Векчи книга — бадӟым пуштрос

Ангелина Снигирева
By Ангелина Снигирева Июнь 26, 2019 16:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Зин (фанзин) — пичи тиражъем журнал. Та кыл, англи magazine (журнал) кылэз вакчиятыса, пӧрмытэмын.

Е. Касимовалэн «Спутник» зинэз

Лэсьты ачид

Зинлэсь бамъёссэ принтер пыр печатлало, бӧрысь соосты вурӟо. Кӧня ке экземпляр лэсьтон понна кӧчыр (ксерокс) кулэ. Кин ке комиксъёссэ озьы потталля, мукетъёсыз искусстволы, техникалы, культуралы сӥзем зинъёс лэсьяло, кылбуръёсын, туспуктэмъёсын, суредъёсын зинъёс кылдытъяло. Зинын нокыӵе кабъёс ӧвӧл — ваньмыз лэсьтӥсьлэн мылкыдыз но быгатэмез бордысь потэ.

Кытысь зинъёс потӥзы? 20-тӥ даурлэн кутсконаз дадаистъёс, сюрреалистъёс но мукет ӧръёсысь художникъёс но гожъяськисьёс пичи тиражъем векчи книгаос лэсьяллязы. Зинъёс вӧлмизы, куке Америкаын 1950-тӥ аръёсы DIY (do it yourself) — «лэсьты ачид» — тулкым кылдӥз. Адями троссэ ужез ачиз, нокинлы вазиськытэк, уксё тырытэк, лэсьтыны быгатэ, пе. 1980-тӥ аръёсы дунъяны кутскизы университетын тодон-валан басьтытэк, творчествозэс ас кужыменызы азинтӥсь музыкантъёсты но гожъяськисьёсты. Дышетскемъя, пе, адямилэн аслаз, солы гинэ тупась творческой мылкыдыз изъянме.

СССР-ын пичи тиражен печатлам произведениос цензураен йырин кылдӥзы. Писательёс «самиздат» пыр тодмооссы пӧлын гожъямъёссэс вӧлмытъязы. Куд-ог лыдӟисьёс журналъёслэн пӧртэм номеръёсазы люкетэн-люкетэн печатлам романъёсты книгаослы пӧрмытъязы, бамъёсты ишкыса но соосты огазе вурӟыса.

Али зинъёсты пӧртэм муген лэсьто. Кин ке табыш поттон сярысь гинэ сюлмаськись издательствоослы пумит луэмзэ возьматэ. Мукетыз творчествозэ бумага вылын кельтон понна сюлмаське. Асьсэлэсь зинъёссэс пӧртэм субкультураосысь адямиос поттало. Зинъёс пӧртэмесь, но соос кылдытӥсьсылы эрик сёто.

Мар та бам сьӧрын?

Ижкарын но зин лэсьтӥсьёс вань. Одӥгез соос пӧлысь — суредаськись но туспуктӥсь Елена Касимова. Алигес со Анастасия Шумиловалэн «Спутник» кылбуреныз зин поттӥз. Пичи книгаын котькуд бам бадӟым суредлэн пичи люкетэз кадь адӟиське. Кылбурез удмурт но ӟуч кылъёсын лыдӟыны луэ, озьы ик со Ижлэн алфавитэныз гожтыса сётэмын. Сое 1994-тӥ арын малпаз «Семинар ВТ» творческой огазеяськон. Алфавитэз лэсьтыкузы, художникъёс фоносемантикаез лыдэ басьтӥзы: котькуд куара, пе, аспӧртэм мылкыд кылдытэ.

Лена зинъёсын тодматске вотэсын, пӧртэм каръёсы но кунъёсы вуылыкуз, отысь магазинъёсысь фанзинъёсты учкыса потэ.

— Мон пичи дырысеным книгаосты но блокнотъёсты яратӥсько. Ас коже пичи книгаос лэсьтыны туж тунсыко, — вера Лена Касимова. — Та ужез нырысьсэ эскери, Москваысь туспуктэмъя но мультимедиая Родченко нимо школаын дышетскыкум. Собере мон блокнотъёс лэсьяй, соос «Гоголь-центрысь» книжной магазинын но вузаськизы.

Художниклы тунсыко, кызьы книгалэн но адямилэн кусыпсы азинске, адями книгаез исаку, бамъёссэ берыкъяку. Книгаын бамъёс котьку ас радызъя мыно, но адями сое пӧртэм сямен учкыны-лыдӟыны быгатэ.

— Бамез берыктыку, тон уд тодӥськы, мар азьланяз луоз. Оло паймод, оло мылкыдыд пуксёз. Книга лэсьтӥсьлы малпаськоно луэ: кызьы учкисьлэсь мылкыдзэ воштоно, кыӵе ке шӧдонэн сое тырмытоно, кыӵе амалъёсты со понна кутоно, — валэктэ Е. Касимова.

«Спутник» — Леналэн Ижын лэсьтэм нырысетӥ зинэз.

— «Спутник» кылбурез Ижын ортчем кылбур ӝытын кылӥ, — веранзэ азьланьтэ Лена. — Соку ик йырам кыӵе ке суредъёс кылдӥзы. Ужамъя нырысь вордскем суредъёсты мукетъёсыз воштӥзы. Мыным туж яра: зинэз лэсьтыку, сюресэз ортчиськод кадь тодытэк, мар пумаз луоз. Малпанъёсы туж трос, ваньмыз Ижкарен, Удмуртиен, культураысь но туала югдурысь пӧртэм ужпумъёсын герӟаськемын. Потэ асьме палась кылбурчиослэн, суредаськисьёслэн, туспуктӥсьёслэн ужъёсынызы зинъёс лэсьтэм. Ваньмыз пӧрмиз ке, та фанзинъёс — шаерысьтымы культуралэн аспӧртэм чалепъёсыз — огазьын асьмелэн кармылэсь йӧспӧртэм туссэ возьматозы.

«Спутник» зинэз кие кутыса, авторлэсь куаразэ кылӥськод кадь — озьы книга пыр мукет адямиен кусып кылдэ. Заводъёсын лэсьтэм одӥг тусо арбериосын тырмытэм дуннеын та выллем зинъёс яркыт виштыос кадь адско. Соос буйгато но мукет адямиез валаны дышето — улон книгалэсь выльзэ бамзэ усьтӥськод кадь.

Виктория Крамова

Ангелина Снигирева
By Ангелина Снигирева Июнь 26, 2019 16:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<