Кузьма Андреевлэн школаез

Ангелина Снигирева
By Ангелина Снигирева Июнь 11, 2019 14:36

Кемалась ик ӧвӧл ми, «Кизили» журналын ужасьёс, вуылӥм Марий Элысь Мари-Турек ёросысь Карлыганэ.

Марий Эл палъёсысь удмурт эктон
Фото: У. Бадретдинов

Ӵапак отчы 136 ар талэсь азьло, 1873-тӥ арын, удмурт пиналъёс понна нимысьтыз школа кылдытӥз удмурт азьветлӥсь, миссионер Кузьма Андреев. Солэн таӵе мылкыдыз ӝутскиз Казаньысь профессорен, дышетӥсьёсты дасянъя инородческой семинарилэн директореныз Николай Ильминскийен пумиськемез бере. Нырысь ик школалэн нимысьтыз юртэз но ӧй вал, пиналъёсты дышетӥзы огшоры улон коркан. Бӧрысьгес ини школалы нимысьтыз юрт пуктӥзы.
Карлыганысь школае тодон-валан люканы Вятка, Казань, Уфа, Пермь, Саратов губерниосысь удмурт пиналъёс ветлӥзы. Палэнысь лыктэмъёс огъяулонниын улӥзы. Та школаез йылпумъямъёс тросэз дышетӥсь луизы. Выпускникъёс пӧлысь тужгес но даноосыз: Акилина Векшина (нырысетӥ удмурт нылкышно кылбурчи Ашальчи Оки), солэн агаез Иван Векшин (Айво Иви, кылбурчи), Максим Прокопьев (дышетӥсь, кылбурчи, удмурт автономия кылдытӥсьёс пӧлысь одӥгез), Иван Михеев (удмурт нылпиослы нырысетӥ учебникъёс дасясь), Иван Ильин (кылбурчи), Яков Ильин (гожъяськись, тодосчи) но мукетъёсыз.
Озьы тупаз: Карлыганэ потон нуналамы куазь дугдылытэк сямен зориз. Татарстанысь Кукмор карез ортчеммы бере навигатормес ужатыны кутским — сюресэз ум тодӥське угось. Но навигатормы нюко-гопо сюресэз возьматӥз. Отчы пырыса ни, валатскимы: татӥ ветлӥсьёс ӧвӧл. Озьы ке но сюресмес ӧм уретэ ни. Карлыганэ вуэммы бере гуртоос паймизы: кызьы вуж сюрестӥ лыктыны быгатӥды, пе. Вашкала вакытэ пӧртэм сэрегъёсысь Карлыган школае ветлӥсь удмурт пиналъёслэсь сюрессэс милемлы одно ик адӟыны кулэ вал, иське. Со вакытэ машинаос ӧй вал на. Пыдын но валэн ветлӥзы, вылды. Тодон-валан басьтыны мылкыдзы туж бадӟым вылэм! Солы али но паймоно.
Карлыганысь «Ӟардон» калык ансамбль — Марий Элын улӥсь удмуртъёслэн ымнырзы, шуыны луоз. Сотэк та элькунын одӥг бадӟым ужрад но уг ортчы. Дано ансамбль милемыз но школаын кырӟаса-эктыса пумитаз. Та коллектив элькунамы но трос пол вал ни, «Чакара» фестивале но пыриськытэк уг кыльы. Ансамблен ог 30 ар ӵоже кивалтэ Марий Элысь культура удысысь дано ужась, Ашальчи Оки премилэн лауреатэз Мария Главатских.
Карлыган черкогурт милемлы ёрос центр выллем потӥз. Отын трос квартираен 2 этажо юртъёс вань. Тротуаръёс асфальтэн шобыртэмын. Урамъёссы чылкытэсь, вож-вож ожо будэ.
Татын Октябрь революцилэсь азьвыл ик вӧй шукконзы, парен ужась но тӧл вукооссы вылӥллям. 1923-тӥ арын гуртын 28 корка лыдъяськем, 202 улӥсьёсыз вылӥллям — ваньзы удмуртъёс. Али та черкогуртын удмуртъёсын ӵош тупаса, ог-огзэс валаса, поръёс но, ӟучъёс но, бигеръёс но уло. Гуртазы нылпиослы спортшкола но усьтэмын, Мари-Турекысь крезьгур школалэн филиалэз но ужа. Калык инструментъёсъя оркестрзылэсь шудэмзэ ми но учкимы-кылзӥмы. Синмаськымон!
Ватыны кулэ ӧвӧл созэ: мукет интыосын сямен ик, Карлыган палась удмурт пиналъёс но ӟучомо. Анай кылзэс арняяз одӥг урок гинэ дышето. Озьы ке но тапалан удмурт сямъёсты уг вунэто на. Асьсэлэн дӥськутсы но возиське.
1891-тӥ, 1894-тӥ аръёсы татчы тодмо фин тодосчи Юрьё Вихман ветлэм. Кузпалызлы со тазьы гожтэм: «Сямъёссыя Карлыганысь удмуртъёс финъёслы кельшо. Трос вераськыны уг ярато, тыршисесь, Инмарлы оско. Ӝӧк вылазы котьку нянь но пурт кыллё. Семьяысьтызы котькудӥз, озьы ик куно мурт но, котькыӵе вакытэ нянез шорыса сиыны быгатэ».
Карлыганъёслэн куноосты капчи мылкыдын пумитан, сюдон-сектан сямзы али но умой утиське. Соос доры вуыса, астэ матысь ӵыжы-выжыосыд пӧлын кадь шӧдыны кутскиськод.
Кузьма Андреев удмурт, ӟуч, мари, бигер кылъёсты тодэм. Та кылъёс туала Карлыганын нуналлы быдэ чузъясько. Татысь школа 1996-тӥ арысен дано дышетӥсьлэсь, югдытӥсьлэсь нимзэ нуллэ. Ачиз но со пиналъёс, дышетӥсьёс пӧлын улэ кадь.

Ульфат Бадретдинов

Ангелина Снигирева
By Ангелина Снигирева Июнь 11, 2019 14:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<