Быдэс классэн колхозэз ӝуто

Ангелина Снигирева
By Ангелина Снигирева 3 июня, 2019 12:35

Гурт удыс мыло-кыдо, тыршись муртъёслы луыса гинэ азинске. Ӵапак сыӵе адямиос ужало Пичи Пурга ёросысь Шорын Юри гуртысь «Рассвет» хозяйствоын.

В. Алексеев механизатор но Ю. Гаврилов бригадир

Юрий Гаврилов «Рассветын» 10 арлэсь кема бригадирын тырше ни. Солэн син азяз вань уж ортче, кивалтэмез улсын уж ас пӧраз мынэ.

— Ми уж дурын бадӟым семья кадь, ог-огмылы ужен но, визь-кенешен но юрттӥськом, — вера Ю. Гаврилов. — Колхозын 80 пала адями тырше, палэнысь ужась ум утчаське — ваньмыз асьмелэн, Шорын Юри гуртысь. Пӧламы вань егитъёс но.

Тани Андрей Васильев но Алексей Давыдов егит воргоронъёс ӟеч кивоштӥсьёс луизы ни, котьма лэсьтыны быгато, ужлэсь уг кышкало, шуэ Ю. Гаврилов. Йӧл кыскон тӥрлыкез утялтон понна кыл кутэ Валерий Осипов егит мурт, солэн но киыз котьмалы мынэ.

Егитъёслы кема аръёс ӵоже ужам-тыршем эшъёссы пӧлын ужзэс радъяны капчигес.

Кылсярысь, 20 арлэсь кема хозяйствоын тырше ни Виталий Алексеев. МТЗ трактореныз со туэ ваньмызлэсь трос кизиз.

Кызьы нянь ӝӧк вылэ вуэ, туж ӟеч тодэ Анатолий Давыдов. Со механизатор луыса хозяйствоын 42 ар пала тырше ни. Т-150 трактореныз 15 ар пала бусыосты гыре-кизе ини ке но, корт эшез выль кадь адӟиське. Угось тракторзэ Анатолий Петрович ӝикыт, утялтыса возе.

Ю. Давыдов механизатор

Анатолий Петрович Шорын Юриын вордӥськиз, татын ик яраз. Воргорон пичи дырысеныз техникаез гажаса будэмын. Анай-атаез но колхозын ужазы, музъемез, ужез яратыны нылпиоссэс но дышетӥзы. Соин воргорон шудзэ палэнысь утчаса ӧз ветлы, гуртаз ик семья кылдытӥз, татын ик быдэс улонзэ тырше ни, музъемлэсь, ужлэсь кужым басьтэ.

— Школаын ӵош дышетскись эшъёсыным кенешимы вал, быдэс классэн гуртэ кылём, колхозэз ӝутом шуыса. Озьыгес ик луиз, ваньзы ӧз ке но, тросэз гурт удысэз азинто. Тани али колхозын 3 кузя пичи дырысен эшъёсыным ӵош — Семён Егоровен но Владимир Алексеевен — ужаськом, — вера А. Давыдов.

Гурт удысын уж уг бырылы. Али «Рассветын» кукуруза кизёнзэс йылпумъязы ни. Та бӧрсьы кӧня ке шокчыны вис луоз ик, верало гуртоос. Бусы ужъёсты йылпумъямзэс Гыронбыдтон праздникен шулдыр пумиталозы. Но арня ортчыса, выльысь возь вылэ потозы. Зелёнка дасяны дыр вуэ. Со бӧрсьы, ю-нянь октытозь, гидъёсты тупатъяны вуттоно на, пе.

Гуртын улӥсьёс понна гужем — тужгес кысык вакыт, куд-ог дыръя уен-нуналэн бусыысь пыратэк ужано луэ.

— Гужемез уд яратӥське, дыр? — юасько шорын юриослэсь.

Нош соос пумитам вазё:

— Гужемлэсь мӧзмоно, соку уж кылдэ ук, толалтэ нуналъёс огпӧртэм ортчо.

Ангелина Снигирёва

Туспуктэмъёсыз авторлэн

Ангелина Снигирева
By Ангелина Снигирева 3 июня, 2019 12:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<