«Кинотаврысь» сюжет

Ангелина Снигирева
By Ангелина Снигирева 26 июня, 2019 14:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

9-тӥ-16-тӥ инвожое Сочиын 30 аръем юбилейзэ пусйиз «Кинотавр» кинофестиваль. Жюрилэн председателез таяз аре Константин Хабенский луиз. Фестивальлэн конкурсаз 15 бадӟым но 26 вакчи кино быръемын вал. Мыным ас синмыным соосты адӟыны удалтӥз.

М. Галеева «Кинотаврез» ас синмыныз адӟиз

75 пӧлысь 15

Журналистъёслэн но жюрилэн ужзы капчи ӧвӧл: нуналаз 3 полнометражной но 9 короткометражной картина учкем сяна, режиссёрен, съёмочной группаен пресс-конференцие но пыриськыса вуттоно, кинокритикъёслэсь малпанъёссэс но юано, пӧртэм ужрадъёсы но ветлоно. Соин ик фестивале ужаны лыктэм адямиослы ӵукнаысен ӝытозь шунды шорын назьылляськыны дыр ӧз сюры.

«Кинотавр» горд ковёрен вӧлдэм сюресэн кутскиз но, йылпумъяськиз но. Артистъёс, зэмос кизилиос сямен, чебер дэремъёсын, смокингъёсын ортчо, фотографъёслэн тылъёссы синъёсты мальдытыса ик быдто. Нош мукет нуналэ со кизилиос ик тон вӧзын огшоры пуко, кино учкемзыя я серекъяло, я малпаськонэ усё. Киноен герӟаськем элита огшоры учкисьлы пӧрме.

Фильм возьматон азьын съёмочной группа сцена вылысен кӧня ке кыл вера, учкисьлэсь выль кино пумысен мылкыдзэ возьмаса, шӧдскымон керӟегъяське.

«Кинотаврез» Валерий Тодоровский «Одесса» фильменыз усьтӥз (вераны кулэ, фестивалез усьтӥсь но ворсась киноос конкурсэ уг пырисько). Сценарийын 1970-тӥ ар сярысь гожтэмын. Сюжетэзъя Одессае гужем каникулъёс дыръя бадӟым еврей семья люкаське. Фильм холера дыръя семья кусыпъёсты возьматэ. Леонид Ярмольник бадӟым семьялэсь атайзэ шудэ, со ик картиналэн продюсерез луэ. Соин ӵош Евгений Цыганов, Ирина Розанова, Ксения Раппопорт но трос мукет тодмо актёръёс шудо.

Нош «Француз» фильмын 1950-тӥ аръёсысь Москва возьматэмын, сценарийзэ ачиз режиссёр Андрей Смирнов гожтӥз. Сюжетъя егит пияш Пьер, Франциысь вуыса, аслэсьтыз атайзэ утча. Атаез тӧдьы офицер луэмез понна 1930-тӥ аръёсы лагере пытсамын вал. Со куспын ик возьматӥсько со аръёсысь подпольной литература, СССР-е вуэм джаз но андеграундной богемной улон. Пьер балериналы синмаське, но ӵош луыны соослы уг кылды: балериналы кунгож сьӧры потаны уг яра, нош Пьер ноку Совето Союзэ уз вуы ни. Киноын шудо Антон Риваль, Евгения Образцова, Александр Балуев, Михаил Ефремов, Роман Мадянов, Нина Дробышева.

Ужрадын тодмо артистъёсты пумитаны луиз

Оглом «Кинотавре» 75 полнометражной кино ыстэмын вал: 50 фильм спонсоръёслэн юрттэменызы лэсьтӥськиз, 24-езлы Культурая министерство уксё висъяз, нош одӥгезлы Лулчеберетъя фонд юрттӥз. Соос пӧлысь 15-ез гинэ конкурсэ сюриз.

«Кинотаврлэсь» валтӥсь приззэ басьтӥз Борис Акоповлэн «Бык» фильмез.

«Давай разведёмся» (режиссёрез Анна Пармас) кинолэсь сценарийзэ тужгес но устоен лыдъязы.

Глеб Филатов «Бык» картина бордын ужамез понна тужгес но устоез оператор луиз.

Нылкышно ролез усто шудӥсь — Виктория Толстоганова «Выше неба» картинаын шудэмез понна.

Пиосмурт ролез усто шудӥсь — Александр Кузнецов «Большая поэзия» фильмын шудэмез понна.

Устоез режиссёр — «Большая поэзилэн» режиссёрез Павел Лунгин.

Ижысь режиссёр

Котькуд ӝыт кизилиос зарезь дурысь пляже люкаськылӥзы. Отчы сюрыны мыным берпуметӥ нуналэ гинэ удалтӥз. Отын туж паймымон учыр луиз: трос адямиос пӧлысь Ижкарысь Лидия Кондратюк режиссёрен тодматски. Конкурсной программае короткометражкаеныз сюрем!

«Бык» киноез лэсьтӥсьёс
Фото: М. Галеева

2015-тӥ арын Москваысь киноя школаын «Продюсер, киновед-кинокритик» курсъёсты йылпумъяса, Лидия режиссёрлы дышетсконзэ азьланьтэм. «Кальмар» короткометражкаез дипломной ужез вылэм. Сюжетъя героиня кышнояськем воргоронлы синмаськемын. Огпол соос, поездэн кошкыса, кӧня ке нуналзэ ӵош ортчытыны малпазы. Со нуналъёслы дасяськыса, героиня пӧртэм учыръёсы сюрыны вуэ: метроын соин егит пияш тодматске, соос ӝытсэ кафеын вераськыса ортчыто, нош огназ дораз бертыны потэ но, пеймыт интыын кыӵе ке лушкаськись сумказэ таланы выремъяз сое жуге. Мукет нуналаз нылаш лыз-вож ымнырын сайка, тональной кремен бамзэ зыра но вала: таре аслэсьтыз улонзэ ачиз радъялоз, нокыӵе кышнояськем воргорон солы кулэ ӧвӧл ни.

Азьланяз та короткометражкаеныз Лидия Кондратюк пӧртэм фестивальёсы ветлыны малпа, нош собере ини выль кино борды басьтӥськоз.

Вормонъёс люкылон

«Кинотавр-2019» йылпумъяськиз, нош лӧптэм мылкыд али но сюлмам йыгаське. Вӧзад Анна Чиповская, Ирина Горбачёва, Светлана Ходченкова, Катерина Шпица, Александра Бортич, Александр Петров, Александр Кузнецов кадь артистъёс пуко ке, пресс-конференциын дано режиссёръёс асьсэ улонзы сярысь верало ке, продюсеръёс авторской кинолы уксёен юртто шуыса валаськод ке, бурдъяськиськод. Валаськод, асьмелы но та удысэз азьланьтыны кулэ.

Мария Галеева

Туспуктэмъёсыз М. Галеевалэн

Ангелина Снигирева
By Ангелина Снигирева 26 июня, 2019 14:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<