Дауръёслы улэпесь

Ангелина Снигирева
By Ангелина Снигирева 24 июня, 2019 16:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

К. Герд нимо Национальной музейын ортчиз Н. Кузнецовлэн «Дауръёслы улэпесь удмуртъёс» книгаеныз тодматскон. Отчы пыриськизы шаермылэн историеныз, удмуртлыкен тунсыкъяськисьёс, журналистъёс.

Книгаен тодматскон

«Дауръёслы улэпесь удмуртъёс» книгаез дасян бордын тыршиз Россиысь Писательёслэн огазеяськонзылэн ёзчиез, историк Николай Кузнецов. Уно дасо аръёс ӵоже солы кыӵе гинэ архивъёсын бугыръяськоно ӧз луы Быдӟым оже пыриськем удмуртъёслэсь нимъёссэс, наградаоссэс тодон-шараян понна. Нош эшшо но секытгес вал соослэсь туспуктэмъёссэс шедьтыны. Озьы кемалась мытэм ужез быдэсмиз — люкам материалъёсыз 696 бамъем книгаен, удмурт кылын потӥзы. Отчы пыремын 1 сюрс 300 удмурт пиослэн нимъёссы. Шумпотымон: соос пӧлысь 1 сюрс 150 ожгарчиослэсь туспуктэмъёссэс шедьтыны быгатӥмы, та ласянь юрттӥзы пӧртэм гуртъёсын улӥсьёс, мыло-кыдо адямиос, пусйиз Николай Кузнецов. Нош нимаз книгаен поттыны юрттӥзы «Удмурт Кенеш» огазеяськонлэн тӧроез, Кун Кенешысь депутат Татьяна Ишматова, озьы ик «Аксион» заводлэн но «Аксион» корпорацилэн кивалтӥсьёссы Геннадий Кудрявцев но Сергей Сидоров но мукетъёсыз.

— «Дауръёслы улэпесь удмуртъёс» книгаез поттыны чакламын 500 экземплярен, — вераз Татьяна Ишматова. — Валамон: со туж ӧжыт. Малпасько, котькуд семьялэн басьтэмез потысал, дыр, та бичетэз — Быдӟым оже пыриськемъёслы сӥзем зэмос энциклопедия ук со! Отысь котькуд адями шедьтыны быгатоз аслэсьтыз ӵыжы-выжыоссэ. Азьланяз луонлык утчаломы та бичетэз эшшо но тросгес поттыны. Книга вӧлмытэмын луоз ёросъёсысь библиотекаосы, отын ортчозы бичетэн тодматскон ужрадъёс. Пусйымон таиз но: Россиысь фин-угор выжыысь мукет калыкъёслэн таӵе бичетсы ӧвӧл на. Та ласянь асьмеос азьпал радын! — шуиз Татьяна Витальевна.

— Чаклалэ ай: полке пыре 1 сюрс адями, нош книгае шедемын солэсь но ятыр, — веранзэ азинтэ книгалэн авторез Н. Кузнецов. — Озьыен, та бичет — удмурт калыклэн вунонтэм полкез. Утчаськон-эскерон ужме аналтыны уг малпаськы: басьтӥськи ни Быдӟым ожын вылӥ наградаен пусъем удмурт пиослэсь анайёссэс тодон-шараян борды. Соос зэмос батыръёсты будэтӥзы ук, соосты но данъяме потэ.

Елена Никитина

Ангелина Снигирева
By Ангелина Снигирева 24 июня, 2019 16:07