Кужым кузьмаз «Горд площадь»

Ангелина Снигирева
By Ангелина Снигирева Июнь 11, 2019 14:24

Москваын 5-тӥ ползэ радъяськиз «Горд площадь» книга фестиваль. Та ужрад дыръя Горд площадьын ортчиз «Удмуртия» издательстволы сӥзем бадӟым ужрад.

1-тӥ-6-тӥ июне Горд площадь тырмиз быдэс Россиысь но Белоруссиысь пӧртэм издательствоослэн поттэм книгаосынызы. Та ужрадэз арлы быдэ чидатэк возьмало лыдӟисьёс. Соос понна татын пумиськонъёс ортчыто писательёс, радъясько яркыт постановкаос, Россиысь валтӥсь музейёс тодмато асьсэ программаенызы, лыдӟо историлы сӥзем лекциос.
Туэ асьме книгапоттонимылы тырме 100 ар. «Удмуртия» издательствоын ужасьёс арлы быдэ паймыто Горд площаде вуэм калыкез. Удмуртъёс кыдёкысен адӟисько — соос калык дӥсен пӧрмытскемын, ӝӧк вылзы чебертэмын калык киужъёсын, нош уката учкымонэз — «Удмуртия» издательствоын берло аръёсы поттэм турлы книгаос. Кыӵеез но ӧвӧл пӧлазы: удмурт писательёс но поэтъёслэн сборникъёссы, нылпи книгаос, историлы но шаертодонлы сӥзем ужъёс. Лыдӟисьёс одно ик киязы кутозы Владимир Владыкинлэсь, Михаил Атамановлэсь, Евгений Шумиловлэсь ужъёссэс, Удмурт шаерен, республикаысьтымы тодмо интыосын тодматӥсь книгаосты. Нош туэ калыкез кыскиз выльдэм издание — «Мифы, легенды и сказки удмуртского народа» книга.
1-тӥ июне фестивальлэн Россиысь улосъёслы чалам шатёраз «Удмуртия» издательство ортчытӥз тузӥ презентация. Сое радъяны юрттӥзы Москваысь Удмурт землячество но Удмуртилэн Тӧроезлэн постпредствоез. Люкаськем калыкез шулдыртыны вуизы Кияса ёросысь Вуж Салья гуртысь «Тайвади» ансамбль но нылпиослэн «Усточи» коллективзы, Москваысь Удмурт землячестволэн ёзчиез Олеся Полатова.

Милям шатёрмы вӧзтӥ ортчыны тупаз Россиысь Правительстволэн Тӧроезлэн воштӥсез Татьяна Голикова. Ӵапак соку Киясаысь коллективъёсмы репетиция нерге каро на вал. Удмурт дэремен кышноосты но нылпиосты адӟыса, Татьяна Голикова соосын ӵош фотое пуксиз, ми солы «Мифы, легенды и сказки удмуртского народа» выль книгамес кузьмамы, — вера «Удмуртия» издательстволэн валтӥсь редакторез Георгий Грязев.
Удмуртилы презентация ортчытыны 20 минут висъязы. Вакчи дыр кусыпын удмуртъёсты адӟыны шатёре сомында калык люкаськиз — вырӟыны инты ӧй вал ни.
Издательстволэн кивалтӥсез Юрий Кузнецов мадиз Удмуртиын книга поттон удыслэн ортчем сюресэз сярысь. «Удмуртия» издательствоез ӟечкылазы Россиысь книга поттӥсьёслэн ассоциацизылэн президентэз Константин Чеченев, Россиысь Калыкъёслэн ассамблеязылэн тӧроез Светлана Смирнова — асьмелэн улосчимы.
Учкисьёслы уката кельшизы удмурт кылын кырӟась-верасьёс. Кияса ёросысь сальяос Москваысь ужрадъёсы ӵемысь вуыло. Кылем арын татчы «Бӧляк» ансамбльзы ветлӥз. Туэ но ӧтемзы бере кема ӧз малпаське.

«Усточи» нылпи коллективмес гинэ ӧтизы вал. Пиналъёсын гинэ сюрес вылэ потыны ӧй дӥсьты. Соин «Тайвадиез» но нуимы. Сюрес вылэ 14 кузя потӥмы: 8 бадӟымъёс но 6 пиналъёс. Москваысь сцена вылын ми 3 номер возьматӥмы. Нуназе кырӟам-эктэммы кельшиз, лэся. Милемыз эшшо ӝытазе но Мавзолей дорын концерт сётыны ӧтизы на. Кызьы пумит кариськод — лыктӥм бере, возьматоно ни. Собере Горд площадьын удмурт калык шудонъёсты возьматӥмы. Ваньмызлы тунсыко, милемын шудо. Быдэс нунал удмурт дӥсен ветлӥм бере, адямиос котырамы кариськылӥзы: фотое пуксё, «бурановские бабушки» шуо. Валэктыны вырим ик, воксё Брангуртысь ӧвӧл шуыса. Капчи мылкыд басьтыса, бертӥм та фестивальысь, — шуэ Вуж Сальялась коллективъёсын кивалтӥсь Антонида Наумова.
Олеся Полатова, Удмурт кун университетэз йылпумъяса, Москваын дышетсконзэ азинтэ но ужа. Удмуртиен герӟаськем ужрадъёсы нылмурт котьку но пыриськыны дась.

— Землячествоысь ӧтизы но — ыштӥськи. Малы ке шуоно со нуналэ мон мукет ужрадэ дасяськи вал. Москваын вань Выжы калыкъёслэн юртсы (Дом национальностей), отчы огаз шудонэ монэ командалы капитан каризы. Но удмурт сямен кырӟаны ӧтизы бере, ас интыям адями шедьтӥ. Озьы «Горд площадь» фестивале вуи. Вордскем палъёсысьтым — Татарстанысь Кукмор ёросысь удмуртъёслэсь «Юон сям» гурзэс быдэстӥ. Кырӟан азьын верай со сям сярысь. Учкисьёс, тросэз удмурт кылэз ке но уг валало, туж шуныт пумитазы. Таӵе ужрадъёс мыным бадӟым мылкыд сёто. Мегаполисын ужаса, сомында калык пӧлы ышыны, сылмыны луэ. Нош таӵе ужрадъёсын возьматыны быгатӥськомы удмурт калыкез: кыӵе милям чебер дӥсьмы, шулдыресь кырӟанъёсмы, узыр пуштросо книгаосмы. Шумпотӥсько, Удмурт шаерлы мон пичи ке ӟеч лэсьтыны быгатӥсько шуыса, — вераз Олеся Полатова.
«Горд площадь» фестивальлэн нырысетӥ нуналысеныз ик «Удмуртия» издательство ял карон дырез ӧз тодылы. Книгапоттонилэн площадкаез Москваысь вань удмуртъёслэн люкаськон-пумиськон интызылы пӧрмиз. Татчы вуизы дано удмурт профессор Глафира Никольская, Удмурт постпредстволэн азьвыл кивалтӥсез Владимир Лебедев, Удмурт шаерын будэм кырӟасьёс, гожъясьёс, ужбергатӥсьёс.
«Горд площадьысь» «Удмуртия» издательство бертэ бадӟым вормонъёсын — 3 диплом, 1 таукарон басьтыса. Тани «Музей-заповедник «Лудорвай» издание «2018-тӥ арын Россиысь устоез книга» конкурслэн лауреатэз луиз, Таукаронэн со понна пусйиз Нациосын ужанъя федерал агентство. Тужгес «зориз» «Удмурты: тайна тамги» книгалы. Со 3 дипломен пусъемын: дунъямын огъя книга но, сое кылдытӥсь Георгий Грязев но, дизайнзэ быдэстӥсь Валентин Семёнов но.

Елена Скворцова

Ангелина Снигирева
By Ангелина Снигирева Июнь 11, 2019 14:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<