Бускельёс мед эшъяськозы

Ангелина Снигирева
By Ангелина Снигирева Июнь 11, 2019 15:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

12-тӥ июне Россилэсь но Ижлэсь нуналзэс пусъём. Ижын 2017-тӥ арысен шоркармылэн но кунмылэн нуналзылы сӥзем ужрадъёс 3 нунал ӵоже, 10-тӥ-12-тӥ июне, кыстӥсько.

Шоркарамы азбарлэсь, ёрослэсь, Ижкарлэсь но Россилэсь нуналъёссэс пусъёзы. Тӧролэн но Правительстволэн администрациенызы кивалтӥсь Сергей Смирнов верамъя, адямиос асьсэос ӵектӥзы, ма каремзы но мае адӟемзы потэ. Туэ ӵектонъёсын 81 заявка вуиз — кылем арынлэсь со 1,5 поллы тросгес. Ижысь Общественной палата вань куронъёсты эскериз. 58-эз быдэстэмын луоз, мукетъёссэ вуоно арын улонэ пыӵатыны ӧдъяло.

С. Смирнов ушъяз П. Берш архитектор нимо урамысь 29 номеро коркан улӥсьёсты: соос кӧня ке ар ӵоже «Берша Сити» азбар проектсэс азинто. Туэ «бершъёс» пичи дырысьтызы азбар шудонъёссэс тодэ вайыны чаклало. Умой луысал, «Мед бускельёс эшъёслы пӧрмозы» девиззылэсь вань ижъёс адӟем карысалзы ке, пусйиз С. Смирнов.

11-тӥ июне Дун-чылкыт Михаиллэн соборез вӧзын «Бадӟым хоровой собор» концерт ортчоз (0+). Со сӥземын М. Калашниковлэн вордскемез дырысен 100 ар тырмонлы. Ог 200 пала музыкантъёс совето вакытысь но туала композиторъёслэсь крезьгуръёссэс быдэстозы. Пумаз соборлэн гырлыосыз жингыртэмен ӵош М. Глинкалэн «Славься» кырӟанэз чузъяськоз.

Тросэз ужрадъёс шутэтскон нуналэ, 12-тӥ июне, ортчозы. Котькудӥз аслыз кельшымон уж, шудон, мастер-класс шедьтоз. Пичиез но, пересез но кӧттырымон шулдыръяськыны быгатоз. Нош 14 арессэс тырмытэм нылъёс но пиос, «Мон — Россилэн гражданинэз» акцие пыриськыса, нырысетӥ паспортсэс басьтозы.

Иж тыметлэн ярдураз «Матрёшка Fest» ортчоз (0+). Ӟуч матрёшка мерталоз Удмуртиын улӥсь калыкъёслэсь дӥсьёссэс. Воргорон дӥсен мунёос но луозы. Со сяна, ярдурын ортчоз #БежимсКузей благотворительной полумарафон — со ихтиоз висёнэн нылпиослы юрттыны чакламын.

Егитъёс туала культуралы сӥзем «Открытый город» фестиваль радъяло (6+). Со 3 интыын 3 нунал ӵоже ортчоз: Ижкар администрация сьӧрысь садын, Суредаськон искусствоосъя музейлэн азбараз но Туала драматургияя но режиссурая центрын.

12-тӥ июне Шор площадьын фейерверк азьын бадӟым концерт ортчоз, отчы пыриськозы Удмуртиысь артистъёс, калыкез озьы ик шулдыртоз Кристина Орбакайте.

  • Асьмелэн артистъёсмы но устоесь. Кылсярысь, Богдан Анфиногенов элькунмес быдэс Россилы возьматэ, егитъёслы туала кылын туж кулэ ужпумъёс сярысь вера, — ватсаз С. Смирнов.

Россилэн нуналаз элькунысьтымы вань ёросъёсын шулдыръяськонъёс ортчозы. Воткаын вальс эктозы, нош Можгалан 1 сюрслэсь ятыр адями Россилэсь гимнзэ кырӟалоз. Та нуналэ ик 5 ёросъёс: Алнаш, Дэбес, Красногорск, Можга, Пичи Пурга — пусъёзы 90 ар тырмонзэс.

Вань ужрадъёсын пыр-поч тодматскыны луэ 259.izh.ru вотэс бамын. 0+

Герберын — парад

Туэ нырысьсэ Ижкарысь Герберын делегациослэн но куноослэн парадзы ортчоз.

Дышем сямен 12-тӥ инвожое Кызьпу арамаын калыкез шулдыртозы «Италмас», «Шулдыр ӝыт», Ижкарысь удмурт самодеятельной ансамбльёс. Ӝукез но сцена азьын ик вӧсялозы. «Удмурт Кенеш» огазеяськонлэн азбараз арганчиос понна вожвылъяськон ортчоз. Егитъёслэн «Шунды» огазеяськонзы вань мылкыд карисьёсты квест шудонэ витёз. «Книга азбарын» Пичи Пургаысь писательёслэн но поэтъёслэн творчествоенызы тодматозы. 

Кыӵе ужрадэ мыноно:

Иж тыметлэн ярдурез

12 часысен — «Матрёшка Fest». (0+)

20 часысен — «Россиысь «Удмурт кизилиос» программа но К. Орбакайтелэн концертэз. (0+)

22 часын — фейерверк. (0+)

Удмуртиысь Кивалтэтлэн юртэз сьӧрысь инты

11 часысен 16 часозь — «Литературной Арбат», Ижкарлэн эшлыко каръёсыныз тодматскон. (0+)

11 часысен 16 часозь — «Тазалык ульча»: врачъёсын кенешонъёс, тазалыкез утёнъя мастер-классъёс. (0+)

11 часысен 15 часозь — «Котьку мед луоз Пушкин!». (0+)

Киров нимо парк

18 часысен 23 часозь — КВН шудонлэн крезьгуро фестивалез. (6+)

Кызьпу арама

11 часысен 17 часозь — Гербер. (0+)

Горький нимо парк

12 часысен 17 часозь — эктон площадка. (0+)

Анастасия Шумилова

Туспуктэм басьтэмын 259.izh.ru сайтысь

Ангелина Снигирева
By Ангелина Снигирева Июнь 11, 2019 15:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<