Быгы, Шоруньжа, Мишкино…

Ангелина Снигирева
By Ангелина Снигирева Июнь 19, 2019 15:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Марий Элын ивортӥзы: фин-угор дуннелэн шоркарез 2020-тӥ арын выжоз Башкириысь Мишкино черкогуртэ. Нош туэ та нимез дано нуллэ пор музъем вылысь Шоруньжа. Мар со сётэ отын улӥсьёслы?

Куно пумитан

Кин 7-тӥез?

«Фин-угор калыкъёслэн культурая шоркарзы» программалы кутскон сётэмын 2014-тӥ арын. Солы кичӧлтӥсьёс луизы Фин-угор калыкъёслэн егитъёссылэн ассоциацизы (МАФУН) но «Центр развития коренных народов» огазеяськон. Та дыр куспын дано нимез нуллӥзы ни Удмуртиысь Быгы, Эстониысь Обиница гуртъёс, Венгриысь Искасентдьёрд гурт но Веспрем город, Карелиысь Вокнаволок гурт но Марий Элысь Шоруньжа. Кин таос борды итӥськоз — жюри берпуметӥ минутозяз ватыса возиз.
Шоркар луон понна туэ нюръяськизы Башкириысь поръёслэн Мишкино гуртсы но Эстониысь 2 гуртъёс: Виру-Нигула но Балтийской зарезьысь шормуӵе интыяськем Кихну. Асьсэлэсь проектъёссэс утьыны соос вуылӥзы Йошкар-Олаысь Адӟытонъёсъя национальной галереяе. Жюри туж кужмо вал — кивалтӥз соин МАФУН-лэн тӧроез Кяби Суви — Эстониысь ныл. Дунъет сётӥсьёс пӧлын вал Шаркан ёросысь Быгы культурая центрлэн кивалтӥсез Жанна Ермолаева но.

— Вормисез бырйыны капчи ӧй вал, — шуиз со. — Огкылысь мед луом шуыса, кӧня ке пол кутскыса, куарамес сётӥм. Зэмзэ но, проектъёс туж золэсь вал! Но кенешыса-кенешыса огъя малпанэ вуим: вормонэз сётоно соослы, кинъёслэн синъёссы ӝуало, мылкыдзы уртче.

Шумпотонзы дуртӥз уртчиз

Вормисьлэсь нимзэ жюри ӵуказе нуналаз гинэ шараяз. Ӟечкылан ужрад туж чебер интыын, туж чебер фестивальын — Шоруньжаысь «Суан пайремын» («Сюан шулдыръяськон») — ортчиз вал.
Тани гурт сьӧрысь сцена вылэ пото жюрилэн ёзчиосыз. Люкаськем калык шоканы уг дӥсьты кадь.

— Башкириысь Мишкино-о-о! — кеське Кяби Суви.
Мишкино ёросысь «Дружба» газетлэн валтӥсь редакторез Валерий Абукаев но Уфаысь егит азьветлӥсь Максим Тимершин соку ик сцена вылэ бызьыса пото — шумпотонзы дуртӥз уртче кадь. Ӵапак соос проектэз дасян бордын но ужазы.
Максим Тимершин Мишкино палъёсын вордскемын, Башкирилэн шоркараз улыны-ужаны кошкыса но, выжыоссэ уг вунэты, калыксэ азинтон сярысь сюлмаське. Вордскем палъёсыз сярысь фильм дасям, пӧртэм ужрадъёс ортчытъя.
Мишкино 1930-тӥ арысен ёрос центр луиз. Отын ог 5 сюрс улӥсез. Башкир музъем вылын улыса но, 75 процентэз — поръёс.

Удмуртиысь куноос

— Ми туж утиськом вашкала сямъёсмес, язычествоен герӟаськем йылолъёсты ум вунэтӥське, кылсярысь, бусы ужъёс йылпумъяськем бере вӧсяськонъёс ортчо, — шуэ Валерий Абукаев. — Шулдыръяськонъёс дыръя, ваче ки кутскыса, пор «Гозыен» эктонэз одно эктӥськом. Рекорд но пуктӥм ни — тапыртӥм, 1 иськем кузьда султыса.
Вуоно арын Мишкиноын уно ужрадъёс чакламын ни, соос эшшо юнгес огазеяны кулэ фин-угор калыкъёсты. Кылсярысь, ортчоз «Фольклорида-2020» калыккуспо фестиваль, калык эктонъёслы сӥзем фестиваль-конкурс но трос мукетыз.

— Мишкино ми понна туж дуно инты, — шуиз Марий Элысь культурая, печатья но национальной политикая инистр Константин Иванов. — Отын калык сям-йылолъёсты туж утё. Уртче ужрадъёс ӵемысь радъяськом. Соин ик ми туж шумпотӥськом: фин-угор дуннелэн шоркарез ми, поръёс, доры ик кылиз. Маин быгатом, Мишкинолы одно юрттӥськом.

Кензэс уз лушкалэ

Но 2019-тӥ пумозь «Фин-угор дуннелэн шоркарез» дано нимез нуллоз на Шоруньжа. Йошкар-Олалэсь со ог 150 иськеме, туж чебер нюко-вырйыло интые пуксемын.

— Гуртамы ог 300 корка, ог 1 сюрс пала улӥсез, — вера гурт администрациен кивалтӥсь Иван Евсеев. — Ог 98 процентэз — поръёс. Улӥсьёсмылэн лыдзы уг кулэсмы, куд-ог егитъёс Москвае, Казане, Сургутэ кошко ик ке но, доре кылисьёсыз но ӧжыт ӧвӧл.
Гуртоос шӧдӥллям: гуртсы фин-угор дуннелэн шоркарез луэм бере улон-вылонзы уката пӧзьыны кутскиз. Нырысь ик, сюрессы кылдӥз.

— Проектын но ӧй вал сюресмес тупатон, — азинтӥз веранзэ гурт администрациен кивалтӥсь. — Но республикалэн бюджетэз чотын 400 метрзэ кылем арын асфальтэн кисьтӥзы ни, туэ эшшо 700 метрзэ лэсьтӥзы на. Огъя дуныз солэн 7 миллион манет луиз. Милям интыысь бюджетмы 2 но ӝыны миллион манет гинэ. Ас кужыменымы сюресэз лэсьтыны нокызьы ӧй пӧрмытысалмы.
Гуртоос уката шумпото, фин-угор дуннеын табере уката трос эшъёссы луизы шуыса. Угось куноосы уг бырыло.

— Кылем арын оглом 400 туристъёс дорамы вуылӥзы вал, — вераз гуртысь музеен кивалтӥсь Людмила Аксюбина. — Нош туэ май ӵоже гинэ 350 луизы ни. Ми дорын ялан кыӵе ке ужрадъёс ортчо.
Та нуналэ но гурт пачылаз калыкен — быдэс делегациосын вуизы Марий Элысь вань ёросъёсысь поръёс. Со сяна, кунысьтымы 7 улосъёсысь, озьы ик Эстониысь, Финляндиысь. Данакез соос Шоруньжа ульча кузя усьтӥзы азбаръёссэс. Радэн султӥзы кибашлыос — вузасько, мастер-классъёс ортчыто.
Нош валтӥсь сцена вылын возьмато ни сюан ортчытон сям-йылолъёсты — ваньмыз 29 пумо!
Фестивале пыриськисьёс пӧлын — Удмуртиысь Кез ёросысь «Мертчан» ансамбль но

Ужазы азбаръёс

— Шоруньжае лыктыны мылкыдмес асьмеос нырысь ик верамы, куриськон гожтӥмы, — вераз коллективлэн кивалтӥсез Елена Максимова. — Фестивале вайимы уйпал удмуртъёслэсь сюанзэс возьматӥсь репертуармес — отчы кез палъёсысьтымы кырӟанъёс шедемын. Ансамблямы ми 16 кузя. Крезьгурлы нимысьтыз дышетскеммы огмылэн но ӧвӧл. Нырысьсэ люкаським 2000-тӥ арын. Со дырысен ӵемысь потаськом Удмуртилэн палэназ но.
Кызьы удмуртъёслэн, озьы мукет калыкъёслэн но сюан шудоназы туж тунсыкоесь аспӧртэмлыкъёссы. Кылсярысь, пор сюанэ бызьымтэ нылъёсты азьло уг лэзё вылэм. Нош егит пиос сюанэ лыктылӥзы сюлоен.

— Малы ке шуоно, азьло дыре выль кенэз лушканы но быгато вал, — вера Морка ёросысь, отчы пыре Шоруньжа но, клубъёсын кивалтӥсь Владимир Дмитриев. — Соин ик эмеспилэн оскымон эшез — савуш — луэ вал. Нош савуш ини аслыз юрттӥськисьёсты люка. Пиос чакласькыса улӥзы, ӧтьымтэ муртъёс сюанэз сураны-пожаны медаз дӥсьтэ шуыса. Нош нылаш бызьыны соглаш луэмзэ возьматылэм, эмеспилэсь ваем виназэ веръяса.
Шоруньжаын ӵукнаысен бер ӝытозь гуж-ж! вазиз. Пор кырӟанъёс, тапыртонъёс вылысьтыз вылаз чузъяськизы. Висказы пырылӥзы удмурт, коми, чуваш, эстон, фин гуръёс.

Элина Кумачёва

Туспуктэмъёс авторлэн

Ангелина Снигирева
By Ангелина Снигирева Июнь 19, 2019 15:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<