Якшур-Бӧдья ёросын 16 сюрс пужым мерттэмын

Ангелина Снигирева
By Ангелина Снигирева 20 мая, 2019 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

17-тӥ майысен Удмуртиын кутскизы нюлэс мерттон ужрадъёс. Туэ оглом 90 гектар вылын 630 сюрс писпу удъёс выжыятэмын луозы. Ӟеч уж борды итӥськизы «Удмурт дунне» газетын ужасьёс но.

Гурт удысъя академиысь студентъёс

Нырысетӥез бадӟым мерттӥськон радъяськиз Якшур-Бӧдья ёросысь Селычка но Канифольной гуртъёс вискын. 4 гектар музъем вылэ 16 сюрс пала пужым мерттэмын. Ужрадэ итӥськизы пӧртэм министерствоосын, предприятиосын ужасьёс, студентъёс, волонтёръёс, Якшур-Бӧдья ёросын улӥсьёс. Калыкен артэ быдэс нунал ужазы Удмуртиысь инкуазез утёнъя но инкуазь узырлыкъя министр Денис Удалов, Кун Кенешысь гурт удысъя, музъем кусыпъёсъя но инкуазез утёнъя комиссиен кивалтӥсь Владимир Варламов. Та ӟеч акция борды кӧня ке арзэ итӥськиськом ми но, «Удмурт дунне» газетын ужасьёс. Мерттэм пужымъёсмы будо ни Вотка но Дэри ёросъёсын.
Таяз мерттӥськон ужрадэ тужгес бадӟым командаен — 20-лэсь трос адями — лыктӥзы Ижысь гурт удысъя академиысь студентъёс. 3-тӥ курсын дышетскись нылъёс Ксения Зараева но Евгения Ермолаева ӟеч ужрадэ нырысьсэ уг пырисько ни.

— Ми нюлэсэн ужась вуоно инженеръёс сямен зол валаськом, макем кулэ уж лэсьтӥськом туннэ, — веразы нылашъёс.
Нюлэс — чылкыт омыр гинэ ӧвӧл, со шаермылэсь экономиказэ азинтон, шуизы соос. Академиысь студентъёс арлы быдэ писпу мерттон ужрадъёс ортчытъяло. Кылсярысь, кылем арын Пичи Пурга черкогуртысь школа котыре яблокпуос мерттӥзы. Егитъёс гурт нылпиослы возьматӥзы ӟеч ужлэсь кулэлыксэ.

Нош туннэ лэсьтэм ӟеч ужлы куазь но шумпоттӥз, лэся — быдэс нунал шунды пиштӥз, солэсь азьвыл кӧня ке нунал зор-котсэ кисьтӥз угось. Нюромем муэ пичи удъёслы выжызэс лэзьыны капчигес луоз, малпаськом. Нош ӟеч мылкыдын лэсьтэм ужлэн емышез кылдоз — мерттӥськем бервыламы, кӧня ке ар ортчыса, выль тэль куашетоз. Нюлэсчиос верамъя, 6-7 ар ортчыса, пужымъёс адями ӝужда луозы ни, отын губи, емыш потыны ӧдъялоз. Нош лэсьтӥськонлы та писпуос яралозы, 70 ар ортчыса гинэ. Сыӵе кема будыны кулэ пужымлы. Озьы кораны капчи, будэтыны даур мында кошке. Соин утём инкуазьмес, гурт котыръёсамы мерттомы писпу, вож будосъёс пӧлын омыр но чылкытгес, мылкыд но капчигес.
Нюлэс мерттон акциос азинтэмын луозы сӥзьыл но. «Ул, нюлэс!» ужрадэ эшшо но тросгес калык итӥськоз шуыса оскиськом. Ӟеч уж борды дэмен басьтӥським ке, соку Ф. Васильевлэсь чуръёссэ данъяськыса азинтыны быгатомы: «Милям пужымъёсмы самой ӝужытэсь…». Нош адямиосмы самой адӟем карымонэсь.

Ангелина Снигирёва

Ангелина Снигирева
By Ангелина Снигирева 20 мая, 2019 10:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<