Вордӥськем шаермы, туж мусо потӥськод…

Ангелина Снигирева
By Ангелина Снигирева Июнь 21, 2019 10:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вуоно арын Удмуртилэн кунлык басьтэмез дырысен 100 ар тырмоз. Но элькунмылы сӥзем ужрадъёс, пумиськонъёс али ик мыно ни. Та ласянь туж тунсыко луэ «Мынам Удмуртие» телерадиокомпанилэн «День республики/Мынам шаере» проектэз.

«День республики/Мынам шаере» проектэз лэсьто С. Белых но С. Пикулева
Фото: М. Егоров

Та проект улонэ пыӵаны кутскиз ни ортчем арын сӥзьыл. Кызьы со радъяське? Телерадиокомпаниысь журналистъёс быдэс десантэн пото Удмуртилэн огаз ёросаз. Нунал ӵоже съёмкаос лэсьтэ кык группа, шедьтыны тырше, мар вань ёросын тужгес тунсыкоез, адӟем карымонэз. Нош ӝыт ёросын улӥсьёс бадӟым концерт радъяло, со озьы ик видеое гожтӥське, тужгес устоосыз номеръёс собере телевизор пыр возьматӥсько.

—тТа пректэз улонэ пыӵатон азьын юалляськон ортчытӥм: макем калыкмы ӟеч тодэ вордӥськем интызэс, Удмурт шаерзэс. Туж паймим, республикамылы сӥзем юанъёслы шонер валэктонъёс сётӥзы 6 процентэз гинэ, — пусйиз «Мынам Удмуртие» ТРК-лэн валтӥсь редакторез Влада Одинцова. — Ми валам, Удмурт Элькунмылы сӥзем проект туж но туж кулэ. Аслэсьтыз вордӥськем шаерзэ тодӥсь адями гинэ сое дунъялоз но гажалоз.

Туннэ нуналлы та проектъя журналистъёс шаерысьтымы 10 ёросэ но 2 каре (Можга, Сарапул) вуылӥзы ни. Пӧртэм телепередачаос, сюжетъёс пыр возьматӥзы та ёросъёсысь улонэз, калыкез, тунсыко интыосты, сям-йылолъёсты. Учкисьёс тужгес яратӥзы проектъя мынӥсь «День республики/Мынам шаере» телепередачаез. Толэзьлы быдэ сое дасяло но нуо «Мынам Удмуртие» ТРК-ысь журналистъёс Светлана Белых но Светлана Пикулева. Кыӵе мылкыдын ужало соос та проект бордын?

Светлана Белых:

— Удмурт сям-йылолъёс, ёросъёслэн, гуртъёслэн историзы, аспӧртэмлыксы сярысь удмуртъёс гинэ ӧвӧл, мукет выжы калыкъёс но тодыны кулэ. Соин ик та передача ӟуч кылын мынэ. Сое дасян азьын ёрос администрациен кенешиськом, соос ӵекто, кинэн тунсыкогес пумиськыны луоз, маин ёроссы адӟем карымон, синмаськымон луэ. Калыкез тодӥськом бере, асьме дэмланъёсмес но сётӥськом. Та передачаос пыр туж потэ котькуд ёрослэсь аспӧртэмлыксэ возьматэм. Тани, шуом, алигес лэсьтӥмы Юкаменск сярысь передача. Интыысь администрация дэмланъёссэ сётӥз. Но ми малпам: нош кызьы Юкаменск ёросэз бесерманъёстэк возьматод? Озьы передачаямы ӧтимы «Лампачей» бесерман ансамблез но.

Мыным туж тунсыко та передача бордын ужаны. Ёросэ потыса, тон быдэсак выйиськод отысь калыклэн улоназ, шӧдӥськод, маин уло-шокало адямиос, соослэсь сюлмаськонъёссэс, малпанъёссэс пушкад пыӵатӥськод, кужым сётӥсь интыосынызы тодматскиськод. Мынам тани Юкаменск ёросэ ноку вуылэме ӧй вал, нош табере со аслам кадь потэ ни, отын туж мусо калык улэ.

Мон котьку но синмаськисько гуртысь адямиослы. Соос олокытчы но вутско: пудо но вордо, кырӟало-верало но, киужен но выро. Нош та передача бордын ужаса, вордӥськем шаерме выль сямен усьтӥсько кадь. Передачаез учкись адямиос понна гинэ ӧвӧл, аслым но. Туж ӵемысь, командировкаысь бертыкум, тодам лыкто Ашальчи Окилэн чуръёсыз:

«Вордӥськем музъеммы,

Вордӥськем шаермы,

Туж мусо потӥськод,

Туж шулдыр адскиськод…»

Светлана Пикулева:

— «День республики/Мынам шаере» нырысетӥ телепередачамы Сарапул ёрослы сӥземын вал. Отчы мон кышкасагес потӥ, татчыозь удмуртъёсынгес ужалляй ук, нош татын ӟуч ёрос. Но Сарапул ёросысь пӧртэм гуртъёсы вуылыса, пайми: отын сыӵе ӟеч сюлэмо калык улэ вылэм! Кӧня ке нунал ӵоже со шунтӥсь мылкыдын улӥ.

Куддыръя озьы но луэ: ёрослэсь тужгес адӟем карымонзэ шедьтӥськом, передачаез дасяськом, нош кӧня ке улыса, жаляськод: вот, тае но возьматоно на вал, созэ но. Но 1 нуналлы гинэ потӥськом бере, ваньмаз вутскыны уг луы. Собере, одӥг передачае ваньзэ тэрытод шат?

Огпол бертӥськом Грак ёросысь. Мынам мылкыды бурдъяськемын, кинэн но ӧм пумиськылэ: вал вордӥсь воргоронэн, М. Атаманов тодосчилэн вордӥськем гуртаз пуктэм черке лыктэмъёсын, туж тунсыко кряшен семьяен но трос мукет. Шуисько, ох, кӧня тунсыко сюжетъёс лэсьто ни! Нош Юрий Егоров оператормылэн мылкыдыз ӧвӧл, шуэ: сюлмы, пе, ӝыныё кылиз, суредъёс ӧжыт. Дырмы тросгес ке луысал, эшшо но турлы-турлы съёмкаос лэсьтыны луысал… Тӥни озьы быдэс командаен ужаськом, ваньмы сюлмаськиськом ӟеч передача лэсьтон сярысь. Шаерамы улӥсьёс асьсэ вордӥськем музъемзы шоры паймыса мед учкозы: макем чебересь асьмелэн интыосмы, макем визьмо но быгатӥсь калыкмы.

Малпасько, таӵе программа асьсэлы ёросъёслы но туж кулэ. Озьы ёрос калык огазеяське, асдунзэ валаны кутске.

Туж вылӥ кылъёс, шуоды, но та передача бордын ужаса, мон юнгес гажаны но яратыны кутски вордӥськем Удмурт шаерме.

УД

Ангелина Снигирева
By Ангелина Снигирева Июнь 21, 2019 10:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<