 сюрс 500 пала куноосты рос-прос пумитаны кӧня кужым кулэ. Ваньзэ ӟеч лэсьтон понна кылем арын ик шудонъёсты ортчытонъя ёрос комитет кылдытӥм, отын 13 ужан группаос, котькудӥз нимаз удысъя кыл кутэ — кин ке спорт, мукетыз лулчеберет понна, куинетӥез волонтёръёсын ужа, куно пумитан, сюдон понна сюлмаське.

Выль стадион пуктӥське

Тани-тани ӧсъёссэ усьтоз ӵыжак-выль спорт комплекс, солы аспал адямизылэсь Пор гуртын вордӥськем ӝог ветлонъя спортъя мастерлэсь Герман Скурыгинлэсь, нимзэ сётӥзы. Г. А. Неустроева верамъя, комплексысь выжъёс тыпылэсь лэсьтэмын, озьыен, юнэсь, кема чидалозы, спортивной зал пушкын интыысь интые выжтыны ярась трибунаос луозы, озьы зал пушкын ортчылӥсь ӵошатсконъёсты адӟыны капчигес луоз, пе. Татын ик луонлык кылдоз, баскетболэн, волейболэн сяна, ӝӧк выл теннисэн шудыны, нюръяськыны.

Кузьым — велосипед

Яркыт шоулы пӧрмоз шудонъёсты сӥё-дано усьтон.

— Троссэ мар ӟечез вань туннэ ёросамы, шаерамы, кунамы, асьмеос Совето Союз вакытысь басьтӥмы, — вера ёрос культурая юртысь режиссёр Ольга Дятлова. — Соин но шудонъёсты усьтонэз та вакытлы сӥзимы но «Нырысетӥослэн дырзы» нимамы. Со вакытэ кыдазы, тодмо луизы дрессировщик Иван Кудрявцев, ӝог ветлӥсь Герман Скурыгин, ум вунэтӥське М. Калашников конструктор сярысь но, туэ солэсь 100 ар тымонзэ пусйиськомы. Та адямиослы сӥзьыса, возьматон радъяломы. Сӥё-дано ужрадэ пыриськозы ёросысь «Беркут» патриотической клубе ветлӥсь пиналъёс но, соос рукопашной боевой искусствоен выро, куноосмылы быгатонлыкъёссэс возьматозы.

Кузёоссэс витё ни ӵыжак-выль медальёс но. Оглом та шудонъёсын ог 150 медальёс шудытӥськозы. Туэ ужрадлэн пусэз — велик вылын ворттылӥсь гондыр. Сьӧлта палъёс гондыръёсын узыр? Зэм, татысь тэльёсын пӧйшуръёс трос, но пуслэн мургес пуштросэз но вань. Сьӧлта ёросысь Валамаз черкогуртын вордӥськемын но быдэ вуэмын тодмо луэм дрессировщик Иван Кудрявцев. Со ас вакытаз Гоша гондыреныз быдэс дуннеез паймытъяз. Аспал адямизэс данъяса, сьӧлтаос шудонъёслы гондырлэсь пуссэ кутӥзы.

Сьӧлтаос та интыез яратӥзы

— Вотэс бамъёсын юалляськон ортчытӥм, кыӵе пу скульптураез черкогуртын адӟемды потэ, тросэз дурбасьтӥзы «Селты» гожтэмен синпелетлы, — вераз кибашлыослэн юртэнызы кивалтӥсь Светлана Никулай.
Усточиос капка котыре туяос мерттӥзы, ӟусъёс пуктылӥзы. Азьланяз татын луоз, пе, шутэтскон парк.
Выль омырен шокчиз Сьӧлта тымет но, татын триатлонъя вожвылъяськон ортчоз. Азьвыл ярдуръёсаз одӥг-ог чорыгасьёс гинэ пукылӥзы. Табере пыласькисьёслэсь, шутэтскисьёслэсь маза уз луы ни, дыр. Ӵыпетлэсь пыдэссэ чылкытато, ярдуръёссэ паськытато, луо вӧлдо, асфальт сюресъёс тупато. Татын синпелет но пуктэмын ни — велосипед вылын корт адями. Сое кылем-мылемъёслэсь лэсьтэм но ёрослы кузьмам черкогуртысь кибашлы.
Калык шумпотэ черкогуртлэн воштӥськемезлы, угось ульчаос выль буёлъёсын, вож турынэн, сяськаосын шулдырско.

Чеберске тымет дур но

— Тодмо дрессировщиклэн дорез луиськомы бере, сиё-дано усьтон ужрадлэсь оглюкетсэ цирклы сӥзьыны малпамы, — азинтэ Алла Неустроева. — Ӧтимы Ижкарысь циркез, озьы отысь 50 пала артистъёс куноосты шулдыртозы. Ӟеч мылкыд кузьмалоз Гоша гондыр, со велосипедэн ворттылоз.
Нялтас вераса, черкогурт урамъёс но тырмизы… велосипедъёсын. Куинь питранэн бадӟым но пичи великъёс вылын кудыосын сяськаос пушйизы. Асьсэлэсь корт эшъёссэс черкогуртсылы кузьмазы сьӧлтаос. Озьы 50-лэсь трос великъёс ульчаосы потӥзы. Калыклэн яратоно интыез луиз ни «Селты» гожтэмен аспӧртэмлыко пу капка. Сое лэсьтӥзы ёросысь Кибашлыослэн юртысьтызы усточиос.

Котькытын велосипедъёс

Купеч лавка но лайкаос

Сьӧлталан мӧзмыны нокинлы маза уз луы: котькудӥз аслыз тунсыкозэ, кельшымонзэ шедьтоз.
Спортъя вожвылъяськонъёс вискын шутэтскыны луоз ёрос библиотекаын. Отын «Купеческая лавка» сэрег ужалоз. Сьӧлта ёросын 19-тӥ дауръёсы Булычёв узыр купечъёс улӥзы. Библиотекаын соослэн улэм-вылэменызы, со вакытысь узыръёслэн котыренызы тодматскыны луоз.

— Ми дасяськиськом куноосты преникен пумитаны, таӵе ческыт сиён ас вакытаз пыжо вылэм Булычёв купечъёс, — вераз ёрос библиотекалэн кивалтӥсез Татьяна Базилевских.
Озьы ик библиотекаын лэсьтэмын луоз ёросысь спортъя мастеръёсын тодматӥсь стенд. Сьӧлта музъем 20-лэсь ятыр нимо-дано спортсменъёсты будэтӥз.
Черкогуртэтӥ кошке Сибире нуись сюрес. Библиотекаын ужасьёс та сюрес сярысь тодэ вайытӥсь юбо дорын адӟытон усьтозы, черкогуртэн историеныз, тунсыко интыосыныз тодматозы.
Мылкыд карисьёс вуылыны быгатозы Кӧпка черкогуртысь лайка пуныосты вордонъя питомникен. Экскурсия радъямын луоз И. Кудрявцевлы усьтэм музее — Валамаз черкогуртэ но.
Гурт шудонъёс азьын югыт тылъёсын воректӥз лулчеберетъя юрт но. Отын ӝытъёсы кырын кино возьматонъёс радъяськозы. Сьӧлтаос аспал адямиоссы сярысь видеоос дасязы. Вань калыкез задор крезьгурен шулдыртозы «Эктоника» группа но Ижысь диджейёс. Шудонъёслы выль шӧм пыртоз «Краски холи» ужрад но.
Табере витём гурт шудонъёслэсь усьтӥськемзэс, котькуд нуналэз лыдъяса. Оскомы, со яркыт вормонъёсын, спортысь выль нимъёсын воректоз шуыса.

Ангелина Снигирёва

Ангелина Снигирева
By Ангелина Снигирева Июнь 26, 2019 17:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<