Куное — быдӟым кылбурчи доры

Ангелина Снигирева
By Ангелина Снигирева 18 июня, 2019 16:46

Быдэс дуннелы тодмо Александр Пушкин кылбурчи вордӥськем дырысен 220 ар тырмиз. Солы сӥзем ужрадъёсы, «Болдино» музей-заповеднике, вуылӥз Удмуртиысь калык писатель Вячеслав Ар-Серги.

Ар-Серги но Россиысь писательёслэн союззылэн кивалтӥсез Н. Иванов

Вячеслав Ар-Серги пусйиз, Александр Пушкинлэн юбилеяз ӧтемзылы со туж шумпотӥз. Зэм, быдӟым кылбурчилэн Нижний Новгород областьысь Большое Болдино черкогуртысь именияз солэн кӧня ке пол ветлэмез вал ини, но та интыосы вуыса, мылкыд котьку но выль сямен лопыръяны кутске, пе. Болдиное Вячеслав Витальевич аслаз эшеныз, Дэри ёросысь Якшур муниципал кылдытэтлэн йырыныз Николай Мерзляковен, ӵош потӥзы. Ог 800 километрез машинаен ортчыса, жадемзэс ӧз но шӧдэ кадь.

— Милемыз туж шуныт пумитазы, — пусъе Вячеслав Витальевич, — Юбилей ужрадъёслэн нырысетӥ нуналазы, Александр Пушкинэз буре вайыса, панихида вал. Со радъяськиз А. Пушкинлэн песятаезлэн пуктэм черказ. Со черк освятить каремын вылэм ӵапак поэт вордӥськон аре, 1799-тӥын. Собере А. Пушкинлы сӥзем ужрадэз сӥё-дано усьтӥзы Москваысь куноос, Писательёслэн огазеяськонзылэн кивалтӥсез Николай Иванов.
А. Пушкинлэсь юбилейзэ пусъёнэ Москваысь, Нижний Новгород областьысь, Ярославльысь, Владимирысь, Чувашиысь но мукет интыосысь 30 пала тодмо писательёс но поэтъёс пыриськизы. Сцена вылын быдӟым поэтлэсь кылбуръёссэ лыдӟизы тодмо поэтъёс, писательёс, артистъёс но крезьгурчиос. Вячеслав Ар-Серги но удмурт кылэ берыктэм «Я памятник себе воздвиг…» кылбурез но аслэсьтыз чуръёссэ лыдӟиз. Нош Николай Мерзляков, гитараен шудыса, кырӟанзэ быдэстӥз.

— Болдиноын туж шӧдӥськод, кыӵе вал улон-вылон, омыр 2 даур талэсь азьвыл. Вань юртъёс, борддоръёс, инкуазь сыӵе ик кылемын. Пушкинъёслэн татын 5 сюрс вылын музъемзы вылэм, 2 сюрс пала крепостнойёсты возиллям. Тунсыко, татысь музей-юртъёстӥ ветлыса, поэт вакытысь улонэн, историен тодматскыны. Эшшо ик татын артистъёс со вакытъёсы улэм адямиос кадь дӥсяськемын, ма, ачиз А. Пушкин но улэп кадь адямиос пӧлтӥ ветлэ, сое но артист шудэ, — шуэ Ар-Серги.
Вячеслав Витальевич пусйиз на, А. Пушкинлы сӥзем праздник Россиысь поэзилэн адӟытонэз кадь луэ. Со туж капчи мылкыдо, эркын ортче.

Елена Миннигараева

Ангелина Снигирева
By Ангелина Снигирева 18 июня, 2019 16:46