Куасъёстэс улон мӧзмыт

Ангелина Снигирева
By Ангелина Снигирева Июнь 13, 2019 09:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

13-тӥ июне юбилейзэ — 55 арес тырмонзэ — пусъе шаерысьтымы одӥгез яркытэз кизили, Олимпиадаослэн 2 пол чемпионказы, Россиысь куасэн бызьылонъя одӥгез валтӥсез спортсмен, СССР-ысь спортъя дано мастер, Ижевск городлэн но Удмуртилэн дано адямизы Тамара Тихонова.

Тамара Тихонова
Фото: Эдуард Карипов

— Тамара Ивановна, огвакытэ тӥледыз котькытысь кылыны но адӟыны луэ вал, нош берло дыре куасэн бызьылонъя ӵошатсконъёсты усьтонъёсысь гинэ на пумитано.

— Соиз зэм, шутэтскеме потӥз. 15 аресысен кутскыса ялан сюрес вылын, гостиницаосы кӧласа, сборъёсын улыса, жади, лэся. Ачим понна но улэме потыны кутскиз. Гужемзэ гуртэ бертылӥсько вал ке но, аслам бакчаям сяська, бакча емышъёс будэтэме потӥз. 40 ар пала арнялы быдэ шутэтскон нуналъёсты тодытэк, тужгес но толалтэ, кӧня кужым, тазалык быдтэмын. Ма, собере, муг но шедиз. Нырысь ик ачим бызьылӥ, собере тренер луыса ужай спортъя «Ижпланета» клубын, Ижысь 69 номеро школаын, Удмуртиысь нылъёслэн сборной командаенызы кивалтӥ. Шаерысьтымы мугорез кыдатон культурая, спортъя но егитъёсын ужан политикая министр Игорь Краснов туж куремъя, Удмуртиысь Куасэн бызьылонъя федерациен кивалтӥ. Пумитъяськыны ӧй дӥсьты вал, ачим ӝот-ӝот тодӥсько ке но, сямыя мон кивалтӥсь но, бизнесмен но ӧвӧл шуыса. Отӥяз шаерысьтымы кивалтӥсьёс воштӥськизы, мон сюресме егит спортсменлы Максим Вылегжанинлы сётоно кариськи.
Озьы тӥни шутэтскыны малпай. Сюлмам кема возем малпанъёсме быдэстыны тыршисько. Ижысь квартираме вузаса, город котыре нимаз корка басьтӥ. Табере вань сюлмысьтым музъемын бугыръяськисько, сяськаос мерттӥсько, емыш будэтӥсько, юртъер котырме выльдыны вырисько.

— 50 арестэс пусйыкуды, Россиысь тодмо адямиос куасэн бызьылэм эшъёсты вуылӥзы, таяз учыре кыӵе сюлмаськонъёсын улӥськоды?

— Юбилей сярысь уг малпаськиськы на, мукет сюлмаськонъёс йырез поромыто. Май толэзь пумын гинэ анае улонысь кошкиз, 40 уйзэ, ар кисьтонзэ лэсьтоно. Нош мукет ласянь учконо ке, арлыд ватсаськемъя, лэся, вордскем нуналъёсты чик ортчытэме уг поты ни. 50 аресме паськыт пусйи, кемалы вунонтэм кылиз. Эшъёсы вуылӥзы, туэ но лыктомы шуыса жингыртӥзы ни вал. Кемалась ик ӧвӧл Россиысь Куасэн бызьылонъя федерацилэн кивалтӥсьлэсь Елена Вяльбелэсь 50 арессэ ортчытӥмы. Соку но эшъёсмы Удмуртие вуылэмзэс тодазы вайизы. Раиса Сметанина шуиз, юбилей, пе, одӥг — 50 арес, нош вань мукетъёсыз вордскем нуналъёс гинэ.
Озьы ке но алигес коркае вӧзы веранда пуктӥмы, ӟечкыланы лыктӥсьёс луизы ке, ваньмызлы инты но шедёз.

— Тросэз дано адямиос но кивалтӥсьёс Интернет вотэсын пуко, нош тӥ отын вань-а? Оло, кунгож сьӧрысь эшъёсыныды но кусып возиськоды?

— Куке-соку мон но «ВКонтакте» баме пусйиськи вал тодмоосы туж куремъя. Бен, адямиос, кытчы ветло, ма каро, ваньзэ соку ик Интернет вотэсэ пукто, мыным со чик но уг кельшы, кулэез но ӧвӧл. Дыры жаль потэ телефон я компьютер сьӧрын пукыны. Кунгож сьӧрысь эшъёсыным вазенгес кусып возиськом вал, нош али уг ни, со понна кунгож сьӧр кылэз ӟеч тодоно, нош мынам со ляб интые.

— Куасъёс вылэ султылӥськоды на-а?

— Одӥг вакытэ юн шустро бызьылыны кутски вал, куасъёсме но Г. Кулакова нимо базае кельтылӥ. Со вакытэ 5 пол, дыр, куас вылэ султылыны дыр шедьтӥ, бӧрысь аналски. Куас вылэ ичи султылӥсько ке но, соостэк улыны уг чидаськы. 50 аресме пусъён дыръям эше Светлана Нагейкина скандинав амалъя ветлыны бодыос кузьмаз вал. Бодыосын вамышъян тумошо потэ, оло, тазалыклы туж пайдалыко луэ ке но. Соин ик бодыосме кузьмай. Ма, висемъяськисько но. 4 ар талэсь азьло, пу пыртыкум, гылӟи но пыдесме шукки вал. Мазьёсын зырасько но, ортче кадь, тросгес ветлӥсько, секытгес ужасько ке, нош ик висьыны ӧдъя. Муг шедиз но — куасъёс вылэ ӧжытгес султылӥсько. Со понна куасэн бызьылонъя одӥг ӵошатсконъёсты но уг кельтӥськы. Ужрад усьтонъёсы ялан ветлӥсько. Спорт дӥсе вылам ке, егитъёс шорам вазьыло, дӥсьме воштӥсько ке — арлыдоос.

— Пичи дыръяды кин луэмды потэ вал, со малпанъёстэс быдэстыны кылдӥз-а?

— Еж дыръям мылкыды ялан вошъяськылӥз. Я мон милиционер, я дышетӥсь луисько вал, нош йырам котьку но одӥг малпанэн улӥ — кыӵе ке подвиг лэсьтоно. Киноосысь геройёс сямен. Куасэн бызьылыны кутскыса, Олимпийской чемпион луэме потӥз. Тау Инмарлы, тренеръёслы, ӟеч адямиосын пумиськи, вормонъёс басьтӥ. Можгаысь Сергей Плеханов яке Сарапулысь Виктор Новиков тренеръёс доры шедеме туж потэ вал, кудзэс бырйыны шугъяськылӥ. Кез ёросысь Александрово школаме йылпумъяй но, монэ ыстӥзы Якшур-Бӧдьяын ортчись сборъёсы. Отчы лыктэмын вал Можгаысь пиналъёс но. Сборъёс бере соос сьӧры Можгае кошки, озьы мон ветеринарной училищее отын ужась тренер Сергей Плеханов доры шеди.
Со ӟеч тренер, атай интыын но вал. Котыр ласянь визь-кенеш сётӥз, улыны дышетӥз, бадӟым спортсменозь будэтӥз. Нош ветеринарлы дышетски шуыса, сокем ушъяськыны уг быгатӥськы, угось мон парта сьӧрын пукемлэсь тросгес сборъёсы потай. Вылаз ик, тодӥсько вал, мон ветеринар уг луы, шуыса. Соин ик государственной экзаменме сётыны но ӧй ветлы, отӥяз мон Удмурт кун университетысь спортфакез йылпумъяй. Тренерын ужатозям, Россилэн 3 чемпионъёсыз вордскизы: куасэн бызьылонъя Лилия Васильева но Ольга Сергеева, биатлонъя Светлана Бочкарёва. Жаль, тросэз спортсменъёс али мукет улосъёс понна бызьыло. Ма ватонэз, шаерысьтымы юниоръёс алигес Татарстанэ выжизы. Туала егитъёс ужаны кутскемзылэсь азьло ик уждун юало, нош Удмуртиын та ласянь туж секыт югдур, куасэн бызьылӥсьёс понна тыро-пыдо инвентарьмы ӧвӧл. Ярано коть, ас вакытаз спортъя базаос лэсьтыса вуттӥзы. Сборъёс ортчытыны со туж юрттэ.

— Туала егитъёс пӧлын Кулаковаос, Тихоноваос вань на меда?

— Шуг вераны. Удмуртиын гинэ таӵе югдур ӧвӧл, быдэс Россиын одӥг выллем. Мон ас вакытаз, оло, туж кужмо но ӧй вал, но юн тазалыкелы, чурыт сямылы луыса Олимп гурезёзь тубыны быгатӥ. Ми вакытэ пиналъёс ульчаын будӥзы, анай-атайёслы юрттӥськыса, ву но пу пыртамы, юрт котырын ужамы, нош ваньмон дыръямы эшъёсынымы ӵош гурезьёсысь нискыламы, нош туала егитъёсты валтэ телефон. Тренировкаос куспын но телефонъёсазы бугыръясько. Яркыт пиштӥсь кизилиос, оло, луозы, но соосты пыдлось пичи гуртъёсысь утчано.

— Ялан пиналъёс пӧлын, уг поты вал-а соос пӧлысь одӥгзэ коть асьтэлы басьтэмды, будэтэмды?

— Уг ваты, ас вакытаз туж потэ вал пинал будэтэме. Нылпи басьтон сярысь но трос малпаськылӥ, но мужике кошкем бере аслым шуи: монтэк но огназы пинал будэтӥсь нылкышноос трос. Малпаськи на, басьтэм пиналлы оло тупало мон, оло уг.
Аслам анае, монэ вордыкуз, кулӥз, сюранае будэтӥз. Мыным со вордэм анае кадь потылӥз, нош арлыдзыя бадӟымгес сестраосы анайзэс кадь яратыны ӧз быгатэ ни. Сыӵе малпанъёс пичи дырысеным ик йырам пыдло пыӵазы. Ӵапак сое но малпаса, дыр, пинал басьтонлэсь возиськоно кариськи. Уг куректӥськы, мынам табере внучатой племянницаосы будо. Соослы но юрттӥськоно. Мӧзмыны маза ӧвӧл.

— Тӥ туж кужмо кышномурт, ваньзэ асьтэос быдэстӥськоды, нош лэсьтыны быгатымтэ ужды вань меда?

— Мужикед ке вӧзад ӧз луы, амалтэк котьма карыны дышод, вылаз ик, нимаз юртын улӥськод ке. Ярано коть, эшъёсы, ӵыжы-выжыосы уг вунэто, юрттӥськыны вуыло. Тани али но бакчаям дэмен ужаськомы: кин ке кыед ӝоктэ, кин ке газон лэсьтэ.
Юрт котырын берганы вырисько ке но, егитъёслэсь тренировкаоссэс учкыны ветлытэк уг чидаськы, куд-ог дыръя визь-кенеш сётыны вырисько. Озьы тӥни, куасэн бызьылон мылкыдме ялан зыгатэ. Сюлэм со борды бурмемын бере, куасъёс бордазы кыско.

Валентина Емельянова

Ангелина Снигирева
By Ангелина Снигирева Июнь 13, 2019 09:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<